ஆரோவில் சுதந்திரத்தில் அதிகாரம்.. சர்வதேச நகரமா.? மதவாத வேட்டைக்காடா..? வேல்முருகன் ஆவேசம்.!!

தமிழக வாழ்வுரிமைக் கட்சி தலைவர் தி.வேல்முருகன் ஆரோவில் தொடர்பாக கடும் கண்டனத்தை வெளியிட்டுள்ளார். உலக அமைதிக்கும் மனித ஒருமைப்பாட்டிற்குமான சர்வதேசப் பெருவெளியாக விளங்கும் ஆரோவில் எந்தவொரு மதவாதக் கும்பலின் ஆதிக்கச் சொத்தும் அல்ல, அரசியல் வேட்டைக்காடும் அல்ல என அவர் தெரிவித்துள்ளார்.தற்போது நிலப் பரிமாற்ற ஊழல்கள், இயற்கை வளச் சுரண்டல்கள் உள்ளிட்ட நிர்வாகத் துரோகங்கள் எல்லை மீறிவிட்டதாக அவர் சுட்டிக்காட்டியுள்ளார்.

அரவிந்தர் அன்னையின் கனவைச் சீரழிக்கும் இத்தகைய செயல்களை வன்மையாகக் கண்டித்துள்ளார். குறிப்பாக, தலைமுறை தலைமுறையாகப் பாதுகாக்கப்பட்ட ‘அன்னபூர்ணா’ இயற்கை விவசாயப் பண்ணையின் நூறு ஏக்கர் நிலத்தைச் சென்னை ஐஐடிக்கு முப்பத்திமூன்று ஆண்டுகள் குறைந்த தொகையிலான குத்தகைக்குத் தாரைவார்த்த நிர்வாகத்தின் அதிகாரத் திமிரை அவர் சாடியுள்ளார்.

மேலும், ஆரோவில்லின் நிர்வாகத்தை ஆர்.எஸ்.எஸ். மற்றும் இந்துத்துவச் சக்திகள் தங்களின் மதவாதக் கட்டுப்பாட்டிற்குள் கொண்டுவரத் துடிக்கும் அப்பட்டமான அத்துமீறல்களையும் அவர் கண்டித்துள்ளார். உலகளாவிய மனிதநேயக் களத்தை ஒரு மதத்தின் குறுங்குழுவாதச் சிறையாக்கத் துடிக்கும் இத்தகைய சூழ்ச்சி முளையிலேயே கிள்ளியெறியப்பட வேண்டும் என அவர் வலியுறுத்தியுள்ளார். பன்னாட்டு மனிதர்களின் அமைதிப் பூங்காவை ஆக்கிரமிப்பாளர்களுக்கும் கார்ப்பரேட் ஏவலாளர்களுக்கும் விற்றுத் தீர்க்க எவருக்கும் உரிமையில்லை என்றும் அவர் தெரிவித்துள்ளார்.

இதையும் படிங்க: மதுரை மீனாட்சியை தரிசித்த முதல்வர் விஜய்..! பூரண கும்ப மரியாதை... வழிநெடுகிலும் காத்திருந்த தொண்டர்கள்..!!

மத்திய மற்றும் மாநில அரசுகளை நோக்கி அழைப்பு விடுத்த அவர், நில முறைகேடுகள், பண்ணைத் தாரைவார்ப்பு, இந்துத்துவ அதிகாரத் திணிப்பு என அனைத்தின் மீதும் தயவுதாட்சண்யமற்ற சுயாதீன விசாரணையை உடனடியாக நடத்தி உண்மைகளை வெளிப்படுத்த வேண்டும் எனக் கோரியுள்ளார். ஆரோவில்லின் நிலத்தையும் அதன் மாண்பையும் பாதுகாக்க உறுதியான நடவடிக்கைகளை உடனே எடுக்க வேண்டும் என்றும் தமிழக வாழ்வுரிமைக் கட்சியின் சார்பில் அவர் வலியுறுத்தியுள்ளார்.ஆரோவில்லின் சுதந்திரத்தையும் சர்வதேசத் தன்மையையும் பாதுகாப்பதே முதன்மையானது என அவர் வலியுறுத்தியுள்ளார்.

இதையும் படிங்க: இடைத் தேர்தல்... தயாராகும் தாராபுரம்..! செப்.30 ல் CM விஜய் அனல் பிரச்சாரம்..!!