வாக்களிப்பதை கட்டாயமாக்க முடியாது! உச்ச நீதிமன்றம் அதிரடி தீர்ப்பு!

தேர்தலில் வாக்களிப்பதைக் கட்டாயமாக்கக் கோரியும், வாக்களிக்காதவர்களுக்கு அரசு நலத்திட்டங்களைத் தடை செய்யக் கோரியும் தாக்கல் செய்யப்பட்ட பொதுநல மனுவை விசாரிக்க உச்ச நீதிமன்றம் மறுப்புத் தெரிவித்துத் தள்ளுபடி செய்தது. ஜனநாயக நாட்டில் வாக்களிப்பது என்பது ஒரு குடிமகனின் உரிமை சார்ந்த விஷயம் என்பதில் நீதிமன்றம் தெளிவான நிலைப்பாட்டை எடுத்துள்ளது.

தேர்தல் ஆணையத்திற்கு உத்தரவிடக் கோரி தாக்கல் செய்யப்பட்ட அந்த மனுவில் கீழ்க்கண்ட கோரிக்கைகள் முன்வைக்கப்பட்டன. இந்தியாவில் நடைபெறும் அனைத்து தேர்தல்களிலும் வாக்களிப்பதைக் சட்டரீதியாகக் கட்டாயமாக்க வேண்டும். வேண்டுமென்றே வாக்களிக்காமல் இருப்பவர்களுக்கு, அரசின் நலத்திட்டங்கள் மற்றும் சலுகைகளைப் பெறுவதில் இருந்து தடை விதிக்கத் தேர்தல் ஆணையத்திற்கு வழிகாட்டுதல்களைப் பிறப்பிக்க வேண்டும்.

இந்த மனுவை விசாரித்த நீதிபதிகள் அமர்வு, மனுதாரரின் கோரிக்கையை ஏற்க மறுத்துவிட்டனர். வாக்களிப்பதைக் கட்டாயமாக்குவது என்பது அரசின் கொள்கை (Policy Matter) சார்ந்த விஷயம். இதில் நீதிமன்றம் தலையிட்டு எந்த உத்தரவையும் பிறப்பிக்க முடியாது" என நீதிபதிகள் தெரிவித்தனர். இத்தகைய முடிவுகளை எடுக்க வேண்டிய அதிகாரம் நாடாளுமன்றத்திற்கே உள்ளது என்பதையும் நீதிமன்றம் சுட்டிக்காட்டியது.

இதையும் படிங்க: ராகுல் காந்தி நாளை தமிழகம் வருகிறார்! 3 மாவட்டங்களில் காங்கிரஸ் வேட்பாளர்களுக்கு ஆதரவாக சூறாவளி பரப்புரை!

இந்திய அரசியலமைப்புச் சட்டத்தின்படி, வாக்களிப்பது என்பது ஒரு குடிமகனின் உரிமையாகவே பார்க்கப்படுகிறது. இதனை ஒரு கட்டாயக் கடமையாக மாற்றுவது தனிநபர் சுதந்திரத்தைப் பாதிக்கும் என்ற சட்ட வல்லுநர்களின் கருத்தை ஒட்டியே நீதிமன்றத்தின் இந்தத் தீர்ப்பு அமைந்துள்ளது.

ஏற்கனவே இத்தகைய விவாதங்கள் எழுந்தபோது, வாக்களிப்பதன் அவசியத்தைப் பற்றி மக்களிடையே விழிப்புணர்வை ஏற்படுத்தவே முன்னுரிமை அளிப்பதாகத் தேர்தல் ஆணையம் தெரிவித்திருந்தது. கட்டாயப்படுத்துவதை விட, விழிப்புணர்வு மூலம் வாக்கு சதவீதத்தை அதிகரிப்பதே ஆரோக்கியமான ஜனநாயகம் எனப் பல்வேறு தரப்பினரும் கருத்து தெரிவித்து வருகின்றனர்.

தமிழகத்தில் தேர்தல் களம் சூடுபிடித்துள்ள நிலையில், உச்ச நீதிமன்றத்தின் இந்தத் தீர்ப்பு வாக்காளர்கள் மற்றும் அரசியல் கட்சிகளிடையே முக்கிய விவாதமாக மாறியுள்ளது.

இதையும் படிங்க: இன்று வெளியாகிறது தவெக வாக்குறுதி புத்தகம்..! நீலாங்கரையிலிருந்து புறப்பட்ட விஜய்..!