ராகுலும், சோனியாவும் வாக்குத் திருட்டால் எம்.பி.க்கள் ஆனார்களா? தேர்தல் கமிஷன் விவகாரம்! பாஜக கேள்வி!

மின்னணு வாக்குப்பதிவு இயந்திரங்கள் மற்றும் தேர்தல் நடைமுறைகள் குறித்து காங்கிரஸ் உள்ளிட்ட எதிர்க்கட்சிகள் தொடர்ந்து கேள்வி எழுப்பி வரும் நிலையில், அதற்கு பாஜக கடும் பதிலடி கொடுத்துள்ளது.

காங்கிரஸ் கட்சி தேர்தல் கமிஷனை மையமாக வைத்து மக்களிடையே குழப்பத்தை ஏற்படுத்த முயற்சிப்பதாக பாஜக தேசிய செய்தித் தொடர்பாளர் சம்பித் பத்ரா குற்றம்சாட்டியுள்ளார்.

இது தொடர்பாக அவர் கூறுகையில், வாக்காளர் பட்டியல் சிறப்பு திருத்தப் பணி உள்ளிட்ட விவகாரங்கள் குறித்து கடந்த சில நாட்களாக தவறான தகவல்களும் போலிச் செய்திகளும் பரப்பப்படுவதாக தெரிவித்தார்.

இதையும் படிங்க: உங்களுக்கு என்ன வேலை.? கோவை தவெகவினரை சிறைபிடித்த பாஜகவினர்.! பரபரப்பு..!!

தேர்தல் கமிஷன் மற்றும் உச்ச நீதிமன்றத்தில் நிலுவையில் உள்ள விவகாரங்கள் குறித்து மக்களுக்கு உண்மையான தகவல்களை எடுத்துச் செல்வது அரசியல் கட்சிகளின் பொறுப்பு என்றும் அவர் குறிப்பிட்டார்.

தேர்தல் கமிஷன் தொடர்பாக உச்ச நீதிமன்றத்தில் மனு தாக்கல் செய்யப்பட்டுள்ளதை சுட்டிக்காட்டிய சம்பித் பத்ரா, தலைமை தேர்தல் கமிஷனரை பதவியில் இருந்து நீக்க வேண்டும் என்ற கோரிக்கையும் அந்த மனுவில் இடம்பெற்றுள்ளதாக தெரிவித்தார். இந்த விவகாரத்தில் இரு தரப்பினரும் தங்கள் வாதங்களை முன்வைக்க நீதிமன்ற நடைமுறை நடைபெறும் என்றும் அவர் கூறினார்.

மேலும், காங்கிரஸ் மற்றும் அதன் கூட்டணி கட்சிகள் எப்படியாவது ஆட்சி மாற்றத்தை ஏற்படுத்தி ராகுல் காந்தியை அதிகாரத்திற்கு கொண்டு வர திட்டமிட்டு செயல்படுவதாக சம்பித் பத்ரா விமர்சித்தார். ஜனநாயகம் மற்றும் அரசியலமைப்பு அமைப்புகள் மீது திட்டமிட்ட தாக்குதல் நடத்தப்படுவதாகவும் அவர் குற்றம்சாட்டினார்.

மின்னணு வாக்குப்பதிவு இயந்திரங்கள் மீதான குற்றச்சாட்டுகளையும் பாஜக செய்தித் தொடர்பாளர் கடுமையாக விமர்சித்தார். குறிப்பாக, “ராகுலும், சோனியாவும் வாக்குத் திருட்டின் மூலமாகத்தான் எம்.பி.க்களாக ஆனார்களா?” என்று அவர் கேள்வி எழுப்பினார்.

மேலும், வாக்குத் திருட்டு மூலம் தேர்தல்கள் நடைபெற்றதாக எதிர்க்கட்சிகள் குற்றம்சாட்டினால், கர்நாடகா, கேரளா, தமிழகம் மற்றும் இமாச்சலப் பிரதேசங்களில் அமைந்த அரசுகளும் அதே முறையில்தான் உருவானவையா என்றும் சம்பித் பத்ரா கேள்வி எழுப்பினார்.

தேர்தல் நடைமுறைகள் தொடர்பாக ஆளும் கட்சிக்கும் எதிர்க்கட்சிகளுக்கும் இடையே தொடர்ந்து கருத்து மோதல் நிலவி வரும் நிலையில், பாஜகவின் இந்த கேள்விகள் அரசியல் வட்டாரத்தில் புதிய விவாதத்தை ஏற்படுத்தியுள்ளன.

இதையும் படிங்க: முதல்வர் விஜய்க்கு தோல்வி பயம்!! தவெக ஆட்சி நீடிக்க வாய்ப்பில்லை! நயினார் நாகேந்திரன் விமர்சனம்!