'கங்கை நதி நம் வீட்டு வாசலுக்கு வந்து விட்டது'.. உ.பி அமைச்சரின் சர்ச்சை கருத்து..! கொதித்தெழுந்த மக்கள்..!!

உத்தரப் பிரதேசத்தில் கடந்த சில நாட்களாகப் பெய்து வரும் கனமழையால் பல மாவட்டங்களில் கடுமையான வெள்ளப் பாதிப்பு ஏற்பட்டுள்ளது. பிரயாக்ராஜ், அயோத்தி, சித்ரகூட் உள்ளிட்ட பகுதிகளில் கங்கை, யமுனை, மந்தாகினி, சரயு ஆறுகள் ஆபத்து அளவைத் தாண்டி பாய்ந்து, குடியிருப்புப் பகுதிகளில் வெள்ளம் புகுந்துள்ளது. இதனால், ஆயிரக்கணக்கான மக்களின் இயல்பு வாழ்க்கை பாதிக்கப்பட்டுள்ளது. குறிப்பாக, பிரயாக்ராஜின் கரேலா பாக் மற்றும் ஜல்வான்புரா பகுதிகளில் முழங்கால் அளவு தண்ணீர் தேங்கியுள்ளது.

அயோத்தியில் சரயு ஆற்றின் வெள்ளப்பெருக்கு காரணமாக தாழ்வான பகுதிகளில் உள்ள வீடுகள் மற்றும் வயல்களை தண்ணீர் சூழ்ந்துள்ளது. சித்ரகூட்டில் யமுனை மற்றும் மந்தாகினி ஆறுகளின் நீர்மட்டம் உயர்ந்ததால், மக்கள் பாதுகாப்பான இடங்களுக்கு மாற்றப்பட்டுள்ளனர். மீட்பு மற்றும் நிவாரணப் பணிகளை மாநில அரசு தீவிரப்படுத்தியுள்ளது. முகாம்களில் தங்கவைக்கப்பட்ட மக்களுக்கு உணவு, குடிநீர் மற்றும் மருத்துவ உதவிகள் வழங்கப்படுகின்றன. 

இதையும் படிங்க: 5 வருஷம்.. 33 வெளிநாட்டு பயணம்.. மலைக்க வைக்கும் பிரதமர் மோடியின் செலவு கணக்கு!

இந்திய வானிலை ஆய்வு மையத்தின் தகவலின்படி, ஆகஸ்ட் 3 முதல் 5 வரை உத்தரப் பிரதேசத்தில் கனமழை தொடரும் என எச்சரிக்கப்பட்டிருந்தது. இதனால், பள்ளிகளுக்கு விடுமுறை அறிவிக்கப்பட்டு, பொதுமக்களுக்கு எச்சரிக்கை விடுக்கப்பட்டுள்ளது. வெள்ளம் காரணமாக போக்குவரத்து மற்றும் மின்சார விநியோகமும் பாதிக்கப்பட்டுள்ளன. மாநில அரசு, தேசிய பேரிடர் மீட்பு படையுடன் இணைந்து மீட்பு நடவடிக்கைகளை மேற்கொண்டு வருகிறது. பாதிக்கப்பட்ட மக்களுக்கு உரிய இழப்பீடு வழங்கப்படும் என அரசு உறுதியளித்துள்ளது.

இந்நிலையில் உத்தரப் பிரதேச அமைச்சர் சஞ்சய் நிஷாத், கான்பூர் தேஹத் பகுதியில் ஏற்பட்ட வெள்ளத்தால் பாதிக்கப்பட்ட மக்களைச் சந்தித்தபோது, "நம்மை சுத்தம் செய்வதற்காக கங்கை நதி நம் வீட்டு வாசலுக்கு வந்து விட்டது, கங்கை உங்கள் கால்களைத் தொட்டு அழைக்கிறது, இது உங்களை நேரடியாக சொர்க்கத்திற்கு அழைத்துச் செல்லும்" என்று கூறிய கருத்து பெரும் சர்ச்சையை ஏற்படுத்தியுள்ளது. இந்தக் கருத்து, வெள்ளத்தால் வீடுகளை இழந்து, வாழ்வாதாரத்தைப் பறிகொடுத்து தவிக்கும் மக்களின் உணர்வுகளைப் புண்படுத்தியதாகக் கருதப்படுகிறது. சமூக ஊடகங்களில் இந்தப் பேச்சு கடும் விமர்சனத்திற்கு உள்ளாகியுள்ளது, மேலும் எதிர்க்கட்சிகள் இதனை அரசின் பொறுப்பற்ற தன்மையாகக் குறிப்பிட்டு, நிஷாத்தின் பதவி விலகலை கோரியுள்ளன.

குறிப்பாக, காங்கிரஸ் கட்சி, இதற்கு எதிராக முதலமைச்சர் யோகி ஆதித்யநாத்துக்கு கடிதம் எழுதி, நிஷாத் மீது நடவடிக்கை எடுக்க வலியுறுத்தியுள்ளது. மறுபுறம், நிஷாத் தனது கருத்தை நியாயப்படுத்தி, கங்கை ஆறு நிஷாத் சமூகத்தினருக்கு புனிதமானது என்றும், அவர்கள் அதனை மதிப்பதாகவும் கூறியுள்ளார். இருப்பினும், இது பாதிக்கப்பட்ட மக்களின் கோபத்தைத் தணிக்கவில்லை. இந்த சர்ச்சை, உத்தரப் பிரதேசத்தில் பாஜக அரசுக்கு எதிரான பொதுமக்களின் அதிருப்தியை மேலும் தீவிரப்படுத்தியுள்ளது.

இதையும் படிங்க: ஆக.31ம் தேதி சீனா செல்கிறார் பிரதமர் மோடி..!! மெல்ல மெல்ல மேம்படும் இருநாட்டு உறவு..!