தடை செய்யப்பட்ட பகுதியில் 'ட்ரோன் ரீல்ஸ்'? முதல்வர் விஜய் மீது மத்திய அரசு விசாரணை நடத்த அதிமுக வலியுறுத்தல்!

சென்னை கிண்டி – கத்திப்பாரா பகுதியில் நடைபெற்ற மெட்ரோ ரயில் பணிகளை ஆய்வு செய்தபோது, ட்ரோன் மூலம் வீடியோ பதிவு செய்யப்பட்டதாக கூறப்படும் விவகாரம் அரசியல் சர்ச்சையாக மாறியுள்ளது. இந்த சம்பவம் தொடர்பாக தமிழ்நாடு முதல்வர் ஜோசப் விஜய் மீது மத்திய அரசு விசாரணை நடத்த வேண்டும் என்று அ.தி.மு.க. வலியுறுத்தியுள்ளது.

இதுகுறித்து அ.தி.மு.க. வெளியிட்டுள்ள அறிக்கையில், சென்னை விமான நிலையத்திற்கு அருகில் உள்ள கிண்டி – கத்திப்பாரா பகுதி விமானப் பாதுகாப்பு காரணங்களால் ட்ரோன் பறக்க விட தடை செய்யப்பட்ட பகுதியாக கருதப்படுவதாக குறிப்பிடப்பட்டுள்ளது. அந்தப் பகுதியில் முதல்வர் விஜய் 101 அடி உயரத்தில் நின்று ட்ரோன் கேமரா மூலம் ‘ரீல்ஸ்’ வீடியோ பதிவு செய்ததாக குற்றச்சாட்டு முன்வைக்கப்பட்டுள்ளது.

இந்த நடவடிக்கை விமானப் பாதுகாப்பு விதிமுறைகளுக்கு முரணானதாக இருக்கலாம் என்றும், நாட்டின் பாதுகாப்பு தொடர்பான விதிகள் அனைவருக்கும் பொதுவானவை என்பதால், இந்த விவகாரத்தில் மத்திய அரசு மற்றும் சிவில் விமானப் போக்குவரத்து இயக்குநரகம் (DGCA) உடனடியாக தலையிட வேண்டும் என்றும் அ.தி.மு.க. தனது அறிக்கையில் தெரிவித்துள்ளது.

இதையும் படிங்க: காவிரி பேச்சுவார்த்தைக்காக கர்நாடகம் செல்லும் முதல்வர் விஜய்... உடன் செல்லும் 13 பேர் யார்? வெளியான முழு விவரம்!

மேலும், சம்பவம் தொடர்பாக முழுமையான விசாரணை நடத்தி, விதிமீறல் உறுதி செய்யப்பட்டால் சட்டப்படி நடவடிக்கை எடுக்க வேண்டும் என்றும் அக்கட்சி கோரிக்கை விடுத்துள்ளது. இந்த அறிக்கை வெளியாகியுள்ள நிலையில், அரசியல் வட்டாரங்களில் இந்த விவகாரம் புதிய விவாதத்தை ஏற்படுத்தியுள்ளது.

இதுவரை இந்த குற்றச்சாட்டுக்கு தமிழ்நாடு அரசு அல்லது முதல்வர் விஜய் தரப்பில் அதிகாரப்பூர்வ விளக்கம் வெளியாகவில்லை. ட்ரோன் பயன்படுத்த தேவையான அனுமதி பெறப்பட்டதா, அல்லது சம்பந்தப்பட்ட விதிமுறைகள் பின்பற்றப்பட்டனவா என்பது குறித்து தெளிவான தகவலும் வெளியாகவில்லை.

இந்த விவகாரத்தில் அதிகாரப்பூர்வ அமைப்புகள் என்ன நடவடிக்கை எடுக்கின்றன, அரசின் பதில் என்ன என்பதையே அரசியல் கட்சிகளும் பொதுமக்களும் கவனித்து வருகின்றனர். அடுத்த சில நாட்களில் இந்த விவகாரம் தொடர்பாக மேலும் முக்கிய தகவல்கள் வெளியாகும் என எதிர்பார்க்கப்படுகிறது.

இதையும் படிங்க: பேச்சுரிமைக்கு எதிராக செயல்பட கூடாது! தவெக அரசுக்கு மு.வீரபாண்டியன் எச்சரிக்கை!