பெத்தவங்கள கவனிச்சிக்கலையா.. அப்போ சம்பளம் கட்..!! தெலங்கானாவில் வந்தது புதிய சட்டம்..!!

தெலுங்கானாவில் முதலமைச்சர் ஏ.ரேவந்த் ரெட்டி தலைமையிலான காங்கிரஸ் அரசு, மூத்த குடிமக்களின் நலனுக்காக ஒரு முக்கியமான நடவடிக்கையை மேற்கொண்டுள்ளது. நேற்று (மார்ச் 29, 2026) சட்டசபையில் ஒருமனதாக நிறைவேற்றப்பட்ட தெலுங்கானா ஊழியர்கள் பொறுப்புக்கூறுதல் மற்றும் பெற்றோர் ஆதரவு கண்காணிப்பு மசோதா 2026 (Telangana Employees Accountability and Monitoring of Parental Support Bill, 2026) இந்தியாவில் மாநில அளவில் இதுபோன்ற முதல் சட்டமாகக் கருதப்படுகிறது.

இந்த மசோதாவின் முக்கிய நோக்கம், வேலை செய்யும் பிள்ளைகள் தங்கள் வயதான பெற்றோரைப் புறக்கணிப்பதைத் தடுத்து, அவர்களின் நிதி மற்றும் உணர்வுப்பூர்வமான பாதுகாப்பை உறுதி செய்வதாகும். முதலமைச்சர் ரேவந்த் ரெட்டி மசோதாவை அறிமுகப்படுத்தியபோது, “மூத்தவர்களை கவனிக்கத் தவறும் பிள்ளைகளை சமூகம் திருத்த வேண்டிய பொறுப்பு உள்ளது. இந்த சட்டம் நல்லெண்ண அடிப்படையில் பெற்றோரின் உரிமைகளைப் பாதுகாக்கும். ஆனால், புறக்கணிப்பு ஏற்பட்டால் சட்டம் அவர்களுக்கு உறுதுணையாக இருக்கும்” என்று வலியுறுத்தினார்.

இதையும் படிங்க: ஆந்திராவில் நிகழ்ந்த சோகம்..! நெஞ்சை பிழிந்த பேருந்து தீவிபத்து... பலி எண்ணிக்கை உயர்வு..!!

இந்த புதிய சட்டத்தின்படி, அரசு ஊழியர்கள், தனியார் துறை ஊழியர்கள், எம்.பி., எம்.எல்.ஏ., ஊராட்சி மன்றத் தலைவர்கள் உள்ளிட்ட பொது பிரதிநிதிகள் அனைவரும் தங்கள் வயதான பெற்றோரைப் பராமரிக்க வேண்டியது கட்டாயமாகிறது. இதை மீறி பெற்றோரை கவனிக்கத் தவறினால், அவர்களின் மொத்த மாத சம்பளத்தில் 15 சதவீதம் அல்லது ரூ.10,000, இவற்றில் எது குறைவோ அந்தத் தொகை பிடித்தம் செய்யப்படும். பிடிக்கப்படும் தொகை நேரடியாகப் பெற்றோரின் வங்கிக் கணக்கில் வரவு வைக்கப்படும்.

தற்போது நாடு முழுவதும் அமலில் உள்ள பெற்றோர் மற்றும் மூத்த குடிமக்கள் பராமரிப்பு மற்றும் நலவாழ்வு சட்டம் 2007ஐ விட இந்த மசோதா மிகவும் வலுவான அமலாக்க வழிமுறைகளைக் கொண்டுள்ளது என்று முதலமைச்சர் சுட்டிக்காட்டினார். பெற்றோர்கள் மாவட்ட ஆட்சியரிடம் புகார் அளிக்கலாம். புகார் பெறப்பட்ட 60 நாட்களுக்குள் விசாரணை முடிக்கப்பட்டு, தகுந்த நடவடிக்கை எடுக்கப்படும். ரேவந்த் ரெட்டி மேலும் கூறுகையில், “பெற்றோரைப் புறக்கணிப்பது தனிப்பட்ட விஷயம் அல்ல; இது சமூகப் பொறுப்பு. இந்த சட்டம் மூலம் மூத்தவர்களுக்கு நம்பிக்கை ஏற்படுத்துவதே நோக்கம். பழங்கால மதிப்பீடுகளையும், நவீன கால தேவைகளையும் இணைத்து இந்த நடவடிக்கையை எடுத்துள்ளோம்” என்றார்.

இந்த மசோதா சட்டசபையில் அனைத்துக் கட்சி உறுப்பினர்களின் ஆதரவுடன் ஒருமனதாக நிறைவேற்றப்பட்டது. இது தெலுங்கானாவில் குடும்ப உறவுகளை வலுப்படுத்தும் மற்றும் மூத்த குடிமக்களின் கண்ணியத்தைப் பாதுகாக்கும் ஒரு முக்கிய படியாகப் பார்க்கப்படுகிறது. பல்வேறு சமூக அமைப்புகளும் இந்த முயற்சியை வரவேற்றுள்ளன. இந்த சட்டம் அமலுக்கு வந்த பிறகு, பெற்றோரின் உரிமைகள் மேலும் பலப்படுத்தப்படும் என எதிர்பார்க்கப்படுகிறது. 

இதையும் படிங்க: பெண் குழந்தையால் கூடுதல் வரதட்சணை..! மனைவி, மாமாவை டீசல் ஊற்றி எரித்து கொன்ற கொடூர கணவன்..!