மீண்டும் தலைதூக்கும் கொரோனா!! ஆந்திராவில் 4 பேர் பலி! அரசு வெளியிட்ட அவசர எச்சரிக்கை!
ஆந்திர மாநிலத்தில் கொரோனா தொற்று காரணமாக 4 பேர் உயிரிழந்து இருப்பதாக அந்த மாநில மக்கள் நல்வாழ்வு மற்றும் குடும்ப நலத்துறை செயலாளர் ஜி.வீரபாண்டியன் தெரிவித்தார்.
by
ஆந்திரப் பிரதேசத்தில் மீண்டும் கொரோனா தொற்று தொடர்பான உயிரிழப்புகள் பதிவாகியிருப்பது கவலையை ஏற்படுத்தியுள்ளது. மாநிலத்தில் இதுவரை 4 பேர் கொரோனா தொற்று காரணமாக உயிரிழந்துள்ளதாக மக்கள் நல்வாழ்வு மற்றும் குடும்ப நலத்துறை செயலாளர் ஜி. வீரபாண்டியன் தெரிவித்துள்ளார்.
இருப்பினும், பொதுமக்கள் தேவையற்ற அச்சம் அடைய வேண்டாம் என்றும், முன்னெச்சரிக்கை நடவடிக்கைகளை தொடர்ந்து கடைப்பிடிக்க வேண்டும் என்றும் அவர் வலியுறுத்தியுள்ளார்.
அதிகாரப்பூர்வ தகவலின்படி, உயிரிழந்தவர்களில் மூவர் ஒய்.எஸ்.ஆர். கடப்பா மாவட்டத்தைச் சேர்ந்தவர்கள். மற்றொருவர் காக்கிநாடா மாவட்டத்தைச் சேர்ந்தவர். உயிரிழந்த அனைவருக்கும் ஏற்கனவே தீவிர உடல்நலப் பிரச்சினைகள் இருந்ததாகவும், அதனுடன் கொரோனா தொற்று ஏற்பட்டதால் உடல்நிலை மேலும் மோசமடைந்ததாகவும் சுகாதாரத்துறை தெரிவித்துள்ளது.
இதையும் படிங்க: மீண்டும் வேகமெடுக்கும் கொரோனா? ஆந்திராவை தொடர்ந்து கர்நாடகத்தில் அதிகரிக்கும் பாதிப்பு... பகீர் ரிப்போர்ட்!
தற்போது மாநிலம் முழுவதும் 12 பேர் கொரோனா தொற்றால் பாதிக்கப்பட்டு மருத்துவமனைகளில் சிகிச்சை பெற்று வருகின்றனர். இவர்களில் 8 பேர் ஒய்.எஸ்.ஆர். கடப்பா மாவட்டத்தைச் சேர்ந்தவர்கள் என்பதும் குறிப்பிடத்தக்கது. மற்ற நோயாளிகளும் மருத்துவர்களின் கண்காணிப்பில் சிகிச்சை பெற்று வருவதாக அதிகாரிகள் தெரிவித்துள்ளனர்.
இந்த சூழலில், காய்ச்சல், இருமல், தொண்டை வலி, சளி அல்லது சுவாசக் கோளாறு போன்ற அறிகுறிகள் தென்பட்டால் தாமதிக்காமல் அருகிலுள்ள மருத்துவமனையை அணுக வேண்டும் என்று மக்கள் நல்வாழ்வு மற்றும் குடும்ப நலத்துறை செயலாளர் ஜி. வீரபாண்டியன் அறிவுறுத்தியுள்ளார். வயதானவர்கள், கர்ப்பிணிகள் மற்றும் ஏற்கனவே இதய நோய், நீரிழிவு, சிறுநீரக நோய் போன்ற இணைநோய்கள் உள்ளவர்கள் கூடுதல் கவனத்துடன் இருக்க வேண்டும் என்றும் அவர் கூறியுள்ளார்.
மாநில அரசு நிலைமையை தொடர்ந்து கண்காணித்து வருவதாகவும், தேவையான மருத்துவ வசதிகள் தயார் நிலையில் இருப்பதாகவும் அதிகாரிகள் தெரிவித்துள்ளனர். பொதுமக்கள் வதந்திகளை நம்பாமல், அதிகாரப்பூர்வ அறிவிப்புகளை மட்டுமே பின்பற்ற வேண்டும் என்றும், தனிநபர் சுகாதாரத்தை பேணுவதுடன் தேவையான முன்னெச்சரிக்கை நடவடிக்கைகளை தொடர்ந்து கடைப்பிடிக்க வேண்டும் என்றும் சுகாதாரத்துறை மீண்டும் வலியுறுத்தியுள்ளது.
இதையும் படிங்க: மக்களே உஷார்! ஆந்திராவை அச்சுறுத்தும் கொரோனா! மத்திய அரசு அலர்ட்! முன்னெச்சரிக்கை நடவடிக்கைகள் தீவிரம்!
