அண்ணாமலைக்கு பின்னடைவு? ‘வீ தி லீடர்ஸ்’ அமைப்பில் விரிசல்? மீண்டும் பாஜகவுக்கு திரும்பிய முக்கிய நிர்வாகிகள்!

அண்ணாமலை தலைமையிலான ‘வீ தி லீடர்ஸ்’ அமைப்பில் இணைந்திருந்த சில முன்னாள் பா.ஜ., நிர்வாகிகள் மீண்டும் பா.ஜ.,வில் இணைந்துள்ள சம்பவம் தமிழக அரசியல் வட்டாரத்தில் கவனம் பெற்றுள்ளது.

தமிழக பா.ஜ., தலைவராக இருந்த அண்ணாமலை, தனது அதிரடி அரசியல் செயல்பாடுகள் மூலம் கட்சிக்குள்ளும், கட்சிக்கு வெளியிலும் தனக்கென ஆதரவாளர்கள் வட்டத்தை உருவாக்கினார். சட்டசபை தேர்தலுக்குப் பிறகு பா.ஜ.,வில் ஏற்பட்ட கருத்து வேறுபாடுகளைத் தொடர்ந்து, அவர் கட்சியில் இருந்து விலகி ‘வீ தி லீடர்ஸ்’ என்ற அமைப்பை தொடங்கியதாக கூறப்படுகிறது.

அண்ணாமலை மீதான ஆதரவின் காரணமாக தமிழக பா.ஜ.,வைச் சேர்ந்த பல்வேறு நிர்வாகிகள் மற்றும் ஆதரவாளர்கள் அவருடன் இணைந்து ‘வீ தி லீடர்ஸ்’ அமைப்பில் சேர்ந்தனர். இதனால், அண்ணாமலையின் புதிய அரசியல் பயணம் எந்த அளவுக்கு தாக்கத்தை ஏற்படுத்தும் என்ற எதிர்பார்ப்பும் அப்போது உருவானது.

இதையும் படிங்க: முதல்ல உதயநிதி... இப்ப நயினார்..! இவ்வளவு அநாகரீகமா.? கொந்தளித்த அண்ணாமலை..!!

ஆனால், தற்போது சூழ்நிலையில் மாற்றம் ஏற்பட்டுள்ளதாக அரசியல் வட்டாரங்களில் பேசப்படுகிறது. பா.ஜ.,வில் இருந்தபோது அண்ணாமலை மேற்கொண்ட அதிரடி அரசியல் பாணியில் இருந்து தற்போது அவர் விலகி, அமைதியான அணுகுமுறையை கடைப்பிடித்து வருவதாகவும் கூறப்படுகிறது.

அதே நேரத்தில், தங்களுடன் வந்த நிர்வாகிகளுக்கு எதிர்பார்த்த அளவில் பொறுப்புகள் வழங்கப்படவில்லை என்ற அதிருப்தியும் சிலரிடம் ஏற்பட்டதாக தகவல்கள் வெளியாகியுள்ளன. இதன் காரணமாக ‘வீ தி லீடர்ஸ்’ அமைப்பில் இருந்து சிலர் மீண்டும் பா.ஜ., பக்கம் திரும்பத் தொடங்கியுள்ளதாக கூறப்படுகிறது.

அந்த வகையில், திருநெல்வேலி மாவட்டத்தைச் சேர்ந்த முன்னாள் பா.ஜ., நிர்வாகிகள் சிலர் மீண்டும் கட்சியில் இணைந்துள்ளனர். பா.ஜ., ஓ.பி.சி., அணி முன்னாள் மாவட்ட செயலர் வெங்கடேஷ், ‘புரோட்டாகால்’ பிரிவின் முன்னாள் மாவட்ட செயலர்கள் பேச்சிமுத்து, கோவிந்தராஜன், முன்னாள் கிளை தலைவர் ராஜி உள்ளிட்டோர் நேற்று திருநெல்வேலியில் நடைபெற்ற நிகழ்ச்சியில் மீண்டும் பா.ஜ.,வில் இணைந்தனர்.

தமிழக பா.ஜ., தலைவர் நயினார் நாகேந்திரன் முன்னிலையில் அவர்கள் கட்சியில் இணைந்ததாக தெரிவிக்கப்பட்டுள்ளது. இந்த நிகழ்வு, அண்ணாமலையுடன் சென்ற முன்னாள் நிர்வாகிகள் மத்தியில் ஏற்பட்டுள்ள அரசியல் நகர்வுகள் குறித்த விவாதத்தை மீண்டும் ஏற்படுத்தியுள்ளது.

இருப்பினும், சில நிர்வாகிகள் மீண்டும் பா.ஜ.,வில் இணைந்திருப்பதை வைத்து ‘வீ தி லீடர்ஸ்’ அமைப்பின் ஒட்டுமொத்த நிலைப்பாட்டை மதிப்பிட முடியாது. அடுத்தடுத்து மேலும் முக்கிய நிர்வாகிகள் எந்த முடிவை எடுக்கிறார்கள் என்பதே அண்ணாமலையின் அமைப்புக்கு இது பின்னடைவா அல்லது சாதாரண அரசியல் நகர்வா என்பதை தீர்மானிக்கும்.

இதையும் படிங்க: சென்னையில் நாளை அண்ணாமலை தலைமையில் பிரமாண்ட பேரணி! வீ த லீடர்ஸ் வெளியிட்ட முக்கிய அறிவிப்பு!