தினகரன் vs பழனிசாமி! பகை முடிந்ததாக சொன்ன நிலையில் மீண்டும் ‘ஆபரேஷன்’ ஆரம்பம்?

சென்னை: அ.ம.மு.க., நிர்வாகிகள் மற்றும் கட்சியினரை அ.தி.மு.க.,வில் இணைக்கும் நிகழ்ச்சி தர்மபுரியில் விமரிசையாக நடத்தப்பட்ட நிலையில், இரு கட்சிகளுக்கு இடையிலான அரசியல் உறவு குறித்து மீண்டும் விவாதம் எழுந்துள்ளது. இரு கட்சிகளும் கூட்டணியில் இணைந்திருந்தாலும், நிர்வாகிகள் அளவில் நடைபெறும் அரசியல் நகர்வுகள் புதிய கணக்குகளை உருவாக்கியுள்ளதாக கட்சி வட்டாரங்களில் பேசப்படுகிறது.

ஜெயலலிதா மறைவுக்குப் பிறகு அப்போதைய அ.தி.மு.க. தலைமைக்கும் டி.டி.வி. தினகரனுக்கும் இடையே ஏற்பட்ட கருத்து வேறுபாடு அரசியல் பிரிவாக மாறியது. இதையடுத்து தினகரன் அ.ம.மு.க.வை தொடங்கி தனியாக செயல்பட்டு வந்தார்.

பல ஆண்டுகளாக நீடித்த இந்த அரசியல் இடைவெளிக்கு முற்றுப்புள்ளி வைக்கும் வகையில், கடந்த சட்டசபை தேர்தலை முன்னிட்டு அ.தி.மு.க. பொதுச்செயலர் பழனிசாமியும், அ.ம.மு.க. பொதுச்செயலர் தினகரனும் கூட்டணி அமைத்தனர். பழைய பகையை மறந்து இரு தரப்பும் இணைந்ததாகவும் அவர்கள் தெரிவித்தனர். ஆனால், தேர்தல் முடிவுகள் இரு கட்சிகளும் எதிர்பார்த்த அளவுக்கு அமையவில்லை.

இதையும் படிங்க: தவெக அரசு 5 ஆண்டுகள் நிலைக்காது! வேலூரில் எடப்பாடி பழனிசாமி பேட்டி!

தேர்தலுக்குப் பிறகு அ.தி.மு.க.வில் கட்சித் தலைமை தொடர்பாக பல்வேறு கருத்துகள் எழுந்ததாக கூறப்படுகிறது. இதனிடையே, தினகரனை மீண்டும் அ.தி.மு.க.வில் இணைக்க வேண்டும் என்ற கோரிக்கையும் சில தரப்பினரால் முன்வைக்கப்பட்டதாக தகவல்கள் வெளியாகின.

இந்த சூழலில், தர்மபுரியில் அ.ம.மு.க. நிர்வாகிகள் அ.தி.மு.க.வில் இணையும் நிகழ்ச்சி பெரிய அளவில் நடத்தப்பட்டது. இந்த நிகழ்வுதான் தற்போது இரு கட்சிகளின் அரசியல் உறவு குறித்து புதிய விவாதத்தை ஏற்படுத்தியுள்ளது.

அ.தி.மு.க.வின் சில அமைப்பு நிர்வாகிகள் கூறியதாக வெளியாகியுள்ள தகவலின்படி, தென் மாவட்டங்களில் அ.தி.மு.க.வைச் சேர்ந்த சில நிர்வாகிகளுடன் தினகரன் தரப்பு தொடர்பில் இருப்பதாக கூறப்படுகிறது. இதற்கு பதிலாக வட மாவட்டங்களில் உள்ள அ.ம.மு.க. நிர்வாகிகளை அ.தி.மு.க. பக்கம் கொண்டு வரும் முயற்சிகள் தொடங்கியுள்ளதாகவும் அந்த வட்டாரங்கள் தெரிவிக்கின்றன.

மேலும், தென் மாவட்டங்களில் உள்ள அ.ம.மு.க. நிர்வாகிகளையும் தங்கள் பக்கம் கொண்டு வர அ.தி.மு.க. தரப்பு திட்டமிடுவதாக கூறப்படுகிறது. இதனால் இரு கட்சிகளுக்கும் இடையே வெளிப்படையாக கூட்டணி உறவு இருந்தாலும், அடிமட்ட அளவில் அரசியல் போட்டி நீடிப்பதாக கட்சி வட்டாரங்களில் விவாதம் எழுந்துள்ளது.

ஏற்கனவே அ.தி.மு.க.வில் உட்கட்சி கருத்து வேறுபாடுகள் பேசப்படும் நிலையில், தினகரன் தரப்புடனான நிர்வாகிகள் நகர்வுகள் அரசியல் முக்கியத்துவம் பெற்றுள்ளன. வரும் நாட்களில் இரு தரப்பும் எவ்வாறு செயல்படுகின்றன என்பதன் அடிப்படையில் இந்த உறவு எந்த திசையில் செல்லும் என்பது தெரியவரும்.

இதையும் படிங்க: அதிமுகவில் இருந்து வந்தவர்களுக்கு ‘ஷாக்’! தவெகவில் பதவி கிடைக்காமல் காத்திருப்பு! மாஜிக்கள் அதிருப்தி!