கவின் ஆணவக் கொலையில் குற்றப்பத்திரிகை ரத்து..! தவறான முன் உதாரணம்... திருமா. எதிர்ப்பு..!!

கவின் ஆணவக் கொலை வழக்கில் திடீர் திருப்பம் ஏற்பட்டுள்ளது. நெல்லை கவின் ஆணவ படுகொலை வழக்கில் சுர்ஜித் பெற்றோர் மீதான குற்றப்பத்திரிகை ரத்து செய்யப்பட்டுள்ளது. சுர்ஜித்தின் தந்தை சரவணன் மற்றும் தாய் கிருஷ்ண குமாரி ஆகியோர் மீதான குற்றப்பத்திரிகையை ரத்து செய்துள்ளனர். இருவரும் தாக்கல் செய்த மனுவை விசாரித்த உயர் நீதிமன்ற மதுரை கிளை இந்த உத்தரவை பிறப்பித்திருக்கிறது. ஜெயபால் என்பவர் மீதான குற்றப்பத்திரிகையை ரத்து செய்ய நீதிமன்றம் மறுப்பு தெரிவித்துவிட்டது.

விடுதலைச் சிறுத்தைகள் கட்சியின் தலைவர் திருமாவளவன் நெல்லை கவின் கொலை வழக்கில் குற்றம் சாட்டப்பட்ட சுர்ஜித்தின் பெற்றோரான சரவணன் மற்றும் கிருஷ்ணகுமாரி ஆகியோர் மீதான குற்றச்சாற்று அறிக்கையை மதுரை உயர்நீதிமன்றம் ரத்து செய்திருப்பது குறித்து தனது கருத்தைத் தெரிவித்துள்ளார். இது அதிர்ச்சியளிக்கும் நடவடிக்கை என அவர் குறிப்பிட்டுள்ளார்.

விசாரணைக்குப் பின்னர் ஆதாரங்கள் இல்லையென விடுதலை செய்வதுதான் நீதிமன்றத்துக்குள்ள அதிகாரம் என்றும், குற்ற விசாரணை தொடங்குவதற்கு முன்னரே குற்ற அறிக்கையை ரத்து செய்வது தவறான முன்மாதிரியாக அமையும் என்றும் திருமாவளவன் தெரிவித்தார். கவின் கொலை வழக்கில் கைது செய்யப்பட்ட சரவணன் பிணையில் வெளியே வந்ததும், இன்னொரு கொலை வழக்கில் கூலிப்படையினரோடு தொடர்பிருப்பதாக மீண்டும் கைது செய்யப்பட்டிருப்பவர் என்பதை அவர் குறிப்பிட்டார்.

இதையும் படிங்க: கவின் ஆணவக் கொலை வழக்கில் திடீர் திருப்பம்... சுர்ஜித் பெற்றோர் மீதான குற்றப்பத்திரிகை ரத்து..! கோர்ட் அதிரடி உத்தரவு..!

இத்தகைய பின்னணி கொண்ட ஒருவரையும் அவரது மனைவியையும் குற்றமற்றவர்கள் என்கிற தோற்றத்தை உருவாக்கும் வகையில் உயர்நீதிமன்ற நடவடிக்கை அமைந்துள்ளதாக திருமாவளவன் கருத்து தெரிவித்தார். தமிழ்நாடு அரசு இதனை எதிர்த்து மேல்முறையீடு செய்திட ஆவன செய்ய வேண்டும் என விடுதலைச் சிறுத்தைகள் கட்சியின் சார்பில் அவர் வலியுறுத்தினார்.

இதையும் படிங்க: "மூளையை சிதறவிடுவோம்"..! கோர்ட் வாசலில் சபதம்... ஐஸ் ஹவுஸ் அஜித் கொலையின் அதிர்ச்சி பின்னணி..!