இந்தியாவின் ரியல் ஹீரோ சுமித் மச்சார் உடல்நிலை எப்படி இருக்கு? இந்திய தூதரகம் வெளியிட்ட அப்டேட்!

விமானத்தில் நடந்த அதிர்ச்சி சம்பவத்தின்போது துணிச்சலுடன் செயல்பட்டு ஏராளமான பயணிகளின் உயிரைக் காப்பாற்றியதாக பாராட்டு பெற்ற இந்திய விமானி சுமித் மச்சாரின் உடல்நிலை தற்போது சீராக இருப்பதாக இந்திய தூதரகம் தெரிவித்துள்ளது. சவுதி அரேபியாவின் வடமேற்குப் பகுதியில் உள்ள தபூக் நகரில் அவர் மருத்துவமனையில் அனுமதிக்கப்பட்டு, தொடர்ந்து சிகிச்சை பெற்று வருகிறார்.

துபாயில் இருந்து இஸ்ரேலின் டெல் அவிவ் நோக்கி சென்ற ஃப்ளைதுபாய் பயணிகள் விமானத்தில் இந்த பரபரப்பான சம்பவம் நடந்தது. விமானம் பறந்து கொண்டிருந்தபோது துணை விமானி, கேப்டன் சுமித் மச்சாரை கத்தியால் தாக்கியதாக தகவல்கள் வெளியாகியுள்ளன.

இதில் படுகாயமடைந்த நிலையிலும் சுமித் மச்சார் எதிர்த்து போராடியதாகவும், பின்னர் விமானத்தின் காக்பிட் கதவைத் திறக்க உதவியதாகவும் சர்வதேச ஊடகங்கள் தெரிவித்துள்ளன.

இதையும் படிங்க: சவுதியில் அடுத்தடுத்து ஏவுகணை, ட்ரோன் தாக்குதல்! மத்திய கிழக்கில் நிலைமை மோசமாகலாம்- அமெரிக்கா வார்னிங்!

இதற்கிடையே விமானம் திடீரென சுமார் 4,267 மீட்டர் உயரம் வரை மிக வேகமாகக் கீழிறங்கியதாகவும் தகவல்கள் தெரிவிக்கின்றன. நிலைமை கட்டுக்கடங்காமல் சென்ற நிலையில், பயணிகளும் விமான ஊழியர்களும் காக்பிட்டுக்குள் சென்று தாக்குதல் நடத்தியதாக கூறப்படும் துணை விமானியை கட்டுப்படுத்தினர்.

பின்னர் விமானம் சவுதி அரேபியாவின் தபூக் விமான நிலையத்தில் பாதுகாப்பாக அவசரமாக தரையிறக்கப்பட்டது. விமானத்தில் இருந்த 174 பயணிகளும் பாதுகாப்பாக இருப்பதாக தெரிவிக்கப்பட்டுள்ளது.

இந்த சம்பவத்தில் காயமடைந்த சுமித் மச்சார் தற்போது தபூக் மருத்துவமனையில் சிகிச்சை பெற்று வருகிறார். அவரது உடல்நிலை சீராக இருப்பதாக இந்திய தூதரகம் தெரிவித்துள்ளது. அவர் காயங்களில் இருந்து விரைவில் குணமடைய தூதரகம் நம்பிக்கை தெரிவித்துள்ளது.

ரியாத்தில் உள்ள இந்திய தூதரகமும் ஜித்தாவில் உள்ள இந்திய துணைத் தூதரகமும் அவரது உடல்நிலையை தொடர்ந்து கண்காணித்து வருகின்றன. மேலும், சுமித் மச்சாரின் குடும்பத்தினருடன் தூதரக அதிகாரிகள் தொடர்பில் இருப்பதாகவும் தெரிவிக்கப்பட்டுள்ளது.

விமானத்தில் ஏற்பட்ட ஆபத்தான சூழ்நிலையில் காயங்களையும் பொருட்படுத்தாமல் செயல்பட்டதாக கூறப்படும் சுமித் மச்சாருக்கு இஸ்ரேல் பிரதமர் பெஞ்சமின் நெதன்யாகுவும் பாராட்டு தெரிவித்துள்ளார். இந்த சம்பவம் தொடர்பான விசாரணைகள் தொடர்ந்து நடைபெற்று வருகின்றன.

இதையும் படிங்க: மெக்காவை குறிவைத்த ஹவுதிகள்? பரபரப்பை கிளப்பிய ட்ரோன் தாக்குதல்! நடுவானில் சுட்டுவீழ்த்திய சவுதி பாதுகாப்புப் படை!