தமிழகத்தில் வாக்குப்பதிவு நிறைவு! 1952 சாதனையை முறியடித்தது 2026 தேர்தல்!

தமிழகச் சட்டமன்றத் தேர்தலுக்கான வாக்குப்பதிவு இன்று காலை 7 மணிக்குத் தொடங்கி, மாலை 6 மணியுடன் அதிகாரப்பூர்வமாக நிறைவடைந்தது. மாலை 5 மணி நிலவரப்படி தமிழகத்தில் 82.24 சதவீத வாக்குகள் பதிவாகியுள்ள நிலையில், இது 1952-ஆம் ஆண்டுக்குப் பிறகு நடைபெறும் தேர்தல்களில் மிக உயரிய பதிவாகக் கருதப்படுகிறது.

தேர்தல் ஆணையத்தின் விதிமுறைப்படி, மாலை 6 மணிக்கு முன்னதாக வாக்குச்சாவடி வளாகத்திற்குள் வந்த அனைத்து வாக்காளர்களும் தங்களது வாக்கைச் செலுத்த அனுமதிக்கப்பட்டனர். வரிசையில் நின்ற கடைசி நபர் வரை அனைவருக்கும் தேர்தல் அதிகாரிகளால் டோக்கன் வழங்கப்பட்டது. டோக்கன் பெற்றவர்கள் அனைவரும் வாக்களிக்கும் வரை அந்தந்த வாக்குச்சாவடிகளில் வாக்குப்பதிவு தொடர்ந்து நடைபெறும்.

மாலை 5 மணி நிலவரப்படியே 82.24 சதவீதத்தைத் தமிழகம் எட்டியுள்ளது அரசியல் வட்டாரத்தில் பெரும் வியப்பை ஏற்படுத்தியுள்ளது. 2021 சட்டமன்றத் தேர்தலில் ஒட்டுமொத்தமாகப் பதிவான சதவீதத்தை விட இது மிக அதிகம். டோக்கன் பெற்று வாக்களிப்பவர்களின் எண்ணிக்கையையும் சேர்த்தால், இறுதி வாக்குப்பதிவு சதவீதம் 85 முதல் 87 வரை உயர வாய்ப்புள்ளதாகத் தெரிகிறது.

இதையும் படிங்க: வித்தியாசமான தேர்தல்.. மக்கள் ஆர்வமா இருக்காங்க! சென்னையில் வாக்களித்த பிறகு நடிகர் சிம்பு, வடிவேலு பேட்டி!

ஒரு சில இடங்களில் வாக்குப்பதிவு இயந்திரக் கோளாறு மற்றும் சிறிய அளவிலான மோதல்கள் (திருவண்ணாமலை கலசப்பாக்கம் போன்ற இடங்கள்) தவிர, மாநிலம் முழுவதும் தேர்தல் அமைதியான முறையில் நடைபெற்று முடிந்தது. 1.5 லட்சம் காவலர்கள் மற்றும் 1.50 லட்சம் சிசிடிவி கேமராக்கள் மூலம் ஒட்டுமொத்தப் பணிகளும் கண்காணிக்கப்பட்டன.

வாக்குப்பதிவு முழுமையாக நிறைவடைந்ததும் மின்னணு வாக்குப்பதிவு இயந்திரங்கள் (EVM) மற்றும் விவிபேட் (VVPAT) கருவிகள் வேட்பாளர்களின் முகவர்கள் முன்னிலையில் சீல் வைக்கப்படும். பலத்த பாதுகாப்புடன் இந்த இயந்திரங்கள் அந்தந்த மாவட்டங்களில் உள்ள வாக்கு எண்ணும் மையங்களுக்கு (Strong Rooms) கொண்டு செல்லப்படும்.

தமிழகத்தின் எதிர்காலத்தைத் தீர்மானிக்கப்போகும் இந்த 'மகா தேர்தல்' முடிவுகள் வரும் மே மாதம் அறிவிக்கப்படவுள்ளன. 74 ஆண்டுகால சாதனையை முறியடித்துள்ள இந்த விஸ்வரூப வாக்குப்பதிவு, தேர்தல் முடிவுகளில் எத்தகைய தாக்கத்தை ஏற்படுத்தும் என்ற எதிர்பார்ப்பு இப்போதே எகிறியுள்ளது.

இதையும் படிங்க: திருவண்ணாமலையில் அதிர்ச்சி: வாக்குப்பதிவு இயந்திரத்தை உடைத்த வேட்பாளரின் ஏஜென்ட்!