கூட்டணியில் இணைந்த டிடிவி!! நேரில் சந்திக்க முரண்டு பிடிக்கும் எடப்பாடி! பரபரக்கும் அரசியல் பின்னணி!

தமிழகத்தில் 2026 சட்டமன்றத் தேர்தலை முன்னிட்டு என்டிஏ (என்டிஏ) கூட்டணியில் பெரும் மாற்றங்கள் நிகழ்ந்து வருகின்றன. அதிமுக - பாஜக கூட்டணியில் அம்மா மக்கள் முன்னேற்றக் கழகம் (அமமுக) இணைவதாக அக்கட்சியின் பொதுச்செயலாளர் டிடிவி தினகரன் அதிகாரப்பூர்வமாக அறிவித்துள்ளார். 

இந்த அறிவிப்பு வெளியான உடனேயே, அவர் மத்திய அமைச்சர் பியூஷ் கோயலை சந்தித்துள்ளார். இந்த சந்திப்பில் மத்திய இணை அமைச்சர் எல். முருகன், தமிழக பாஜக தலைவர் நயினார் நாகேந்திரன், வானதி சீனிவாசன் உள்ளிட்டோர் உடனிருந்தனர். அமமுக நிர்வாகிகளும் கலந்து கொண்டனர். ஆனால் அதிமுக தரப்பில் எந்த நிர்வாகியும் இல்லாதது குறிப்பிடத்தக்கது.

ஏற்கனவே, தமிழகத்தில் என்டிஏ கூட்டணிக்கு அதிமுகவே தலைமை தாங்கும் என்று அமித் ஷா உறுதிப்படுத்தியிருந்தார். அதிமுகவின் உட்கட்சி விவகாரங்களில் பாஜக தலையிடாது என்றும் தெரிவித்திருந்தார். 

இதையும் படிங்க: எடப்பாடி தலைமையை ஏற்க மாட்டோம்!! அதிமுக - பாஜக கூட்டணி கனவுக்கு வேட்டு வைக்கும் அமமுக!!

இந்நிலையில், அமமுக இணைவு அறிவிப்புக்குப் பிறகு டிடிவி தினகரன் எடப்பாடி பழனிசாமியை நேரில் சந்திக்கவில்லை என்பது பெரும் விவாதத்தை ஏற்படுத்தியுள்ளது. எடப்பாடி பழனிசாமி தினகரனை சந்திக்க மறுத்ததாகவும், இது பாஜகவின் வற்புறுத்தலால் அமமுக கூட்டணிக்கு கொண்டு வரப்பட்டதாகவும் அரசியல் வட்டாரங்களில் பேசப்படுகிறது.

என்டிஏ கூட்டணியின் முதல் பெரிய பொதுக்கூட்டம் ஜனவரி 23-ஆம் தேதி செங்கல்பட்டு மாவட்டம் மதுராந்தகத்தில் நடைபெற உள்ளது. பிரதமர் நரேந்திர மோடி கலந்து கொண்டு உரையாற்ற உள்ளார். 

இந்த மேடையில் கூட்டணி கட்சித் தலைவர்களை ஒன்றாக ஏற்றி காட்டுவதற்கு அதிமுக - பாஜக நிர்வாகிகள் முடிவு செய்துள்ளனர். ஏற்கனவே பாமக தலைவர் அன்புமணி ராமதாஸ் எடப்பாடி பழனிசாமியை சந்தித்து கூட்டணியை உறுதி செய்தனர். இருவரும் கூட்டாக செய்தியாளர்களை சந்தித்து அறிவித்தனர்.

ஆனால் அமமுக இணைவதால், தினகரன் - எடப்பாடி சந்திப்பு இல்லாதது பெரும் சிக்கலை ஏற்படுத்தும் என்று அரசியல் ஆய்வாளர்கள் கருதுகின்றனர். அமமுகவின் ஆதரவு வாக்குகள் (குறிப்பாக தென் தமிழகத்தில் முக்குலத்தோர் வாக்குகள்) அதிமுக வேட்பாளர்களுக்கும், அதிமுக ஆதரவு வாக்குகள் அமமுகவுக்கும் செல்ல வேண்டும். 

இதற்கு உயர்மட்ட தலைவர்கள் இணைந்து பணியாற்ற வேண்டியது அவசியம். தலைவர்களே சந்திக்காவிட்டால், கீழ்மட்ட தொண்டர்கள் ஒன்றிணைந்து பிரச்சாரம் செய்வது சிரமமாகும். இது கூட்டணிக்கு பின்னடைவாக அமையலாம் என்ற எச்சரிக்கை எழுந்துள்ளது.

பாஜக தரப்பில் தினகரனை இணைப்பதன் மூலம் தென் மாவட்டங்களில் வாக்கு வங்கியை வலுப்படுத்த முயல்கிறது. ஆனால் அதிமுக தரப்பில் எடப்பாடி பழனிசாமியின் தலைமையை பலப்படுத்துவதற்கு எதிர்ப்பு உள்ளது. ஜனவரி 23 பொதுக்கூட்டத்தில் மேடையில் அனைவரும் இணைந்து நிற்பார்களா? அல்லது பதற்றம் தொடருமா? என்ற எதிர்பார்ப்பு உச்சத்தில் உள்ளது. தமிழக அரசியல் களம் சூடுபிடித்துள்ளது!

இதையும் படிங்க: ஓபிஎஸ், சசிகலா NO! டிடிவிக்கு மறுப்பு சொல்லாத இபிஎஸ்? முக்குலத்தோர் வாக்குக்காக சைலண்ட் மோடில் எடப்பாடி!