மதுராந்தகம், தாராபுரம் இடைத்தேர்தல்! அதிமுக வேட்பாளர் பட்டியலை வெளியிட்டார் எடப்பாடி பழனிசாமி!

தமிழகத்தில் காலியாக உள்ள மதுராந்தகம் மற்றும் தாராபுரம் சட்டமன்றத் தொகுதிகளுக்கான இடைத்தேர்தலில் போட்டியிடும் அதிமுக அதிகாரப்பூர்வ வேட்பாளர்களை அக்கட்சியின் பொதுச்செயலாளரும், தமிழ்நாடு முன்னாள் முதலமைச்சருமான எடப்பாடி கே.பழனிசாமி அறிவித்துள்ளார். செங்கல்பட்டு கிழக்கு மாவட்டத்திற்கு உட்பட்ட மதுராந்தகம் (தனி) தொகுதிக்கு முன்னாள் எம்எல்ஏ கணிதா சம்பத்தும், திருப்பூர் புறநகர் கிழக்கு மாவட்டத்திற்கு உட்பட்ட தாராபுரம் (தனி) தொகுதிக்கு கே.பானுமதியும் வேட்பாளர்களாகக் களமிறக்கப்பட்டுள்ளனர். வரும் அக்டோபர் 6-ஆம் தேதி வாக்குப்பதிவு நடைபெறவுள்ள நிலையில், அதிமுக ஆட்சி மன்றக் குழு பரிசீலித்து எடுத்த முடிவின்படி இந்த அதிகாரப்பூர்வ அறிவிப்பு வெளியாகியுள்ளது.

மதுராந்தகம் (தனி) தொகுதிக்கு அதிமுக வேட்பாளராக அறிவிக்கப்பட்டுள்ள திருமதி கணிதா சம்பத், கட்சியின் மூத்த நிர்வாகிகளில் ஒருவராவார். இவர் அதிமுகவின் தலைமைச் செயற்குழு உறுப்பினராகவும், கழக மகளிர் அணி இணைச் செயலாளராகவும் செயல்பட்டு வருகிறார். ஏற்கனவே சட்டப்பேரவை உறுப்பினராக (Ex-MLA) மக்கள் பணியாற்றிய அனுபவம் கொண்ட இவரை, மீண்டும் தேர்தல் களத்தில் முன்னிறுத்துவதன் மூலம் தொகுதியைக் கைப்பற்ற அதிமுக தலைமை தீவிர முனைப்பு காட்டி வருகிறது.

திருப்பூர் புறநகர் கிழக்கு மாவட்டத்திற்கு உட்பட்ட தாராபுரம் (தனி) தொகுதியில் அதிமுக சார்பில் திருமதி கே.பானுமதி, பி.ஏ., போட்டியிடுகிறார். இவர் திருப்பூர் புறநகர் கிழக்கு மாவட்ட மகளிர் அணி இணைச் செயலாளராகப் பொறுப்பு வகித்து வருகிறார். மேலும், மாவட்ட ஊராட்சிக் குழுவின் 12-வது வார்டு முன்னாள் உறுப்பினராகவும் மக்கள் பணியாற்றிய அனுபவம் பெற்றவர். இரண்டு தனித் தொகுதிகளிலும் மகளிர் அணி நிர்வாகிகளையே வேட்பாளர்களாக அதிமுக தலைமை தேர்வு செய்து களமிறக்கியுள்ளது அரசியல் அரங்கில் கவனத்தை ஈர்த்துள்ளது.

இதையும் படிங்க: “வெற்றி பெற்றே ஆக வேண்டும்”..!! இடைத்தேர்தல் களத்தில் அதிமுகவின் தீவிர ஆதரவு வேட்டை!!

இதையும் படிங்க: இடைத்தேர்தலை குறிவைக்கும் அதிமுக! வேட்பாளர்களை தேர்வு செய்ய பழனிசாமி ஆலோசனை! நிர்வாகிகளுக்கு டார்கெட்!