தவெக கவுன்சிலர் மீது தண்ணீர் பாட்டில் வீச்சு... விசிலடித்ததால் கடுப்பான உறுப்பினர்கள்..! நெல்லை மாமன்ற கூட்டத்தில் பரபரப்பு.!

நெல்லை மாநகராட்சி சாதாரண கூட்டம் நடைபெற்றுக் கொண்டிருந்தபோது ஏற்பட்ட ஒரு சம்பவம் அங்குள்ள அரசியல் வட்டாரங்களில் பெரும் பரபரப்பை உருவாக்கியுள்ளது. திமுகவில் இருந்து சமீபத்தில் தமிழக வெற்றிக் கழகத்திற்கு மாறிய 19-வது வார்டு கவுன்சிலர் அல்லா பிச்சை, கூட்டத்திற்கு வரும்போது கட்சிச் சின்னமான விசிலை ஊதிக்கொண்டே வந்ததால் அவைக்குள் பதற்றம் ஏற்பட்டது. கூட்டம் தொடங்கியபின் அல்லா பிச்சை தொடர்ந்து விசில் அடித்துக் கொண்டிருந்தார்.

மேயர் ராமகிருஷ்ணன் அவரை எச்சரித்து விசில் அடிப்பதை நிறுத்தும்படி கூறியபோதும் அவர் அதைப் பொருட்படுத்தாமல் தொடர்ந்து விசில் அடித்தார். இதனால் திமுக கவுன்சிலர்களுடன் கடுமையான வாக்குவாதம் ஏற்பட்டது. சிலர் அவருக்கு எதிராக தண்ணீர் பாட்டில் வீசியதாகவும் தகவல்கள் வெளியாகின. அவையின் அமைதியைக் குலைத்ததாகக் கூறி மேயர் ராமகிருஷ்ணன் உடனடியாக நடவடிக்கை எடுத்தார். அல்லா பிச்சையை அடுத்த இரண்டு மாநகராட்சி கூட்டங்களில் (செப்டம்பர் மற்றும் அக்டோபர் மாதக் கூட்டங்கள்) பங்கேற்கத் தடை விதித்து உத்தரவு பிறப்பித்தார்.

அதாவது அவரை இரண்டு கூட்டங்களுக்கு சஸ்பெண்ட் செய்துள்ளார்.அல்லா பிச்சை இதற்கு முன்பு திமுகவில் இருந்தவர். சமீபத்தில் தவெகவில் இணைந்த பிறகு இதுபோன்ற செயல்பாடுகளால் கவனத்தை ஈர்த்துள்ளார். நெல்லை மாநகராட்சியில் இதுபோன்ற சம்பவங்கள் அவ்வப்போது நடந்தாலும், விசில் அடித்துக் கொண்டே கூட்டத்திற்கு வருவதும், மேயரின் எச்சரிக்கையை மீறி தொடர்வதும் அசாதாரணமானதாகக் கருதப்படுகிறது.

இதையும் படிங்க: தனியாக வசிக்கும் பெண்களே குறி... வீடு புகுந்து ஆபாச படமெடுத்து ரசித்த ‘சைக்கோ’... சிக்கியது எப்படி?

இந்த சம்பவம் உள்ளூர் அரசியலில் பல்வேறு விமர்சனங்களை எழுப்பியுள்ளது. ஒருபுறம் கட்சி மாற்றத்திற்குப் பிறகு புதிய அடையாளத்தைக் காட்டும் முயற்சியாக சிலர் பார்க்கிறார்கள். மறுபுறம் அவையின் ஒழுங்கை மீறிய செயலாகக் கருதி மேயரின் நடவடிக்கையை ஆதரிப்பவர்களும் உள்ளனர். எப்படியிருந்தாலும், இந்த சம்பவம் நெல்லை மாநகராட்சி கூட்டங்களில் அரசியல் பதற்றத்தை மீண்டும் வெளிச்சத்திற்குக் கொண்டு வந்துள்ளது. 

இதையும் படிங்க: பள்ளியில் தலைதூக்கும் சாதிய மோதல்... சாதி பெயரை சொல்லி திட்டி +2 மாணவனை கட்டையால் தாக்கிய சக மாணவர்...!