சட்டம் ஒழுங்கு சீர்கேடு: முதல்வர் ஜோசப் விஜய் பதவி விலக கோரி சென்னையில் பாஜக ஆர்ப்பாட்டம்!

தமிழகத்தில் தவெக அரசு பொறுப்பேற்றது முதல் சட்டம்-ஒழுங்கு அடியோடு சீர்குலைந்து, பெண்களுக்கு எதிரான குற்றங்கள் அசுர வேகத்தில் அதிகரித்து வருவதாகக் குற்றம் சாட்டி, சென்னை எழும்பூரில் தமிழ்நாடு பாரதிய ஜனதா கட்சியின் சார்பில் இன்று (ஜூன் 18, 2026) மாபெரும் கண்டன ஆர்ப்பாட்டம் நடைபெற்றது. பாஜக மாநிலத் தலைவர் திரு. நயினார் நாகேந்திரன் தலைமையில் நடைபெற்ற இந்த எழுச்சிமிகு போராட்டத்தில், தமிழக பாஜக மேலிடப் பொறுப்பாளர் அரவிந்த் மேனன், மூத்த தலைவர் தமிழிசை சௌந்தரராஜன், தேசிய சிறுபான்மை அணிச் செயலாளர் வேலூர் இப்ராகிம் மற்றும் சென்னை மாவட்டத் தலைவர்கள், கட்சி நிர்வாகிகள், பொதுமக்கள் எனப் பல்லாயிரக்கணக்கானோர் திரண்டனர். போராட்டத்தில் பங்கேற்றவர்கள் தவெக அரசுக்கு எதிராகக் கண்டன பதாகைகளை ஏந்தியும், வாயில் கருப்புத் துணி கட்டியும் தங்களது கடுமையான எதிர்ப்பைப் பதிவு செய்து கோஷங்களை எழுப்பினர்.

ஆர்ப்பாட்ட மேடையில் தவெக அரசையும், முதலமைச்சர் ஜோசப் விஜய் அவர்களையும் கடுமையாகச் சாடிப் பேசிய மாநிலத் தலைவர் நயினார் நாகேந்திரன், "இந்த மாபெரும் போராட்டம் அரசியல் காரணங்களுக்காக நடத்தப்பட்டது அல்ல; தமிழ்நாட்டுப் பெண்களின் பாதுகாப்பை உறுதிப்படுத்துவதற்காக நடத்தப்படுகிறது. கும்மிடிப்பூண்டியில் பச்சிளம் குழந்தை சித்திரவதைப்பட்டுக் கொல்லப்பட்டதற்கும், கோவை அருகே 10 வயதுச் சிறுமி பாலியல் வன்கொடுமை செய்யப்பட்டதற்கும் தடையின்றிப் புழங்கும் கஞ்சா மற்றும் போதைப்பொருட்களே முதன்மைக் காரணம். தவெக ஆட்சியில் பெண்கள் உடல் ரீதியாகவும் மன ரீதியாகவும் வேட்டையாடப்படுகிறார்கள். ஆனால், முதலமைச்சர் தூக்கத்தில் இருந்து இன்னும் எழுந்திருக்கவில்லை. அவர் சினிமா பிரபலங்களையும், நடிகைகளையும், தயாரிப்பாளர்களையும் சந்தித்துப் புகைப்படம் எடுப்பதில் காட்டும் ஆர்வத்தைப் பாலியல் வன்கொடுமையால் பாதிக்கப்பட்ட ஏழை எளிய சாமானிய மக்களை நேரில் சந்தித்து ஆறுதல் கூறுவதில் காட்டுவதே இல்லை என்று மிகக் காரசாரமாகக் குற்றம் சாட்டினார்.

இன்று தொடங்கிய சட்டமன்றக் கூட்டத்தொடர் குறித்துப் பேசிய அவர், தவெக ஆட்சிப் பொறுப்பேற்ற இந்த 35 நாட்களில் 200-க்கும் மேற்பட்ட கொடூரக் குற்றங்கள் நடந்துள்ளன. ஆனால், இன்று சட்டப்பேரவையில் வாசிக்கப்பட்ட ஆளுநர் உரையில் இந்தச் சட்டம்-ஒழுங்கு சீர்கேடுகள் குறித்து ஒரு வார்த்தை கூடக் குறிப்பிடப்படவில்லை. ஆளுநர் உரையில் குறிப்பிட்டால் அது அவைக் குறிப்பில் ஏறி தங்களுக்குக் களங்கத்தை ஏற்படுத்தும் என்பதால், திட்டமிட்டு மறைத்துள்ளனர். ஆட்சிக்கு வருவதற்கு முன்பே காமராஜ் எனும் மாற்றுக்கட்சி எம்.எல்.ஏ-வை அழைத்துச் சென்று குதிரை பேரம் நடத்தியது குறித்து முறையான விசாரணை நடத்தப்பட வேண்டும். அடுத்த 6 மாதங்களில் 6 தொகுதிகளில் இடைத்தேர்தல் வரக் காரணமே இவர்களின் குதிரை பேர அரசியல்தான். தேர்தல் பிரச்சாரத்தின் போது எதற்கெடுத்தாலும் 'ப்ரோ', 'ப்ரோ' என்று பாசமாகப் பேசிய முதலமைச்சர், இப்போது பெண்கள் சீரழிக்கப்படும்போது மட்டும் மௌனம் காப்பது ஏன்? என்று கேள்வி எழுப்பினார்.

இதையும் படிங்க: தவெக குதிரை பேரத்தில் ஈடுபடுவதாக புகார்.. சிபிஐ விசாரணை கோரிய நயினார் நாகேந்திரன்!

கடந்த திமுக அரசுக்கும் தற்போதைய தவெக அரசுக்கும் எவ்வித வித்தியாசமும் இல்லை என்று சாடிய நயினார் நாகேந்திரன், பெண்களுக்குப் பாதுகாப்பு வழங்கத் தவெக அரசால் கொண்டு வரப்பட்ட 'சிங்கப் பெண் படை' முற்றிலும் பெயரளவிலேயே இருக்கிறது. சிறுபான்மையினருக்கான அரசு என்று மார்தட்டிக் கொள்ளும் இந்த ஆட்சியில் மதப் போதகர்களே பாலியல் குற்றங்களில் ஈடுபடுகிறார்கள். தவெக பிரமுகர்களின் அராஜகம் நாளுக்கு நாள் அதிகரித்து வருகிறது. இந்த அவலங்களை இரும்புக்கரம் கொண்டு ஒடுக்காவிடில், முதலமைச்சர் ஜோசப் விஜய் உடனடியாகத் தனது பதவியை ராஜினாமா செய்ய வேண்டும். இந்த ஆர்ப்பாட்டம் தவெக அரசுக்கான ஒரு முன்னுரைதான்; எங்களை முடிவுரை எழுத வைத்துவிடாதீர்கள் என்று மிகக் கடுமையான எச்சரிக்கையை விடுத்தார். மேலும், பாஜக ஒரு சித்தாந்த இயக்கம் என்றும், கட்சியை விட்டுச் சென்றவர்கள் தற்பொழுது மீண்டும் தாய்வீடு திரும்பி வருவதாகவும், கட்சியை வலுப்படுத்தத் தொடர்ந்து மக்கள் நலப் போராட்டங்கள் தீவிரமாக முன்னெடுக்கப்படும் என்றும் தனது உரையில் நயினார் நாகேந்திரன் சுறுசுறுப்பாகக் குறிப்பிட்டு முடித்தார்.

இதையும் படிங்க: "சிங்கப்பெண் படைக்கே பாதுகாப்பு படை தேவை: தமிழக சட்டம்-ஒழுங்கு குறித்துப் பொன். ராதாகிருஷ்ணன் விமர்சனம்!