பரபரக்கும் அரசியல் களம்: 5 மாநிலத்தில் ஆட்சியை கைப்பற்றப்போவது யார்..?? நாடே உற்றுப்பார்க்கும் தருணம்..!!

இந்திய ஜனநாயகத்தின் மாபெரும் விழாவாக நடைபெற்ற ஐந்து மாநில சட்டசபைத் தேர்தல்களின் வாக்கு எண்ணிக்கை இன்று (மே 4) காலை தொடங்கி, முடிவுகள் விரைவில் அறிவிக்கப்பட உள்ளன. தமிழ்நாடு, கேரளா, அசாம், மேற்கு வங்காளம் மற்றும் புதுச்சேரி ஆகியவற்றில் மொத்தம் 824 தொகுதிகளுக்கான தேர்தல் முடிவுகள் இன்று தீர்மானிக்கப்படும். இந்தத் தேர்தல்கள் தேசிய அரசியல் நிலவரத்தை பெரிதும் பாதிக்கும் என்று அரசியல் பார்வையாளர்கள் கருதுகின்றனர்.

கேரளாவில் 140 தொகுதிகளுக்கு ஏப்ரல் 9 அன்று ஒரே கட்டமாகத் தேர்தல் நடைபெற்றது. பெரும்பான்மைக்கு 71 இடங்கள் தேவை. இடது ஜனநாயக முன்னணி (எல்.டி.எஃப்), ஐக்கிய ஜனநாயக முன்னணி (யூ.டி.எஃப்) மற்றும் பாஜக தலைமையிலான தேசிய ஜனநாயக கூட்டணி (என்.டி.ஏ) இடையே மும்முனைப் போட்டி நிலவுகிறது. சுமார் 79.7 சதவீத வாக்காளர்கள் பங்கேற்ற இந்தத் தேர்தலில், ஆளும் இடதுசாரி அரசின் செயல்பாடுகள் மற்றும் எதிர்க்கட்சிகளின் விமர்சனங்கள் முக்கிய பேச்சாக இருந்தன.

அசாமில் 126 தொகுதிகளுக்கு அதே தேதியில் தேர்தல் நடைபெற்றது. 64 இடங்கள் பெரும்பான்மைக்குத் தேவை. பாஜக கூட்டணி, காங்கிரஸ் தலைமையிலான கூட்டணி மற்றும் அனைத்திந்திய ஐக்கிய ஜனநாயக முன்னணி (ஏ.ஐ.யூ.டி.எஃப்) இடையே கடும் போட்டி. 85.38 சதவீத வாக்கு பதிவாகிய இங்கு, பாஜகவின் செயல்பாடுகள் மற்றும் எல்லைப் பிரச்னைகள் முக்கிய தலைப்புகளாக இருந்தன.

இதையும் படிங்க: வாக்கு எண்ணிக்கை எப்படி நடைபெறும்? தபால் வாக்குகள் எப்படி எண்ணப்படும்? - முழு விவரம் இதோ...!!

புதுச்சேரியில் 30 தொகுதிகளுக்கு ஏப்ரல் 9 அன்று தேர்தல் நடைபெற்றது. 16 இடங்கள் பெரும்பான்மை. என்.ஆர். காங்கிரஸ்-பாஜக கூட்டணி, காங்கிரஸ்-தி.மு.க. கூட்டணி மற்றும் தவெக உள்ளிட்ட கூட்டணிகள் மோதுகின்றன. 89.87 சதவீத உயர் வாக்கு பதிவு இங்கு பதிவானது. மேற்கு வங்காளத்தில் 294 தொகுதிகளுக்கு (293க்கு எண்ணிக்கை) ஏப்ரல் 23 மற்றும் 29 ஆகிய தேதிகளில் இரு கட்டங்களாகத் தேர்தல் நடைபெற்றது. 148 இடங்கள் பெரும்பான்மை. திரிணாமுல் காங்கிரஸ், பாஜக மற்றும் காங்கிரஸ் இடையே மும்முனைப் போட்டி. 92 சதவீதத்துக்கு மேல் வாக்கு பதிவாகிய சாதனை இங்கு நிகழ்ந்தது.

தமிழ்நாட்டில் 234 தொகுதிகளுக்கு ஏப்ரல் 23 அன்று ஒரே கட்டமாகத் தேர்தல் நடைபெற்றது. 118 இடங்கள் பெரும்பான்மை. தி.மு.க. கூட்டணி, அ.தி.மு.க.-பாஜக கூட்டணி மற்றும் தமிழக வெற்றிக் கழகம் (தவெக) உள்ளிட்ட புதிய சக்திகள் இடையே போட்டி நிலவுகிறது. 84.69 சதவீத வாக்கு பதிவு பதிவானது.

தேர்தல் ஆணையம் உயர் பாதுகாப்பு ஏற்பாடுகளுடன் வாக்கு எண்ணிக்கையை மேற்கொள்ள உள்ளது. முடிவுகள் தேசிய அரசியலை பாதிக்கும் வகையில் அமையும் என எதிர்பார்க்கப்படுகிறது. 

இதையும் படிங்க: #BREAKING: CBSE 10 ஆம் வகுப்பு தேர்வு முடிவுகள் வெளியீடு..! முன்கூட்டியே அறிவிப்பு..!!