அபிஜித் தீப்கே, நேஹா எங்கே? ரகசிய காவலில் வைப்பது மனிதாபிமானமற்ற செயல்.. மு.க.ஸ்டாலின் கண்டனம்!

ஜனநாயக ரீதியாக அமைதியான முறையில் போராடிய சி.ஜே.பி அமைப்பாளர் அபிஜித் தீப்கே மற்றும் மாணவர் அமைப்பான ஐசாவைச் (AISA) சேர்ந்த நேஹா போரா ஆகியோரைத் தடுத்து வைத்து, அவர்கள் எங்கு வைக்கப்பட்டுள்ளார்கள் என்ற தகவலைக் கூட வெளியிடாமல் மறைப்பது முற்றிலும் சட்டவிரோதமானது மற்றும் மனிதநேயமற்ற செயல் என்றும், அவர்களை மத்திய அரசு உடனடியாக விடுதலை செய்ய வேண்டும் என்றும் திமுக தலைவர் மு.க.ஸ்டாலின் கடும் கண்டனம் தெரிவித்துள்ளார்.

தலைமைத் தேர்தல் ஆணையர் ஞானேஷ் குமார் பதவி விலகக் கோரியும், வாக்காளர் பட்டியல் தீவிர திருத்தப் பணிகளில் (SIR) நடைபெற்றதாகக் கூறப்படும் முறைகேடுகளை எதிர்த்தும் டெல்லியில் போராட்டங்கள் தீவிரமடைந்துள்ளன. இந்நிலையில், தலைநகர் டெல்லியில் மூவர்ணக் கொடி ஏந்திப் பேரணி செல்ல முயன்ற முக்கிய களப் போராட்டக்காரர்களான அபிஜித் தீப்கே மற்றும் நேஹா போரா ஆகியோரை டெல்லி காவல்துறை அதிரடியாகக் காவலில் எடுத்துச் சென்றது. எனினும், அவர்கள் எங்கு அழைத்துச் செல்லப்பட்டார்கள், எந்த காவல் நிலையத்தில் வைக்கப்பட்டுள்ளார்கள் என்பது குறித்த அதிகாரப்பூர்வ விவரங்கள் வெளியாகாமல் மர்மம் நீடித்து வருகிறது.

இது தொடர்பாகத் திமுக தலைவர் மு.க.ஸ்டாலின் தனது அதிகாரப்பூர்வ எக்ஸ் தளத்தில் வெளியிட்டுள்ள கண்டனப் பதிவில் தெரிவித்திருப்பதாவது அபிஜித் தீப்கே எங்கே? நேஹா போரா எங்கே? அவர்கள் எங்கு வைக்கப்பட்டுள்ளார்கள் என்ற இருப்பிடத்தைக் கூடத் தெரிவிக்காமல் ரகசியமாகத் தடுத்து வைத்திருப்பது முற்றிலும் சட்டவிரோதமானது மற்றும் கொடூரமான மனிதாபிமானமற்ற செயலாகும்.

இதையும் படிங்க: “மூடர் கூடத்தின் ஆட்டம் விரைவில் முடிவுக்கு வரும்...” - விடிந்ததுமே விஜய்யை விளாசித் தள்ளிய ஸ்டாலின்...!

மத்திய அரசு உடனடியாக அவர்களை விடுதலை செய்ய வேண்டும். அமைதியான வழியிலான போராட்டங்களை நசுக்குவதை பாஜக அரசு உடனடியாக நிறுத்திக்கொள்ள வேண்டும். மக்கள் இயக்கங்களை ஒடுக்க நினைக்கும் ஒவ்வொரு முயற்சியும், அந்த இயக்கங்களை மேலும் மேலும் வலிமைப்படுத்துமே தவிர பலவீனப்படுத்தாது. ஞானேஷ் குமார் உடனடியாகப் பதவி விலக வேண்டும், பாஜக அரசுக்கு இதைத் தவிர வேறு வழியேதும் இல்லை என்று மு.க.ஸ்டாலின் ஆவேசமாகப் பதிவிட்டுள்ளார்.

டெல்லியில் மாணவர் அமைப்புகளும் சமூக ஆர்வலர்களும் முன்னெடுத்து வரும் போராட்டங்களுக்கு ஆதரவாகவும், கருத்துரிமை மற்றும் அமைதியான ஜனநாயகப் போராட்டங்களை அரசு முடக்குவதற்கு எதிராகவும் மு.க.ஸ்டாலின் விடுத்துள்ள இந்தக் கண்டனம் தேசிய அளவில் அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது.

இதையும் படிங்க: சூப்பர்.! தவெக ஆட்சி அமைத்ததில் இருந்து 4 ஆம் இடம்..! எதில் தெரியுமா.? விளாசிய ஸ்டாலின்..!!