'மிஸ்டு கால்' மூலம் உறுப்பினர் சேர்க்கை! அண்ணாமலையின் 'வீ தி லீடர்ஸ்' உறுப்பினர் சேர்க்கையில் புதிய முறை!

சென்னை: 'வீ தி லீடர்ஸ்' அமைப்பின் உறுப்பினர் சேர்க்கையை மேலும் அதிகரிக்கும் வகையில், 'மிஸ்டு கால்' இயக்கத்தை தொடங்க அதன் தலைவர் அண்ணாமலை திட்டமிட்டுள்ளதாக தகவல் வெளியாகியுள்ளது. இணையதளம் மூலம் உறுப்பினராக முடியாதவர்களையும் அமைப்புக்குள் கொண்டு வர இந்த புதிய முயற்சி மேற்கொள்ளப்பட உள்ளதாக கூறப்படுகிறது.

தமிழக பா.ஜ., முன்னாள் தலைவர் அண்ணாமலை, அக்கட்சியில் இருந்து விலகிய பின்னர் 'வீ தி லீடர்ஸ்' என்ற அமைப்பை தொடங்கி செயல்படுத்தி வருகிறார். அந்த அமைப்பு சார்பில் கடந்த ஜூலை மாதம் முழுவதும் போதைப் பொருட்களுக்கு எதிரான விழிப்புணர்வு நிகழ்ச்சிகள் நடத்தப்பட்டன. தற்போது ஆகஸ்ட் மாதம் சுற்றுச்சூழல் பாதுகாப்பு தொடர்பான விழிப்புணர்வு நடவடிக்கைகள் முன்னெடுக்கப்பட்டு வருகின்றன.

இந்த நிலையில், அமைப்பின் உறுப்பினர் எண்ணிக்கையை கணிசமாக உயர்த்த அண்ணாமலை கவனம் செலுத்தி வருவதாக தகவல் வெளியாகியுள்ளது. இதுவரை சுமார் 19.47 லட்சம் பேர் 'வீ தி லீடர்ஸ்' அமைப்பில் இணைந்துள்ளதாக அந்த அமைப்பின் நிர்வாகிகள் தரப்பில் தெரிவிக்கப்பட்டுள்ளது.

இதையும் படிங்க: "வைகையை விட அழுக்கு உதயநிதி பேச்சு"..! அவ்ளோ மோசம்... அண்ணாமலை தாக்கு.!

அமைப்பில் குறைந்தது 50 லட்சம் உறுப்பினர்களை இணைத்த பிறகே அரசியல் கட்சி தொடங்குவது என்ற இலக்கில் அண்ணாமலை உறுதியாக இருப்பதாகவும் கூறப்படுகிறது. இதனால், அடுத்த கட்டமாக உறுப்பினர் சேர்க்கையை விரைவுபடுத்த திட்டமிடப்பட்டுள்ளதாக தெரிகிறது.

குறிப்பாக, கிராமப்புறங்களில் வசிப்பவர்கள் மற்றும் இணையதள பயன்பாட்டில் அதிக பரிச்சயம் இல்லாதவர்கள், ஆன்லைன் வழியாக உறுப்பினராக இணைவதில் சிரமங்களை எதிர்கொள்வதாக நிர்வாகிகள் தெரிவித்துள்ளனர். இதை சமாளிக்க 'மிஸ்டு கால்' மூலம் ஆரம்ப கட்ட தொடர்பை ஏற்படுத்தும் திட்டம் தயாராகி வருவதாக கூறப்படுகிறது.

இந்த முறையில் மிஸ்டு கால் கொடுப்பவர்களை உடனடியாக உறுப்பினர்களாக சேர்க்காமல், பின்னர் அவர்களை தொடர்பு கொண்டு தேவையான விவரங்களை சேகரித்து, சரிபார்ப்புக்குப் பிறகே உறுப்பினர் சேர்க்கையில் இணைக்க திட்டமிடப்பட்டுள்ளதாக தகவல் வெளியாகியுள்ளது.

ஏற்கனவே சில அரசியல் கட்சிகள் மிஸ்டு கால் மூலம் உறுப்பினர் சேர்க்கையை மேற்கொண்டுள்ள நிலையில், அதே உத்தியை வேறுபட்ட முறையில் பயன்படுத்த அண்ணாமலை தரப்பு திட்டமிட்டுள்ளதாக கூறப்படுகிறது. இதற்கான அதிகாரப்பூர்வ அறிவிப்பு விரைவில் வெளியாகலாம் என எதிர்பார்க்கப்படுகிறது.

இதையும் படிங்க: வைகை ஆற்றை சுத்தப்படுத்தும் WE THE LEADERS அமைப்பு..! 80 மரக்கன்றுகளை நடும் அண்ணாமலை..!