பிரதமர் மோடியிடம் நெதர்லாந்து கொடுத்த ஆனைமங்கலம் செப்பேடுகள்! தமிழகத்திடம் ஒப்படைக்க வலியுறுத்தல்!

சென்னை: நெதர்லாந்தின் லெய்டன் நகரில் இருந்து 11-ம் நூற்றாண்டைச் சேர்ந்த வரலாற்றுச் சிறப்புமிக்க ஆனைமங்கலம் சோழர் செப்பேடுகள் இந்தியாவிடம் ஒப்படைக்கப்பட்டுள்ளது பெரும் மகிழ்ச்சியை ஏற்படுத்தியுள்ளது. இது தமிழர்களின் பண்பாட்டு மற்றும் வரலாற்றுப் பாரம்பரியத்தை மீட்டெடுக்கும் முக்கிய நிகழ்வாக பார்க்கப்படுகிறது.

முன்னாள் அமைச்சர் தங்கம் தென்னரசு தனது எக்ஸ் (X) பக்கத்தில் இது குறித்து விரிவாகப் பதிவிட்டுள்ளார். “இந்த அரிய செப்பேடுகள் வெறும் தொல்பொருள் பொருட்கள் அல்ல; தமிழர்களின் மகத்தான வரலாறு, சோழப் பேரரசின் பெருமை மற்றும் தமிழ்ப் பண்பாட்டின் நிரந்தரச் சான்றுகள்” என்று அவர் விவரித்தார்.

தங்கம் தென்னரசு மேலும் கூறியதாவது: “மு.க. ஸ்டாலின் அவர்கள் முதலமைச்சராகப் பொறுப்பேற்றபோது, சட்டசபையில் இந்த செப்பேடுகளைத் தமிழ்நாட்டுக்கு மீட்டெடுக்க அனைத்து முயற்சிகளும் எடுக்கப்படும் என அறிவித்தார். மத்திய அரசிடமும் தொடர்ந்து வலியுறுத்தினோம். அனைவரின் முயற்சியும் இன்று பலனளித்துள்ளது” என்றார்.

இதையும் படிங்க: அமைச்சர்கள் நியமிக்கப்படாத முக்கிய இலாகா! யாருக்காக காத்திருக்கிறார் முதல்வர் விஜய்!!

பிரதமர் நரேந்திர மோடியின் நெதர்லாந்து பயணத்தின்போது இந்த செப்பேடுகள் இந்தியாவிடம் ஒப்படைக்கப்பட்டதை அவர் மகிழ்ச்சியுடன் வரவேற்றார். அதேவேளையில், இந்த செப்பேடுகளின் உண்மையான இருப்பிடம் தமிழ்மண் என்பதால், அவை தமிழ்நாடு அரசிடம் ஒப்படைக்கப்பட வேண்டும் என்று வலியுறுத்தினார்.

“தமிழ்நாடு அரசு உரிய முயற்சிகளைத் தாமதமின்றி மேற்கொள்ள வேண்டும். இந்த வரலாற்று ஆவணங்கள் தாய்மண்ணான தமிழ்நாட்டுக்கு வர வேண்டும். மக்கள் இவற்றைக் காணும் வகையில் காட்சிப்படுத்தப்பட வேண்டும்” என்று தங்கம் தென்னரசு தனது பதிவில் கோரிக்கை வைத்துள்ளார்.

சோழர் காலத்தைச் சேர்ந்த இந்த செப்பேடுகள் தமிழக வரலாற்றில் மிக முக்கிய இடம் பெற்றவை. இவை தமிழ்நாட்டுக்கு வருமானால், அருங்காட்சியகங்களில் பொதுமக்கள் பார்வைக்கு வைக்கப்படும் என எதிர்பார்க்கப்படுகிறது. இந்த நிகழ்வு தமிழக அரசியல் வட்டாரத்தில் வரவேற்பைப் பெற்றுள்ளது.

இதையும் படிங்க: நீட் தேர்வு மையங்களை மாற்றிக் கொள்ளலாம்! எந்த கட்டணமும் இல்லை! தேசிய தேர்வு முகமை ஏற்பாடு!