இடைத்தேர்தல் களத்தில் வேட்பாளர்களுக்கு எதிர்ப்பு! விஜய்யின் அடுத்த மாஸ்டர் ப்ளான்?! தவெக புதிய வியூகம்!

சென்னை: தாராபுரம், மதுராந்தகம் சட்டப்பேரவை இடைத்தேர்தலில் ஒரு லட்சம் ஓட்டுகள் வித்தியாசத்தில் வெற்றி பெற வேண்டும் என்ற இலக்குடன் த.வெ.க. தீவிர பிரசாரத்தில் ஈடுபட்டு வரும் நிலையில், வேட்பாளர்களுக்கு எதிர்ப்பு எழுவதாக வெளியாகியுள்ள தகவல் அரசியல் வட்டாரத்தில் பரபரப்பை ஏற்படுத்தியுள்ளது.

இதையடுத்து, பிரசார அணுகுமுறையில் சில மாற்றங்களை கட்சி தலைமை மேற்கொண்டுள்ளதாக தகவல் வெளியாகியுள்ளது.

அ.தி.மு.க. சார்பில் கடந்த சட்டப்பேரவைத் தேர்தலில் மதுராந்தகம் தொகுதியில் மரகதம் குமரவேலும், தாராபுரம் தொகுதியில் சத்யபாமாவும் வெற்றி பெற்றனர். பின்னர் இருவரும் எம்.எல்.ஏ. பதவியை ராஜினாமா செய்து த.வெ.க.வில் இணைந்தனர்.

இதையும் படிங்க: தாராபுரம், மதுராந்தகம் இடைத்தேர்தல்! சோஷியல் மீடியாவை உன்னிப்பாக கண்காணிக்கும் அதிகாரிகள்!

இதனால் காலியான இரு தொகுதிகளுக்கும் அக்டோபர் 6-ம் தேதி இடைத்தேர்தல் நடைபெறுகிறது. இரு தொகுதிகளிலும் த.வெ.க. சார்பில் முன்னாள் அ.தி.மு.க. எம்.எல்.ஏ.க்களான மரகதம் குமரவேல், சத்யபாமா ஆகியோர் போட்டியிடுகின்றனர்.

இந்த தேர்தல் பலமுனைப் போட்டியாக அமைந்துள்ள நிலையில், த.வெ.க. சார்பில் இரு தொகுதிகளிலும் மிகப்பெரிய வாக்கு வித்தியாசத்தில் வெற்றி பெறுவதற்கான இலக்கு நிர்ணயிக்கப்பட்டுள்ளதாக கட்சி வட்டாரங்கள் தெரிவித்ததாக செய்தி வெளியாகியுள்ளது. முதலமைச்சரும், த.வெ.க. தலைவருமான விஜய் ஏற்கனவே இரு தொகுதிகளிலும் பிரசாரம் மேற்கொண்டுள்ளார்.

இதற்கிடையே, கடந்த தேர்தலில் அ.தி.மு.க. சார்பில் வெற்றி பெற்றுவிட்டு பதவியை ராஜினாமா செய்து த.வெ.க. சார்பில் மீண்டும் போட்டியிடுவது குறித்து வேட்பாளர்களிடம் சில வாக்காளர்கள் கேள்வி எழுப்புவதாகவும், சில பகுதிகளில் பிரசாரத்தின்போது எதிர்ப்பு ஏற்பட்டதாகவும் தகவல்கள் வெளியாகியுள்ளன.

தாராபுரத்தில் த.வெ.க. வேட்பாளர் சத்யபாமாவின் பிரசார வாகனத்தை அ.தி.மு.க.வினர் வழிமறித்ததைத் தொடர்ந்து இரு தரப்பினரிடையே மோதல் ஏற்பட்டதாகவும் செய்தி வெளியாகியுள்ளது.

இந்த சூழ்நிலையில், த.வெ.க. வேட்பாளர்கள் தனியாக பிரசாரம் செய்வதை தவிர்த்து, அமைச்சர்கள் மற்றும் கட்சியின் முக்கிய நிர்வாகிகள் பங்கேற்கும் நிகழ்ச்சிகளில் இணைந்து பிரசாரம் செய்ய வேண்டும் என அறிவுறுத்தப்பட்டுள்ளதாக கட்சி வட்டாரங்களை மேற்கோள் காட்டி தகவல்கள் தெரிவிக்கின்றன.

அதேபோல், எதிர்ப்பு அதிகமாக இருப்பதாக கருதப்படும் பகுதிகளில் நேரடி பிரசாரத்தை தவிர்ப்பது குறித்தும் ஆலோசனை வழங்கப்பட்டுள்ளதாக கூறப்படுகிறது.

எனினும், வேட்பாளர்களுக்கு எதிர்ப்பு இருப்பதாக கூறப்படும் தகவல்களுக்கு த.வெ.க. தரப்பில் அதிகாரப்பூர்வமாக விரிவான விளக்கம் வெளியாகவில்லை. இடைத்தேர்தல் பிரசாரம் அக்டோபர் 4-ம் தேதி மாலையுடன் நிறைவடைய உள்ள நிலையில், மீதமுள்ள நாட்களில் கட்சிகள் தீவிர வாக்கு சேகரிப்பில் ஈடுபட உள்ளன.

தாராபுரம், மதுராந்தகம் ஆகிய இரு தொகுதிகளும் த.வெ.க. ஆட்சி அமைத்த பிறகு எதிர்கொள்ளும் முக்கியமான இடைத்தேர்தல்களாக பார்க்கப்படுவதால், இந்த தேர்தல் முடிவுகள் அரசியல் கட்சிகளின் கவனத்தை ஈர்த்துள்ளன.

இதையும் படிங்க: மின் கணக்கீட்டில் குளறுபடியாகதா..? என்ன CM இது.? சீமான் கண்டனம்.!!