சந்திப்பு ரத்து செய்யப்படவில்லை! முதல்வர் விஜய்.. அமித் ஷா சந்திப்பு குறித்து மத்திய உள்துறை அமைச்சகம் விளக்கம்!

டெல்லியில் முகாமிட்டுள்ள தமிழ்நாடு முதலமைச்சர் திரு. ச. ஜோசப் விஜய், மத்திய உள்துறை அமைச்சர் அமித் ஷாவைச் சந்திக்க நேரம் கேட்கவில்லை என்றும், அமித் ஷா இவரைச் சந்திக்க மறுத்துவிட்டார் என்றும் இன்று மாலை முதலே சமூக வலைதளங்கள் மற்றும் ஊடகங்களில் தீயாகப் பரவி வந்த பரபரப்பான வதந்திகளுக்கு மத்திய உள்துறை அமைச்சகம் (MHA) தற்பொழுது அதிகாரப்பூர்வமாக முற்றுப்புள்ளி வைத்துள்ளது.

தமிழ்நாடு முதலமைச்சர் விஜய், மத்திய உள்துறை அமைச்சர் அமித் ஷாவைச் சந்திப்பதற்காக அதிகாரப்பூர்வமாக நேரம் (Appointment) கேட்டிருந்தார் என்பது முற்றிலும் உண்மையே. ஆனால், இந்தச் சந்திப்பு ஒட்டுமொத்தமாக ரத்து செய்யப்பட்டுவிட்டது என்று ஊடகங்களில் வெளியான தகவல் தவறானது. இந்தச் சந்திப்பை மத்திய அரசு எவ்விதத்திலும் ரத்து செய்யவில்லை என்று மத்திய உள்துறை அமைச்சகம் மிகத் திட்டவட்டமாக மறுப்புத் தெரிவித்து விளக்கம் அளித்துள்ளது.

மத்திய உள்துறை அமைச்சர் அமித் ஷாவுக்கு இன்று திடீரென அவசரமான மற்றும் தவிர்க்க முடியாத சில அலுவல் பணிகள் ஏற்பட்டதாலும், அவர் அவசரமாகக் குஜராத் மாநிலத்திற்குப் பயணம் மேற்கொள்ள வேண்டிய சூழல் உருவானதாலும், இன்று இந்தச் சந்திப்பிற்கான நேரம் ஒதுக்கீடு செய்யப்படவில்லை. அமித் ஷா குஜராத் செல்வதால், நாளையும் (மே 28) முதலமைச்சர் விஜய்யை அவர் நேரில் சந்திப்பதற்கான வாய்ப்புகள் தற்போதைக்கு இல்லை என்று டெல்லி வட்டாரங்கள் தெரிவிக்கின்றன. அமித் ஷா டெல்லி திரும்பியவுடன் இந்தச் சந்திப்பிற்கான புதிய தேதி மற்றும் நேரம் முறைப்படி அறிவிக்கப்படும் எனத் தெரிகிறது.

இதையும் படிங்க: பொது விநியோகத் திட்டம் இனி முழுமையாக நவீனமயமாகும்.. பிரதமர் நரேந்திர மோடி அறிவிப்பு!

இதையும் படிங்க: ரூ.258 கோடி போதைப்பொருள் கடத்தல்: சென்னை மற்றும் ராமநாதபுரத்தில் அமலாக்கத்துறை சோதனை!