“அதிமுக விருப்ப மனு தாக்கல் நிறைவு” – 9,500 பேர் மனு தாக்கல்; நேர்காணல் எப்போது? விரைவில் முக்கிய அறிவிப்பு!

2026 சட்டமன்றத் தேர்தலுக்கான அதிமுகவின் உத்தேச வேட்பாளர் பட்டியல் தயார் செய்யும் பணிகள் சூடுபிடித்துள்ளன. இன்று மாலை 5 மணியுடன் விருப்ப மனு தாக்கல் நிறைவடைந்த நிலையில், மொத்தம் 9,500 பேர் விருப்ப மனுக்களைச் சமர்ப்பித்துள்ளதாகத் தகவல்கள் வெளியாகியுள்ளன.

தமிழகம், புதுச்சேரி மற்றும் கேரளா ஆகிய மாநிலங்களில் உள்ள தொகுதிகளில் போட்டியிட விரும்புவோருக்கான விண்ணப்ப விநியோகம் கடந்த டிசம்பர் 15-ஆம் தேதி முதல் தொடங்கி நடைபெற்றது. கட்சியின் பொதுச்செயலாளர் எடப்பாடி கே. பழனிசாமியின் உத்தரவின் பேரில், விருப்ப மனுத் தாக்கல் செய்வதற்கான கால அவகாசம் இன்று டிசம்பர் 31 வரை நீட்டிக்கப்பட்டிருந்தது. இந்நிலையில், ஆயிரக்கணக்கான தொண்டர்கள் மற்றும் நிர்வாகிகள் ஆர்வத்துடன் மனுக்களைத் தாக்கல் செய்துள்ளதால், அதிமுக தலைமை அலுவலகமான ‘புரட்சித் தலைவர் எம்.ஜி.ஆர் மாளிகை’ மக்கள் கூட்டத்தால் களைகட்டியுள்ளது. விரைவில் நேர்காணல் நடத்தப்பட்டு வேட்பாளர்கள் இறுதி செய்யப்பட உள்ளதால், தேர்தல் களம் இப்போதே அனல் பறக்கத் தொடங்கியுள்ளது.

2026 சட்டமன்றத் தேர்தலை முன்னிட்டு அதிமுக தனது தேர்தல் பணிகளைப் புயல் வேகத்தில் முடுக்கிவிட்டுள்ளது. அண்மையில் நடைபெற்ற பொதுக்குழு மற்றும் மாவட்டச் செயலாளர்கள் கூட்டங்களைத் தொடர்ந்து, கட்சியின் பொதுச்செயலாளர் எடப்பாடி கே. பழனிசாமி சூறாவளிப் பிரச்சாரப் பயணங்களை மேற்கொண்டு வருகிறார். இதன் ஒரு பகுதியாக, வேட்பாளர் தேர்விற்கான விருப்ப மனுக்கள் பெறும் பணி கடந்த டிசம்பர் 15 முதல் 23 வரை திட்டமிடப்பட்டிருந்தது. ஆனால், கட்சியின் அடிமட்டத் தொண்டர்களின் வேண்டுகோளை ஏற்று, விண்ணப்பிக்கக் கடைசித் தேதியை இன்று டிசம்பர் 31 மாலை 5 மணி வரை நீட்டித்து எடப்பாடியார் உத்தரவிட்டிருந்தார்.

இதையும் படிங்க: மயங்கி விழுந்த மாவட்டச் செயலாளர்! கண்டு கொள்ளாத எடப்பாடி பழனிசாமி - கும்மிடிப்பூண்டியில் பரபரப்பு!

ஒவ்வொரு நாளும் காலை 10 மணி முதல் மாலை 5 மணி வரை தொண்டர்கள் போட்டிப் போட்டுக்கொண்டு விருப்ப மனுக்களைச் சமர்ப்பித்து வந்தனர். இன்றுடன் இந்தப் பணி நிறைவடைந்த நிலையில், தமிழகம், புதுவை மற்றும் கேரளா ஆகிய மாநிலங்களில் இருந்து மொத்தம் 9,500 அதிமுகவினர் விருப்ப மனுக்களைச் சமர்ப்பித்துள்ளனர். விண்ணப்பித்துள்ள 9,500 பேருக்கும் விரைவில் நேர்காணல் தொடங்கப்பட உள்ளது. அதிமுக பொதுச்செயலாளர் எடப்பாடி கே. பழனிசாமி தலைமையில் நடைபெறவுள்ள இந்த நேர்காணலில், தொகுதி நிலவரம் மற்றும் வெற்றி வாய்ப்புகள் குறித்துக் கடுமையான கேள்விகள் முன்வைக்கப்படும் எனத் தெரிகிறது.

விருப்ப மனு தாக்கல் செய்தவர்களில் இருந்து தகுதியான மற்றும் வெற்றி வாய்ப்புள்ள வேட்பாளர்கள் முறையாகத் தேர்வு செய்யப்படுவார்கள். திமுக, அதிமுக உள்ளிட்ட பிரதான கட்சிகள் வேட்பாளர் தேர்வு மற்றும் கள ஆய்வுகளில் தீவிரமாக இறங்கியுள்ளதால், தமிழக அரசியல் களம் இப்போதே சுறுசுறுப்பாகிவிட்டது. வேட்பாளர் பட்டியல் அறிவிக்கப்பட்டவுடன் தேர்தல் களம் இன்னும் விஸ்வரூபம் எடுக்கும் என அரசியல் பார்வையாளர்கள் கருதுகின்றனர். 2026-ல் மீண்டும் ஆட்சிக் கட்டிலில் அமர வேண்டும் என்ற இலக்குடன் எடப்பாடியார் தலைமையிலான அதிமுக எடுத்து வரும் இந்தத் தொடர் நடவடிக்கைகள், அக்கட்சியினரிடையே பெரும் உற்சாகத்தை ஏற்படுத்தியுள்ளது.

இதையும் படிங்க: 2026-தேர்தல் வியூகம்: டிசம்பர் 31-ல் எடப்பாடி போடும் மாஸ்டர் பிளான்! மாசெக்கள் கூட்டத்தில் முக்கிய முடிவு?