#BREAKING: தேசிய ஜனநாயக கூட்டணியில் (NDA) பாமகவிற்கு 18 தொகுதிகள் ஒதுக்கீடு!

தமிழக அரசியல் களத்தில் பெரும் எதிர்பார்ப்பை ஏற்படுத்தியிருந்த அதிமுக - பாஜக - பாமக இடையிலான தொகுதிப் பங்கீடு ஒருவழியாக இன்று சுமுகமாக முடிவுக்கு வந்துள்ளது. ராயப்பேட்டையில் உள்ள அதிமுக தலைமை அலுவலகத்தில் நடைபெற்ற கூட்டத்தில், பாட்டாளி மக்கள் கட்சிக்கு 18 இடங்களை ஒதுக்கும் ஒப்பந்தம் அதிகாரப்பூர்வமாகக் கையெழுத்தானது.

இந்த மெகா கூட்டணியின் முக்கியத் தூணாகக் கருதப்படும் பாட்டாளி மக்கள் கட்சிக்கு 18 சட்டமன்றத் தொகுதிகள் ஒதுக்கீடு செய்யப்பட்டுள்ளன. வட தமிழகம் மற்றும் கொங்கு மண்டலத்தில் பாமகவுக்கு இருக்கும் செல்வாக்கைக் கருத்தில் கொண்டு, அக்கட்சிக்கு வெற்றி வாய்ப்புள்ள தொகுதிகளை ஒதுக்குவதில் அதிமுக பொதுச்செயலாளர் எடப்பாடி பழனிசாமி மற்றும் பாஜக மேலிடப் பொறுப்பாளர்கள் ஆர்வம் காட்டினர்.

முன்னதாக, தொகுதிப் பங்கீட்டில் சில இழுபறிகள் நீடித்த நிலையில், பாமக தலைவர் அன்புமணி ராமதாஸ் மற்றும் அமமுக பொதுச்செயலாளர் டிடிவி தினகரன் ஆகியோர் டெல்லி சென்று மத்திய உள்துறை அமைச்சர் அமித் ஷாவைச் சந்தித்துப் பேசினர். அந்தச் சந்திப்பின் தொடர்ச்சியாக, இன்று மத்திய அமைச்சர் பியூஷ் கோயல் சென்னை வந்து எடப்பாடி பழனிசாமியுடன் நடத்திய இறுதிக்கட்டப் பேச்சுவார்த்தையில் பாமகவுக்கான இடங்கள் உறுதி செய்யப்பட்டன.

நாளை (மார்ச் 24) சட்டமன்றத் தேர்தலுக்கான வேட்புமனுத் தாக்கல் தொடங்க உள்ள நிலையில், பாமகவுக்கு 18 இடங்கள் ஒதுக்கப்பட்டிருப்பது அக்கட்சித் தொண்டர்களிடையே உற்சாகத்தை ஏற்படுத்தியுள்ளது. குறிப்பாக வன்னியர் வாக்கு வங்கியை ஒருங்கிணைப்பதன் மூலம் வட மாவட்டங்களில் திமுக கூட்டணிக்கு மிகப்பெரிய சவாலை ஏற்படுத்த அதிமுக - பாமக கூட்டணித் திட்டமிட்டுள்ளது.