தட்டாஞ்சாவடி இடைத்தேர்தல்: EVM, VVPAT இயந்திரங்கள் ஒதுக்கீடு! 2 பதற்றமான வாக்குச்சாவடிகள் அறிவிப்பு! பாதுகாப்பு தீவிரம்!

புதுச்சேரி: புதுச்சேரி தட்டாஞ்சாவடி சட்டமன்றத் தொகுதியில் காலியாக உள்ள உறுப்பினர் பதவிக்கான இடைத்தேர்தல் வரும் அக்டோபர் 6-ம் தேதி நடைபெற உள்ள நிலையில், தேர்தல் பணிகள் தீவிரப்படுத்தப்பட்டுள்ளன. இதன் ஒரு பகுதியாக, வாக்குப்பதிவுக்கு பயன்படுத்தப்பட உள்ள EVM மற்றும் VVPAT இயந்திரங்களுக்கான முதல் கட்ட சீரற்ற ஒதுக்கீடு நடைபெற்றது.

மாவட்ட தேர்தல் அதிகாரி குலோத்துங்கன், இ.ஆ.ப. தலைமையில் நடைபெற்ற இந்த நிகழ்ச்சியில், அங்கீகரிக்கப்பட்ட தேசிய மற்றும் மாநில அரசியல் கட்சிகளின் பிரதிநிதிகள் பங்கேற்றனர்.

தேர்தலில் பயன்படுத்தப்பட உள்ள EVM மற்றும் VVPAT இயந்திரங்கள் ஏற்கனவே முதல் கட்ட பரிசோதனைக்கு உட்படுத்தப்பட்டிருந்தன. இதையடுத்து, எந்த வாக்குச்சாவடிக்கு எந்த இயந்திரம் ஒதுக்கப்பட வேண்டும் என்பதை கணினி முறையில் சீரற்ற வகையில் தேர்வு செய்யும் First Randomization நடைமுறை தற்போது மேற்கொள்ளப்பட்டது.

இதனைத் தொடர்ந்து, ஒதுக்கீடு செய்யப்பட்ட EVM மற்றும் VVPAT இயந்திரங்கள் அரசியல் கட்சி பிரதிநிதிகள் முன்னிலையில் பிரிக்கப்பட்டன. பின்னர் அவை ரெட்டியார்பாளையத்தில் உள்ள தேர்தல் துறையின் பாதுகாப்பு அறையான Strong Room-ல் பாதுகாப்பாக வைக்கப்பட்டன.
தட்டாஞ்சாவடி தொகுதியில் மொத்தம் 31 வாக்குச்சாவடி மையங்கள் உள்ளன. இந்த தொகுதியில் 26,797 வாக்காளர்கள் உள்ளனர். இதில் 12,520 பேர் ஆண் வாக்காளர்கள், 14,172 பேர் பெண் வாக்காளர்கள் மற்றும் 5 பேர் பொதுப்பாலின வாக்காளர்கள் ஆவர். மேலும், 13 சேவை வாக்காளர்களும் உள்ளனர்.

வாக்குப்பதிவுக்கு மொத்தம் 120 EVM இயந்திரங்கள் தேவைப்படும் நிலையில், 150 EVM இயந்திரங்கள் தயார் நிலையில் இருப்பதாக மாவட்ட தேர்தல் அதிகாரி குலோத்துங்கன் தெரிவித்துள்ளார்.

மேலும், தட்டாஞ்சாவடி தொகுதியில் இரண்டு பதற்றமான வாக்குச்சாவடிகள் கண்டறியப்பட்டுள்ளதாகவும் அவர் கூறியுள்ளார்.

அக்டோபர் 6-ம் தேதி நடைபெற உள்ள இடைத்தேர்தலை முன்னிட்டு, வாக்குச்சாவடிகள், மின்னணு வாக்குப்பதிவு இயந்திரங்கள் மற்றும் பாதுகாப்பு ஏற்பாடுகள் தொடர்பான பணிகள் தொடர்ந்து தீவிரமாக நடைபெற்று வருகின்றன.

இதையும் படிங்க: தட்டாஞ்சாவடி தொகுதி இடைத்தேர்தல்! திமுக வேட்பாளராக சேது செல்வம் அறிவிப்பு!