பெண்ணின் மார்பை கசக்குவதோ! ஆடையை அவிழ்ப்பதோ கற்பழிப்பு முயற்சி ஆகாது! பாட்னா உயர் நீதிமன்ற தீர்ப்பால் சர்ச்சை!

பெண்ணின் மார்பைப் பிடித்து அழுத்துவதும், அவர் அணிந்திருந்த கீழ் ஆடையை அகற்ற முயற்சிப்பதும் மட்டும் சட்டப்படி கற்பழிப்பு முயற்சியாகக் கருத முடியாது என்று பாட்னா உயர் நீதிமன்றம் அளித்த தீர்ப்பு நாடு முழுவதும் விவாதத்தை ஏற்படுத்தியுள்ளது. இந்தச் செயல்கள் பெண்ணின் மானபங்கத்தை ஏற்படுத்தும் குற்றமாக இருந்தாலும், கற்பழிப்பு முயற்சிக்குத் தேவையான சட்ட அம்சங்கள் இந்த வழக்கில் நிரூபிக்கப்படவில்லை என்று நீதிமன்றம் தெரிவித்துள்ளது.

இந்த வழக்கு 2008-ஆம் ஆண்டைச் சேர்ந்தது. புகைப்படம் எடுக்க தனது தந்தையுடன் ஸ்டூடியோவுக்கு சென்ற இளம்பெண்ணை, புகைப்பட ஸ்டூடியோ உரிமையாளர் ஹிமான்ஷு குமார், அவரது தந்தையை வெளியே நிற்கச் சொல்லி அறைக்குள் தனியாக வைத்ததாக கூறப்படுகிறது.

பின்னர், அந்தப் பெண்ணின் ஆடைகளை கலைத்து, கீழ் ஆடையை அகற்ற முயன்றதுடன், அவரது மார்பகங்களையும் பிடித்து அழுத்தியதாக புகாரில் தெரிவிக்கப்பட்டது. இதனால் அந்தப் பெண் சத்தமிட்டதைத் தொடர்ந்து, அவரது தந்தை மற்றும் அக்கம்பக்கத்தினர் ஓடி வந்தனர். அதற்குள் குற்றம் சாட்டப்பட்டவர் அங்கிருந்து தப்பிச் சென்றதாக கூறப்பட்டது.

இதையும் படிங்க: மனைவி, குழந்தைகள் உள்பட 6 பேர் கொலை! சிறுமி பாலியல் வன்கொடுமை! போக்சோ வழக்கில் ஜாமீனில் வந்தவர் வெறிச்செயல்!

இந்த வழக்கை விசாரித்த கீழமை நீதிமன்றம், 2013-ஆம் ஆண்டு ஹிமான்ஷு குமாரை குற்றவாளி என அறிவித்து, மூன்று ஆண்டுகள் சிறைத்தண்டனை விதித்தது. இந்தத் தீர்ப்பை எதிர்த்து அவர் மேல்முறையீடு செய்தார்.

மேல்முறையீட்டு மனுவை விசாரித்த பாட்னா உயர் நீதிமன்றம், வழக்கில் பாலியல் ஊடுருவல் நடந்ததற்கான மருத்துவ ஆதாரமோ அல்லது அதற்கான உறுதியான சான்றுகளோ இல்லை என்று குறிப்பிட்டது. மேலும், கற்பழிப்பு முயற்சி என ஒரு செயலைக் கருதுவதற்கு, குற்றம் வெறும் தயாரிப்பு நிலையைக் கடந்து, அதை நிறைவேற்றும் இறுதிக்கட்டத்தை எட்டியிருப்பது தெளிவாக நிரூபிக்கப்பட வேண்டும் என்றும் நீதிமன்றம் விளக்கியது.

அதே நேரத்தில், குற்றம் சாட்டப்பட்டவரின் செயல்கள் பெண்ணின் கண்ணியத்தை பாதிக்கும் வகையிலானவை என்பதால், அவை இந்திய தண்டனைச் சட்டத்தின் பழைய பிரிவு 354-ன் கீழ் வரும் மானபங்கக் குற்றமாகவே கருதப்பட வேண்டும் என்று நீதிமன்றம் தெரிவித்தது. ஏற்கனவே அவர் அனுபவித்த சிறைவாசத்தையும் கருத்தில் கொண்டு, கற்பழிப்பு முயற்சி தொடர்பான தண்டனையை ரத்து செய்து நீதிமன்றம் உத்தரவிட்டது. இந்த தீர்ப்பு சமூக வலைதளங்களிலும், சட்ட வட்டாரங்களிலும் பரவலான விவாதத்தை ஏற்படுத்தியுள்ளது.

இதையும் படிங்க: தொழிலதிபரை மிரட்டிய கும்பல்!!! 4 பேரை என்கவுன்டரில் சுட்டுக் கொன்ற போலீசார்! ஹரியானாவில் பயங்கரம்!