தேர்தலில் போட்டியில்லை! அதிமுக கூட்டணியில் நிபந்தனையற்ற ஆதரவை அறிவித்தார் டிடிவி தினகரன்!

வரும் ஏப்ரல் 23-ஆம் தேதி நடைபெறவுள்ள தமிழகச் சட்டமன்ற தேர்தலில் தான் நேரடியாக போட்டியிட போவதில்லை என அம்மா மக்கள் முன்னேற்றக் கழகத்தின் (அமமுக) பொதுச்செயலாளர் டிடிவி தினகரன் அதிரடியாக அறிவித்துள்ளார். தேனியில் இன்று செய்தியாளர்களைச் சந்தித்த அவர், அதிமுக தலைமையிலான தேசிய ஜனநாயகக் கூட்டணியில் (NDA) தனது கட்சி எவ்வித நிபந்தனையுமின்றி இணைந்துள்ளதாகத் தெரிவித்தார்.

வரும் சட்டமன்றத் தேர்தலில் நான் வேட்பாளராகப் போட்டியிடப் போவதில்லை. மாறாக, எனது கட்சியின் நிர்வாகிகள் மற்றும் தொண்டர்களைக் களமிறக்கி, அவர்களை வெற்றி பெறச் செய்வதே எனது இலக்கு என அவர் தெளிவுபடுத்தினார். கடந்த 2021 தேர்தலில் கோவில்பட்டி தொகுதியில் போட்டியிட்டுத் தோல்வியடைந்த நிலையில், இந்த முறை அவர் விலகியிருப்பது குறிப்பிடத்தக்கது.

தமிழகத்தில் அதிமுக தலைமையிலான கூட்டணியை எடப்பாடி பழனிசாமி தான் வழிநடத்துவார். இதில் எவ்விதக் குழப்பமும் இல்லை. நாங்கள் அனைவரும் ஒருங்கிணைந்து திமுக அரசை வீழ்த்தப் பாடுபடுவோம் என்று அவர் கூறினார். அதிமுகவுடன் இணைவதற்குத் தான் எவ்வித முன்நிபந்தனைகளையும் விதிக்கவில்லை என்றும், ஜெயலலிதாவின் ஆட்சியை மீண்டும் நிலைநாட்ட வேண்டும் என்ற ஒரே நோக்கத்தில் பழைய கசப்புகளை மறந்து தற்போது ஒன்றுபட்டுள்ளதாகவும் அவர் தெரிவித்தார்.

இதையும் படிங்க: தூத்துக்குடியில் தேர்தல் பறக்கும் படை அதிரடி! தவெக-வினர் வைத்திருந்த பரிசு பொருட்கள் பறிமுதல்!

தமிழக வெற்றிக் கழகத்தின் தலைவர் விஜய் குறித்துப் பேசிய அவர், மூன்று தசாப்தங்களாகத் தமிழகத்தை ஆண்ட பாரம்பரியம் கொண்ட கட்சி அதிமுக. மக்களிடம் செல்வாக்குப் பெற்றுள்ள அத்தகைய கட்சிகள் குறித்துக் கருத்துச் சொல்லும்போது விஜய் பொறுப்புடன் இருக்க வேண்டும் என அறிவுறுத்தினார்.

தேர்தல் தேதி அறிவிக்கப்பட்ட பிறகு, அதிமுக - அமமுக இடையேயான இந்த முழுமையான மறு-இணைப்பு  மற்றும் தினகரனின் தேர்தல் விலகல் முடிவு, தென் தமிழக அரசியல் களத்தில் அதிமுகவிற்குப் பெரும் பலமாக அமையும் எனக் கருதப்படுகிறது.

இதையும் படிங்க: விஜய்யின் 25 நாள் தேர்தல் ஸ்கெட்ச்! பட்டினப்பாக்கம் இல்லத்தில் தவெக நிர்வாகிகள் ஆலோசனை!