28 நாள் ரீசார்ஜுக்கு முடிவு: 30 நாட்கள் வேலிடிட்டி வழங்க டிராய் அதிரடி உத்தரவு!

இந்தியாவில் உள்ள முன்னணி தொலைத்தொடர்பு சேவை நிறுவனங்கள் வாடிக்கையாளர்களை ஏமாற்றி 28 நாட்கள் மட்டுமே வேலிடிட்டி வழங்கும் நடைமுறைக்கு முற்றுப்புள்ளி வைத்து, அதற்குப் பதிலாக முழுமையாக 30 நாட்கள் வேலிடிட்டியுடன் கூடிய மாதாந்திர ரீசார்ஜ் திட்டங்களை வழங்க வேண்டும் என்றும், இணையதள டேட்டா (Internet Data) தேவையில்லாத ஏழை எளிய மக்கள் மற்றும் சாதாரண பட்டன் போன் பயனாளர்களுக்குக் குறைந்த கட்டணத்தில் 'வாய்ஸ் கால் மற்றும் எஸ்எம்எஸ்' (Voice & SMS Only) மட்டும் அடங்கிய பிரத்யேக மலிவு விலை திட்டங்களைக் கட்டாயமாக அறிமுகப்படுத்த வேண்டும் என்றும் இந்தியத் தொலைத்தொடர்பு ஒழுங்குமுறை ஆணையம் (TRAI) அதிரடி உத்தரவு பிறப்பித்துள்ளது.

இந்தியாவில் ஜியோ, ஏர்டெல், வோடபோன் ஐடியா (Vi) உள்ளிட்ட முன்னணி நிறுவனங்கள், மாதாந்திர ரீசார்ஜ் என்ற பெயரில் 28 நாட்களை மட்டுமே வேலிடிட்டியாக வழங்கி வந்தன. இதன் காரணமாக, ஒரு மாதத்திற்கு 2 முதல் 3 நாட்கள் பற்றாக்குறை ஏற்பட்டு, 365 நாட்கள் கொண்ட ஒரு ஆண்டில் வாடிக்கையாளர்கள் கட்டாயமாக 13 முறை ரீசார்ஜ் செய்ய வேண்டிய அவல நிலைக்குத் தள்ளப்பட்டனர். 

இது சாமானிய மக்களின் பாக்கெட்டைப் பதம் பார்க்கும் பகற்கொள்ளை என நுகர்வோர் அமைப்புகள் தொடர்ந்து குற்றம்சாட்டி வந்தன. மேலும், ஸ்மார்ட்போன் வைத்திருக்காத கோடிக்கணக்கான பாமர மக்கள், கிராமப்புற முதியவர்கள் மற்றும் வீட்டிலேயே பிராட்பேண்ட் வைஃபை வசதி வைத்துள்ளவர்கள் வெறும் அழைப்புகளுக்கு மட்டுமே தொலைபேசியைப் பயன்படுத்தும் சூழலில், அவர்களையும் கட்டாயப்படுத்தி அதிக விலை கொண்ட இணைய டேட்டா பேக்குகளை வாங்க வைக்கும் நடைமுறையும் நிலவி வந்தது.

இதையும் படிங்க: வெளிநாடு போவோருக்கு Vi அதிரடி சலுகை: 170 நாடுகளில் சர்வதேச ரோமிங் இலவசம்!

இந்த முறைகேடுகளுக்குச் சாட்டையடி கொடுக்கும் வகையில், தொலைத்தொடர்பு நுகர்வோர் பாதுகாப்பு (13-வது திருத்த) ஒழுங்குமுறை விதிகள் 2026-ஐ டிராய் அதிகாரப்பூர்வமாக வெளியிட்டுள்ளது. இதன்படி, அனைத்து நிறுவனங்களும் கட்டாயமாக 30 நாட்கள் வேலிடிட்டி கொண்ட திட்டங்களை வழங்க வேண்டும் அல்லது ஒவ்வொரு மாதமும் குறிப்பிட்ட ஒரே தேதியில் ரீசார்ஜ் புதுப்பிக்கப்படும் (Same-date Monthly Renewal) வசதியைக் கொண்டு வர வேண்டும்.

மேலும், தேவையற்ற டேட்டா கட்டணங்களைச் சுமத்தாமல், இணைய வசதி இல்லாத சாதாரண ஃபீச்சர் போன் பயனாளர்களுக்கு ஏற்ப, கணிசமாகக் குறைந்த கட்டணத்தில் அழைப்புகள் மற்றும் குறுஞ்செய்திகளை மட்டும் உள்ளடக்கிய ரீசார்ஜ் திட்டங்களை அனைத்து வேலிடிட்டி கால அளவுகளிலும் கட்டாயமாக அறிமுகப்படுத்த வேண்டும் என்றும் டிராய் கறாராக உத்தரவிட்டுள்ளது. நுகர்வோரின் நீண்ட நாள் துயரத்திற்குத் தீர்வாக வந்துள்ள இந்த ஒழுங்குமுறை உத்தரவு, இந்தியாவின் கோடிக்கணக்கான நடுத்தர மற்றும் ஏழை எளிய குடும்பங்களுக்கு மிகப்பெரிய நிதி நிவாரணமாகவும் நிம்மதியாகவும் அமைந்துள்ளது.
 

இதையும் படிங்க: அமெரிக்க மிரட்டலுக்கு பணிய மாட்டோம்: வர்த்தக நலன்களை பாதுகாக்க இந்தியா உறுதி!