லடாக்கில் ஜம்மு காஷ்மீர் ஐகோர்ட் கிளை: ஜனாதிபதி திரௌபதி முர்மு அதிகாரப்பூர்வ ஒப்புதல்!

யூனியன் பிரதேசமான லடாக் மக்களின் நீண்ட காலக் கோரிக்கையை ஏற்கும் வகையில், லடாக்கில் ஜம்மு - காஷ்மீர் உயர் நீதிமன்றத்தின் பிரத்யேகக் கிளையை (High Court Bench) அமைப்பதற்கான அதிகாரப்பூர்வ ஒப்புதலை இந்தியக் குடியரசுத் தலைவர் திரௌபதி முர்மு முறைப்படி வழங்கியுள்ளார்.

கடந்த 2019-ஆம் ஆண்டு ஜம்மு காஷ்மீர் மற்றும் லடாக் ஆகிய இரண்டு தனித்தனி யூனியன் பிரதேசங்களாகப் பிரிக்கப்பட்ட போதிலும், இரண்டு பிராந்தியங்களுக்கும் பொதுவான ஒரே உயர் நீதிமன்றமாக 'ஜம்மு காஷ்மீர் மற்றும் லடாக் உயர் நீதிமன்றம்' செயல்பட்டு வந்தது. இதன் பிரதான அமர்வுகள் ஸ்ரீநகர் மற்றும் ஜம்மு ஆகிய நகரங்களில் மட்டுமே செயல்பட்டு வந்ததால், லடாக் பகுதியைச் சேர்ந்த வழக்கறிஞர்கள் மற்றும் பொதுமக்கள் தங்களது வழக்கு விசாரணைகளுக்காகக் கடும் குளிரையும், கடுமையான நிலப்பரப்பையும் கடந்து நூற்றுக்கணக்கான கிலோமீட்டர்கள் பயணித்து ஜம்மு அல்லது ஸ்ரீநகருக்குச் செல்ல வேண்டிய பெரும் சிரமம் நிலவி வந்தது.

இந்தச் சூழலில், லடாக் பிராந்தியத்திலேயே உயர் நீதிமன்றத்தின் நிரந்தரக் கிளையை நிறுவ வேண்டும் என்று அப்பகுதி மக்கள், சட்ட வல்லுநர்கள் மற்றும் லடாக் யூனியன் பிரதேச நிர்வாகம் சார்பில் மத்திய அரசுக்குத் தொடர் கோரிக்கைகள் விடுக்கப்பட்டு வந்தன. இந்தக் கோரிக்கைகளை விரிவாகப் பரிசீலித்த உச்ச நீதிமன்ற தலைமை நீதிபதி மற்றும் மத்திய சட்ட அமைச்சகத்தின் பரிந்துரைகளை ஏற்று, லடாக்கில் உயர் நீதிமன்றக் கிளையைத் தொடங்குவதற்கான இறுதி ஒப்புதலை ஜனாதிபதி திரௌபதி முர்மு தற்போது அதிகாரப்பூர்வமாக வழங்கியுள்ளார்.

இதையும் படிங்க: "2வது சுதந்திரப் போராட்டத்துக்கு தயாராகுங்கள்".. சோனம் வாங்சுக்கின் பரபரப்பு அழைப்பு..!!

ஜனாதிபதியின் இந்த வரலாற்றுச் சிறப்புமிக்க ஒப்புதலைத் தொடர்ந்து, லடாக்கின் தலைநகரான லே பகுதியில் புதிய உயர் நீதிமன்றக் கிளை அமைப்பதற்கான உள்கட்டமைப்பு மற்றும் நிர்வாகப் பணிகள் முழுவீச்சில் முடுக்கிவிடப்பட்டுள்ளன. லடாக் மக்களின் நீதித்துறை அணுகலை மிக எளிதாக்கும் வகையிலும், விரைவான நீதி கிடைப்பதை உறுதி செய்யும் வகையிலும் எடுக்கப்பட்டுள்ள இந்த அதிரடி நடவடிக்கை அப்பகுதி மக்களிடையே பெரும் வரவேற்பையும் மகிழ்ச்சியையும் ஏற்படுத்தியுள்ளது.

இதையும் படிங்க: 370-வது பிரிவு ரத்து செய்யப்பட்டு 7 ஆண்டுகள்! ஜம்மு-காஷ்மீர், லடாக் மக்களின் மாற்றத்தை சுட்டிக்காட்டிய பிரதமர் மோடி!