இந்தியாவுக்கு எதிராக தொடர்ந்து செயல்பட்டால்..!! புவியியல் வரலாற்றில் பாக்., இருக்கவே இருக்காது! ராணுவ தளபதி வார்னிங்!

டெல்லி: இந்தியாவுக்கு எதிராக பயங்கரவாதிகளை தொடர்ந்து ஊக்குவித்தால், பாகிஸ்தான் புவியியல் மற்றும் வரலாற்றின் ஒரு அங்கமாக தொடர்ந்து இருக்க வேண்டுமா அல்லது வேண்டாமா என்பதை அந்த நாடே முடிவு செய்ய வேண்டும் என இந்திய ராணுவத் தளபதி ஜெனரல் உபேந்திர திவேதி கடும் எச்சரிக்கை விடுத்துள்ளார்.

டெல்லியில் உள்ள மானேக்ஷா மையத்தில் நடைபெற்ற ஒரு முக்கிய கலந்துரையாடல் நிகழ்ச்சியில் ராணுவத் தளபதி பங்கேற்றார். அப்போது, ஆப்பரேஷன் சிந்தூர் தொடங்க காரணமான சூழ்நிலை மீண்டும் உருவானால் இந்திய ராணுவம் எப்படி நடவடிக்கை எடுக்கும் என கேள்வி எழுப்பப்பட்டது. 

இதற்கு பதிலளித்த ராணுவத் தளபதி உபேந்திர திவேதி, “இதற்கான பதிலை நான் ஏற்கனவே தெளிவாகக் கூறியுள்ளேன். பாகிஸ்தான் தொடர்ந்து பயங்கரவாதிகளை உருவாக்கி இந்தியாவுக்கு எதிராகப் பயன்படுத்தினால், அது புவியியல் மற்றும் வரலாற்றின் ஒரு அங்கமாக இருக்க வேண்டுமா அல்லது இல்லையா என்பதை அந்த நாடே தீர்மானிக்க வேண்டும்” எனக் கூறினார்.

இதையும் படிங்க: இந்தியாவுக்கு எதிரான எந்த ஒரு செயலுக்கும் பதிலடி உறுதி!! எப்போதும் நீதி நிலைநாட்டப்படும்! இந்திய ராணுவம் எச்சரிக்கை!!

ராணுவத் தளபதியின் இந்த எச்சரிக்கை இந்திய-பாகிஸ்தான் உறவுகளின் தற்போதைய பதற்றமான நிலையில் மிகுந்த முக்கியத்துவம் பெறுகிறது. பாகிஸ்தான் தீவிரவாத அமைப்புகளுக்கு தொடர்ந்து ஆதரவு அளித்து வருவதாக இந்தியா மீண்டும் மீண்டும் குற்றஞ்சாட்டி வரும் நிலையில், ராணுவத் தளபதியின் இந்தக் கருத்து இந்தியாவின் உறுதியான நிலைப்பாட்டை வெளிப்படுத்துவதாகக் கருதப்படுகிறது.

இந்திய ராணுவம் எல்லைப் பாதுகாப்பு மற்றும் நாட்டின் இறையாண்மையை பாதுகாக்க எந்த அளவுக்கு உறுதியுடன் இருக்கிறது என்பதை இந்தப் பேச்சு தெளிவாகக் காட்டுகிறது. குறிப்பாக, ஆப்பரேஷன் சிந்தூர் போன்ற துணிச்சலான நடவடிக்கைகளை மீண்டும் எடுக்கத் தயங்காது என்பதையும் அவர் மறைமுகமாக உணர்த்தியுள்ளார்.

பாகிஸ்தான் தரப்பில் இருந்து இதுவரை எந்தப் பதிலும் வராத நிலையில், ராணுவத் தளபதியின் இந்த அறிக்கை தேசிய பாதுகாப்பு விவாதங்களில் முக்கிய இடம் பிடித்துள்ளது. இந்தியா எப்போதும் அமைதியை விரும்பினாலும், தீவிரவாதத்துக்கு எதிராக எந்த நேரத்திலும் உறுதியான நடவடிக்கை எடுக்கும் என்பதை இந்த எச்சரிக்கை மீண்டும் உறுதிப்படுத்தியுள்ளது.

இதையும் படிங்க: இந்தியா எதையும் மறக்காது!! பஹல்காம் தாக்குதல் முதலாம் ஆண்டு நினைவு தினம்! இந்திய ராணுவம் பதில்!