கவர்னர் ரவி தீவிரவாதியா? சபாநாயகர் அப்பாவு பேச்சு! அண்ணாமலை கொந்தளிப்பு!

தமிழகத்தில் சட்டம் ஒழுங்கு சரியில்லை, பாதுகாப்பற்ற மாநிலம் என்ற ஆளுநர் ஆர்.என்.ரவி தொடர்ந்து கூறி வருகிறார் என்ற செய்தியாளர்களின் கேள்விக்கு பதில் அளித்த சபாநாயகர் அப்பாவு, தமிழகத்தில் இருக்கக்கூடிய ஒரே ஒரு தீவிரவாதி ஆளுநர் தான் என்றார்.

இதற்கு பாஜக முன்னாள் மாநிலத் தலைவர் அண்ணாமலை கடும் விமர்சனம் செய்து அறிக்கை வெளியிட்டுள்ளார். "திமுக அரசின் கீழ் தீவிரவாத சம்பவங்கள் அதிகரித்து வருகின்றன. ஆளுநரை தீவிரவாதி என்று அழைப்பது கீழ்த்தரமான செயல்" என்று அண்ணாமலை கண்டித்துள்ளார்.

செய்தியாளர்களிடம் பேசிய சபாநாயகர் அப்பாவு, "தமிழகத்தில் தீவிரவாதமும் இல்லை, சட்டம் ஒழுங்கு பிரச்சினையும் இல்லை. ஆளுநர் தீவிரவாதம் வந்துவிடாதா என்று விரும்புகிறார். அவர்தான் ஒரே தீவிரவாதி" என்று கூறினார். இது ஆளும் திமுகவின் நிலைப்பாட்டை பிரதிபலிப்பதாக பார்க்கப்படுகிறது.

இதையும் படிங்க: சொன்ன தேதிக்கு முன்னே சரணடையும் மாவோயிஸ்டுகள்! சொன்னதை செய்து காட்டிய அமித்ஷா!!

இதற்கு பதிலடி கொடுத்து அண்ணாமலை வெளியிட்ட அறிக்கையில், "2022 கோயம்புத்தூர் தற்கொலை குண்டுவெடிப்பை அப்பாவு மறந்துவிட்டாரா? பாஜக அலுவலகங்கள், நிர்வாகிகளின் நிறுவனங்கள் மீது பாப்புலர் ஃப்ரண்ட் ஆஃப் இந்தியா (PFI) குண்டர்கள் பெட்ரோல் குண்டுகளை வீசியதை மறந்துவிட்டாரா?" என்று கேள்வி எழுப்பியுள்ளார். 

மேலும், "கடந்த சில ஆண்டுகளில் தமிழகத்தில் தீவிரவாத அமைப்புகள் ஆழமாக வேரூன்றியுள்ளன என்பதை NIA அறிக்கைகள் தெரிவிக்கின்றன. அப்பாவு அவற்றை சரிபார்த்தாரா?" என்று விமர்சித்தார்.

அண்ணாமலை மேலும் கூறியதாவது: "1998 கோவை குண்டுவெடிப்புக்கு மூளையாக செயல்பட்ட பயங்கரவாதி பாஷாவுக்கு, திமுக அரசு தியாகி போல் பிரியாவிடை அளித்தது அதிர்ச்சி. அவரது இறுதி ஊர்வலத்துக்கு போலீஸ் பாதுகாப்பு வழங்கப்பட்டது. அரசு பாதுகாப்பான சூழலை உருவாக்கத் தவறியதால், தமிழக மக்கள் துன்பப்படுகின்றனர்." இந்த அறிக்கை, திமுகவுக்கும் பாஜகவுக்கும் இடையிலான அரசியல் மோதலை மேலும் தீவிரப்படுத்தியுள்ளது.

தமிழகத்தில் தீவிரவாதம் இல்லை என்று அப்பாவு கூறியது, ஆளும் கட்சியின் பாதுகாப்பு நடவடிக்கைகளை பாதுகாக்கும் முயற்சி என்று எதிர்க்கட்சிகள் விமர்சிக்கின்றன. ஆனால் அண்ணாமலை எடுத்துக்காட்டிய சம்பவங்கள் – கோயம்புத்தூர் குண்டு, PFI தாக்குதல்கள் – தமிழகத்தில் தீவிரவாத அச்சுறுத்தல் உள்ளதை நினைவூட்டுகின்றன. NIA தொடர்ந்து விசாரணை நடத்தி வருகிறது. இந்த சர்ச்சை, சட்டமன்ற குளிர்கால அமர்வில் விவாதமாகலாம் என்று எதிர்பார்க்கப்படுகிறது.

இதையும் படிங்க: சேட்டிலைட்டில் சிக்காத செல்போன்கள்!! பயங்கரவாதிகளுக்கு பக்காவாக தயாரித்து கொடுத்த குற்றவாளிகள்!