இந்தியாவுடன் ட்ரோன் டீல்... அடுத்ததாக பாகிஸ்தானுடனும் ஒப்பந்தம்! டிரம்ப் மகன்கள் முதலீடுகளால் பரபரப்பு!

அமெரிக்க அதிபர் டொனால்டு டிரம்பின் மகன்களான டொனால்டு டிரம்ப் ஜூனியர் மற்றும் எரிக் டிரம்ப் முதலீடு செய்துள்ள அமெரிக்காவைச் சேர்ந்த Powerus என்ற ட்ரோன் நிறுவனம், இந்தியா மற்றும் பாகிஸ்தானுடன் மேற்கொண்டுள்ள பாதுகாப்பு தொடர்பான ஒப்பந்தங்கள் கவனத்தை ஈர்த்துள்ளன.

குறிப்பாக, இந்தியாவில் எதிரி ட்ரோன்களை இடைமறிக்கும் தொழில்நுட்பத்தை தயாரிக்க ஒப்பந்தம் செய்த சில மாதங்களிலேயே, பாகிஸ்தானுடனும் ட்ரோன் தொடர்பான ஒப்பந்தத்தில் நிறுவனம் இணைந்துள்ளது.

Powerus நிறுவனம் கடந்த ஜூன் மாதம் மும்பையைச் சேர்ந்த Paras Defence and Space Technologies நிறுவனத்துடன் ஒப்பந்தம் மேற்கொண்டது. இதன்படி Powerus உருவாக்கிய Guardian-1 Interceptor என்ற எதிர்-ட்ரோன் அமைப்பை இந்தியாவில் தயாரித்து விற்பனை செய்வதற்கான பிரத்யேக உரிமம் Paras Defence நிறுவனத்துக்கு வழங்கப்பட்டது.

இதையும் படிங்க: பாகிஸ்தானுக்கு அமெரிக்க ட்ரோன்கள்! டிரம்ப் குடும்பத்துடன் தொடர்புடைய நிறுவனத்துக்கு ஆர்டர்!

இந்த தொழில்நுட்பம் குறைந்த செலவில் பயன்படுத்தப்படும் தாக்குதல் ட்ரோன்கள் உள்ளிட்ட வான்வழி அச்சுறுத்தல்களை எதிர்கொள்வதற்காக உருவாக்கப்பட்டதாக Powerus தெரிவித்துள்ளது.

இதன் தொடர்ச்சியாக, செப்டம்பர் மாதத்தில் Powerus நிறுவனம் பாகிஸ்தான் ராணுவத்துடன் புரிந்துணர்வு ஒப்பந்தம் மேற்கொண்டதாக தகவல் வெளியானது. இதில் ஆளில்லா விமான தொழில்நுட்பம் தொடர்பான ஆரம்பகட்ட ஆர்டரும் இடம்பெற்றுள்ளதாக தெரிவிக்கப்பட்டுள்ளது.

ஆனால், அந்த ஆர்டரின் மதிப்பு மற்றும் எந்த வகையான ட்ரோன்கள் வழங்கப்பட உள்ளன என்பது போன்ற விவரங்கள் பாதுகாப்பு காரணங்களால் பொதுவெளியில் வெளியிடப்படவில்லை.

மேலும், பாகிஸ்தானில் ட்ரோன் தயாரிப்பு தொடர்பான கூட்டு முயற்சிகளை உருவாக்குவது குறித்தும் Powerus ஆலோசித்து வருவதாக செய்திகள் தெரிவிக்கின்றன. பாகிஸ்தானின் பாதுகாப்பு உற்பத்தித் திறனை மேம்படுத்தும் வகையில் நீண்டகால ஒத்துழைப்பை உருவாக்கும் நோக்கம் இருப்பதாக நிறுவன தரப்பில் தெரிவிக்கப்பட்டுள்ளது.

இந்த விவகாரத்தில் முக்கியமாக கவனிக்கப்படுவது Powerus நிறுவனத்தில் டிரம்பின் மகன்களுக்கு உள்ள முதலீட்டு தொடர்பு ஆகும். அமெரிக்க ஒழுங்குமுறை ஆவணங்களின்படி, டொனால்டு டிரம்ப் ஜூனியர் மற்றும் எரிக் டிரம்ப் American Ventures என்ற முதலீட்டு நிறுவனத்தின் மூலம் Powerus-ல் முதலீடு செய்துள்ளனர்.

எனினும், அவர்கள் நிறுவனத்தின் அன்றாட நிர்வாகத்திலோ, ஒப்பந்த பேச்சுவார்த்தைகளிலோ தங்களுக்கு எந்த பங்கும் இல்லை என்றும், தாங்கள் செயல்பாட்டில் ஈடுபடாத முதலீட்டாளர்கள் என்றும் கூறியுள்ளனர்.

இந்தியாவுக்கும் பாகிஸ்தானுக்கும் ஒரே அமெரிக்க நிறுவனம் பாதுகாப்பு தொழில்நுட்பம் தொடர்பான ஒப்பந்தங்களை மேற்கொண்டிருப்பது, பிராந்திய பாதுகாப்பு கோணத்தில் கவனத்தை பெற்றுள்ளது. அதேநேரத்தில், இதை உடனடி ராணுவ அச்சுறுத்தலாக கருதுவதற்கு தேவையான முழுமையான தகவல்கள் தற்போது பொதுவெளியில் இல்லை.

இந்தியாவுக்கான ஒப்பந்தம் மற்றும் பாகிஸ்தானுக்கான ஒப்பந்தத்தின் தன்மை வேறுபட்டதாக இருக்கக்கூடும் என்பதால், அதன் முழு விவரங்கள் வெளியாகும் வரை கண்காணிப்பு முக்கியமாக பார்க்கப்படுகிறது.

இதையும் படிங்க: பாகிஸ்தானுக்கு அமெரிக்க ட்ரோன்கள்! டிரம்ப் குடும்பத்துடன் தொடர்புடைய நிறுவனத்துக்கு ஆர்டர்!