ஜம்மு காஷ்மீரில் பயங்கரவாதிகள் மறைவிடம்! கண்டுபிடித்து அழித்த ராணுவம்! ஜெய்ஷ்-இ-முகமது சேர்ந்தவன் கைது!

ஜம்மு காஷ்மீரின் புல்வாமா மாவட்டத்தில் ஜெய்ஷ்-இ-முகமது பயங்கரவாதிகளுக்கு உதவி செய்து வந்த உள்ளூர் நபரை இந்திய ராணுவமும் போலீசும் கைது செய்து, பழத்தோட்டத்தில் பதுக்கி வைக்கப்பட்டிருந்த ரகசிய பதுங்குகுழியை கண்டுபிடித்து அழித்தனர். இதில் இரண்டு கையெறி குண்டுகள், பெரும் அளவு வெடிமருந்துகள், ஆயுதங்கள் உள்ளிட்டவை பறிமுதல் செய்யப்பட்டன.

புல்வாமா மாவட்டம் அவந்திபோரா பகுதியில் உள்ள நானேர் மிதூரா கிராமத்தில் பயங்கரவாதிகள் நடமாட்டம் இருப்பதாக ரகசிய தகவல் கிடைத்தது. இதையடுத்து, அவந்திபோரா போலீசார், 42 ராஷ்டிரிய ரைபிள்ஸ் படைப்பிரிவு மற்றும் 180 பட்டாலியன் சிஆர்பிஎஃப் படையினர் இணைந்து கூட்டுத் தேடுதல் வேட்டை நடத்தினர். இதில், ஜெய்ஷ்-இ-முகமது அமைப்புக்கு தொடர்ந்து உதவி செய்து வந்த நஷிர் அகமது கனாய் என்பவரை கைது செய்தனர்.

நஷிரிடம் நடத்தப்பட்ட தீவிர விசாரணையில், தனக்கு சொந்தமான பழத்தோட்டத்தில் பயங்கரவாதிகளுக்காக ரகசிய பதுங்குகுழி அமைத்துக் கொடுத்தது தெரியவந்தது. உடனடியாக அந்த இடத்திற்கு சென்ற பாதுகாப்புப் படையினர், அங்கு பதுக்கி வைக்கப்பட்டிருந்த இரண்டு கையெறி குண்டுகள், பெரும் அளவிலான வெடிமருந்துகள், ஆயுதங்கள் உள்ளிட்டவற்றை பறிமுதல் செய்தனர். பின்னர் மாஜிஸ்திரேட் முன்னிலையில் அந்த ரகசிய பதுங்குகுழியை முழுவதுமாக தகர்த்து அழித்தனர்.

இதையும் படிங்க: ஆப்ரேஷன் பிம்பிள்!! காஷ்மீரில் மீண்டும் ஊடுருவல் முயற்சி!! 2 பயங்கரவாதிகளை வேட்டையாடியது இந்திய ராணுவம்!

விசாரணையில் நஷிர் அகமது கனாய், ஜெய்ஷ்-இ-முகமது பயங்கரவாதிகளுக்கு பொருளாதார உதவியும், ஆயுதங்கள் மற்றும் வெடிமருந்துகளை கடத்துவதற்கும் தொடர்ந்து உதவி செய்து வந்தது உறுதியானது. இதையடுத்து அவர் மீது யுஏபிஏ (UAPA) சட்டத்தின் கீழ் வழக்குப் பதிவு செய்யப்பட்டு தீவிர விசாரணை நடைபெற்று வருகிறது.

கடந்த சில மாதங்களாக ஜம்மு காஷ்மீரில் பயங்கரவாதிகளுக்கு உதவி செய்யும் உள்ளூர் நபர்கள் மீது பாதுகாப்புப் படையினர் தீவிர கண்காணிப்பு நடத்தி வருகின்றனர். இதன் தொடர்ச்சியாகவே இந்த பெரிய வெற்றி கிடைத்துள்ளது. இதனால் புல்வாமா மாவட்டத்தில் பயங்கரவாதிகளின் செயல்பாடுகளுக்கு பெரும் பின்னடைவு ஏற்பட்டுள்ளதாக ராணுவ வட்டாரங்கள் தெரிவிக்கின்றன.

இதையும் படிங்க: ஆப்ரேஷன் பிம்பிள்!! காஷ்மீரில் மீண்டும் ஊடுருவல் முயற்சி!! 2 பயங்கரவாதிகளை வேட்டையாடியது இந்திய ராணுவம்!