1 லட்சம் பேரின் வேலை அம்போ!! ஆள் குறைப்பில் ஐடி நிறுவனங்கள் தீவிரம்!

உலகளாவிய தகவல் தொழில்நுட்ப (ஐ.டி.) துறை இந்தாண்டு பெரும் நெருக்கடியை எதிர்கொண்டுள்ளது. செலவுகளைக் குறைக்கும் பெயரில், 218 முன்னணி ஐ.டி. நிறுவனங்கள் சேர்ந்து 1,12,732 பணியாளர்களை பணிநீக்கம் செய்துள்ளன. இது இதுவரை வெளியான அதிகாரப்பூர்வ தகவல்களின் அடிப்படையில், ‘லே ஆப்ஸ்.ஃபை’ (Layoffs.fyi) என்ற இணையதளம் அறிவித்துள்ளது. 

இந்த ஆட்குறைப்பு, செயற்கை நுண்ணறிவு (ஏ.ஐ.) போன்ற புதிய தொழில்நுட்பங்களில் முதலீடு செய்யும் நோக்கத்தில் நிறுவனங்கள் எடுக்கும் முதல் கட்ட நடவடிக்கையாகக் கருதப்படுகிறது. அடுத்த கட்டமாக, மேலும் பல ஆயிரம் பணியாளர்களை நீக்கும் திட்டமும் உள்ளதாக வட்டாரங்கள் தெரிவிக்கின்றன.

இந்த ஆட்குறைப்பு ஏன் நடக்கிறது? பெரும்பாலான ஐ.டி. நிறுவனங்கள், உலகப் பொருளாதாரத்தில் ஏற்பட்ட சுணக்கம் மற்றும் ஏ.ஐ. தொழில்நுட்பத்தின் வேகமான வளர்ச்சியை காரணமாகக் காட்டுகின்றன. கோவிட் காலத்தில் அதிகரித்த வேலைக்கு ஆட்களை ஹையர் செய்த நிறுவனங்கள், இப்போது செலவுகளைக் குறைத்து, ஏ.ஐ., கிளவுட் கம்ப்யூட்டிங் போன்ற புதிய துறைகளில் அதிக முதலீடு செய்ய முனைகின்றன. 

இதையும் படிங்க: அமெரிக்காவை காப்பாத்தவே முடியாது!! ட்ரம்புக்கு எதிரான வழக்கு!! அமெரிக்க சுப்ரீம் கோர்ட்டில் வாதம்!

இதனால், பாரம்பரிய ஐ.டி. பணிகளில் ஈடுபட்டிருந்தவர்கள் அதிகம் பாதிக்கப்படுகின்றனர். குறிப்பாக, நிறுவனங்களின் தலைமைப் பொறுப்புகளில் (எக்ஸிக்யூட்டிவ்) இருந்தவர்களும், நடுத்தர மேனேஜ்மெண்ட் லெவலில் இருந்தவர்களும் பெரும்பாலானவர்கள் வேலை இழந்துள்ளனர். இவர்கள் சம்பளம் அதிகமாக இருப்பதால், நிறுவனங்கள் இவர்களை முதலில் இலக்காகக் கொண்டுள்ளன.

உதாரணமாக, உலகின் மிகப்பெரிய இ-காமர்ஸ் நிறுவனமான அமேசான், இந்தாண்டு ஆயிரக்கணக்கான பணியாளர்களை பணிநீக்கம் செய்துள்ளது. அதேபோல், சிப் தயாரிப்பில் முன்னணியில் இருக்கும் இன்டெல் நிறுவனம், 15,000-க்கும் மேற்பட்ட ஊழியர்களை நீக்கியது. இந்தியாவின் மிகப்பெரிய ஐ.டி. சேவை நிறுவனமான டாடா கன்சல்டன்சி சர்வீஸஸ் (டி.சி.எஸ்.)யும், சுமார் 5,000 பணியாளர்களை பணிநீக்கம் செய்துள்ளது. 

மைக்ரோசாஃப்ட், கூகுள், டெஸ்லா, சிஸ்கோ, பேபால், சேல்ஸ்ஃபோர்ஸ் போன்ற பிற முன்னணி நிறுவனங்களும் ஆயிரக்கணக்கான வேலைகளை வெட்டியுள்ளன. இந்தியாவில் மட்டும், ஐ.டி. துறையில் 50,000-க்கும் மேற்பட்ட பணியாளர்கள் வேலை இழந்துள்ளதாக துணைத் தகவல்கள் கூறுகின்றன. இது, இந்திய இளைஞர்களின் வேலைவாய்ப்புக்கு பெரும் தாக்கத்தை ஏற்படுத்தியுள்ளது.

இந்த ஆட்குறைப்புகள், நிறுவனங்களின் லாபத்தை அதிகரிக்க உதவியுள்ளன. உதாரணமாக, இன்டெல் நிறுவனம் 10 பில்லியன் டாலர் செலவு குறைப்பை இலக்காகக் கொண்டுள்ளது. ஆனால், இது பணியாளர்களுக்கு பெரும் அதிர்ச்சியை ஏற்படுத்தியுள்ளது. ‘லே ஆப்ஸ்.ஃபை’ இணையதளத்தின் தகவல்படி, 2024-ஆம் ஆண்டு முழுவதும் ஐ.டி. துறையில் 1.5 லட்சத்துக்கும் மேற்பட்ட வேலை இழப்புகள் ஏற்பட்டுள்ளன. 

இது 2023-ஐ விட சற்று குறைவானாலும், தொடர்ச்சியாக நடக்கும் ஆட்குறைப்பு, துறையில் பதற்றத்தை ஏற்படுத்தியுள்ளது. நிபுணர்கள் கூறுகையில், ஏ.ஐ. போன்ற தொழில்நுட்பங்கள் புதிய வேலைகளை உருவாக்கும் என்றாலும், அவை பழைய திறன்களை வைத்திருப்பவர்களுக்கு பொருந்தாது. எனவே, பணியாளர்கள் புதிய திறன்களை கற்றுக்கொள்ள வேண்டும் என்று அறிவுறுத்துகின்றனர்.

இந்த நிலையில், உலக ஐ.டி. துறை, ஒரு பக்கம் செலவு குறைப்பு செய்து, மறுபக்கம் ஏ.ஐ. போன்ற புதிய துறைகளில் பெரும் முதலீடு செய்து வருகிறது. இது, துறையின் எதிர்கால வளர்ச்சிக்கு உதவும் என்று நிறுவனத் தலைவர்கள் கூறுகின்றனர். ஆனால், வேலை இழந்த பணியாளர்களின் எதிர்காலம் குறித்து கவலை தோன்றுகிறது. இந்தியாவில், ஐ.டி. துறைக்கு சொந்தமான இளைஞர்கள், இந்த ஆட்குறைப்பால் பாதிக்கப்படுவதைத் தவிர்க்க, அரசு மற்றும் நிறுவனங்கள் புதிய திறன் பயிற்சி திட்டங்களை அறிமுகம் செய்ய வேண்டும் என்ற குரல்கள் எழுந்துள்ளன.

இதையும் படிங்க: சூடுபிடிக்கும் தேர்தல் களம்... தமிழக பாஜக தேர்தல் பொறுப்பாளர் திடீர் வருகை..! யாருடன் கூட்டணி...?