எம்.பி ஆகிறார் அண்ணாமலை! ஆந்திராவில் இருந்து வரும் வாய்ப்பு! கட்சி மேலிடம் தனி கவனிப்பு!

தமிழக பாஜகவின் முன்னாள் தலைவரான அண்ணாமலை, தற்போது ஆந்திராவில் இருந்து ராஜ்யசபா எம்பியாக தேர்ந்தெடுக்கப்பட உள்ளதாக பரபரப்பு தகவல் வெளியாகியுள்ளது. இந்த முடிவு அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது. 

தமிழக சட்டசபைத் தேர்தலில் போட்டியிட விரும்பாத அண்ணாமலை, தன் தந்தையின் உடல்நிலையை காரணமாகக் காட்டி தேர்தல் பணிகளில் இருந்து ஒதுங்கியிருந்தார். இதையடுத்து அவரை டெல்லி அழைத்த பாஜக மேலிடம், அவருக்கு சில முக்கிய உறுதிமொழிகளை அளித்ததாகக் கூறப்படுகிறது. 

அதன் பிறகு அண்ணாமலை தமிழகம், கேரளா, புதுச்சேரி ஆகிய மாநிலங்களில் தீவிரமான பிரசாரத்தில் ஈடுபட்டார். பிரசாரத்துக்காக அவருக்கு கட்சி சார்பில் தனி ஹெலிகாப்டர் வசதியும் வழங்கப்பட்டது. 

இதையும் படிங்க: நானும் திராவிடன்தான்!! அத மறந்துராதீங்க!! சென்னையில் சந்திரபாபு நாயுடு தீவிர பிரசாரம்!

இந்நிலையில், ஆந்திராவில் இருந்து அவரை ராஜ்யசபாவுக்கு அனுப்ப பாஜக மேலிடம் திட்டமிட்டுள்ளது. வரும் ஜூன் 21-ம் தேதியுடன் ஆந்திராவில் நான்கு ராஜ்யசபா உறுப்பினர்களின் பதவிக்காலம் முடிவடைகிறது. இதில் மூன்று பேர் ஒய்எஸ்ஆர் காங்கிரஸ் கட்சியைச் சேர்ந்தவர்கள். ஒருவர் தெலுங்கு தேசம் கட்சியைச் சேர்ந்தவர். எனவே மே மாதத்தில் புதிய உறுப்பினர்களைத் தேர்ந்தெடுக்கும் தேர்தல் நடைபெற உள்ளது. 

ஆந்திர சட்டசபையில் தற்போதைய பலத்தின் அடிப்படையில் ஆளும் தெலுங்கு தேசம் கூட்டணி நான்கு இடங்களையும் எளிதில் கைப்பற்றும் நிலையில் உள்ளது. இந்த சூழலில் தெலுங்கு தேசம் கட்சி இரண்டு இடங்களை தனக்கு வைத்துக் கொண்டு, கூட்டணி கட்சிகளான பாஜக மற்றும் ஜனசேனாவுக்கு தலா ஒரு இடத்தை ஒதுக்க முடிவு செய்துள்ளது. 
பாஜகவுக்கு ஒதுக்கப்படும் இடத்தில் அண்ணாமலையை நிறுத்தி ஆந்திராவில் இருந்து ராஜ்யசபா எம்பியாக அனுப்ப ஆந்திர பாஜக நிர்வாகிகளும் மேலிடமும் ஒப்புக்கொண்டுள்ளதாக தகவல்கள் வெளியாகியுள்ளன. 

ஜனசேனா சார்பில் கட்சித் தலைவரும் ஆந்திர துணை முதல்வருமான பவன் கல்யாணின் நெருங்கிய நண்பரான லிங்கமனேனி ரமேஷ் தேர்ந்தெடுக்கப்பட உள்ளார். தெலுங்கு தேசம் கட்சி இரண்டு இடங்களில் ஒன்றுக்கு முதல்வர் சந்திரபாபு நாயுடுவின் மகனும் அமைச்சருமான நாரா லோகேஷின் நண்பரான சனா சதீஷ் பரிசீலிக்கப்படுகிறார். மற்றொரு இடத்துக்கு கட்சிக்குள் போட்டி நிலவுவதாகவும் கூறப்படுகிறது. 

இந்த முடிவு தமிழக அரசியலில் பெரும் தாக்கத்தை ஏற்படுத்தும் என எதிர்பார்க்கப்படுகிறது. அண்ணாமலை தமிழகத்தில் இருந்து விலகி மேல்மட்ட அரசியலுக்கு செல்லும் இந்த நகர்வு, பாஜகவின் தமிழக உத்தியில் மாற்றத்தை குறிக்கிறது. ஆந்திர முதல்வர் சந்திரபாபு நாயுடு தலைமையிலான கூட்டணி அரசியல் சமன்பாடுகளும் இதில் முக்கிய பங்கு வகிக்கின்றன. இந்த செய்தி வெளியான சில மணி நேரங்களிலேயே அரசியல் வட்டாரத்தில் பெரும் விவாதத்தை ஏற்படுத்தியுள்ளது. 

இதையும் படிங்க: ஸ்லீப்பர் கோச் பஸ்களுக்கு தடை விதிக்க திட்டம்!! ஆந்திர அரசு தீவிர ஆலோசனை!