“மக்களே நாளை திருவிழாவாக கொண்டாட தயாராகுங்கள்...” - விடிந்ததுமே சி.எம்.விஜய் வெளியிட்ட முக்கிய அறிவிப்பு...!

வருகிற அக்டோபர் 2-ஆம் தேதி காந்தி ஜெயந்தியை முன்னிட்டு தமிழகம் முழுவதும் நடைபெற உள்ள கிராம சபைக் கூட்டங்களில், பொதுமக்கள் அனைவரும் பெருந்திரளாகப் பங்கேற்க வேண்டும் என்று தமிழக முதலமைச்சர் ஜோசப் விஜய் வேண்டுகோள் விடுத்துள்ளார்.

காந்தி ஜெயந்தியை முன்னிட்டு 2026 அக்டோபர் 2ஆம் தேதி தமிழ்நாடு முழுவதும் அனைத்து கிராம ஊராட்சிகளிலும் கிராம சபைக் கூட்டங்கள் நடைபெற உள்ளன. இதற்கான அறிவிப்புகளை பல்வேறு மாவட்ட ஆட்சியர்கள் வெளியிட்டுள்ளனர். 

கிராம சபைக் கூட்டத்தில் கிராம ஊராட்சியின் நிர்வாகம், நிதிநிலை, மேற்கொள்ளப்பட்ட மற்றும் நடைபெற்று வரும் வளர்ச்சிப் பணிகள், குடிநீர், தூய்மை, சுகாதாரம், வேலைவாய்ப்பு உள்ளிட்ட பல்வேறு முக்கிய பிரச்சினைகள் குறித்து விவாதிக்கப்பட உள்ளது. அரசின் பல்வேறு நலத்திட்டங்கள் மற்றும் அவற்றின் செயல்பாடுகள் குறித்தும் பொதுமக்களுக்கு விளக்கம் அளிக்கப்படும்.

இதையும் படிங்க: விலைவாசி உயர்வுதான் விஜய் அரசின் சாதனை! மதுராந்தகம் பிரச்சாரத்தில் கனிமொழி எம்.பி ஆவேசம்!

மேலும், கிராமத்தின் தேவைகள் மற்றும் பொதுமக்களின் கோரிக்கைகள் தொடர்பாக கிராம சபையின் ஒப்புதலுடன் கூடுதல் தீர்மானங்களையும் விவாதத்திற்கு எடுத்துக்கொள்ளலாம். கூட்டத்தில் நிறைவேற்றப்படும் தீர்மானங்கள் முறையாக பதிவு செய்யப்பட்டு, அவற்றின் மீது உரிய நடவடிக்கை எடுக்கப்பட வேண்டும் என அறிவுறுத்தப்பட்டுள்ளது.

இதனிடையே, தமிழக முதலமைச்சர் விஜய் கிராம சபை கூட்டத்தில் நாளை மக்கள் பெருந்திரளாக பங்கேற்க வேண்டுமென கோரிக்கை விடுத்துள்ளார். இதுகுறித்து தமிழக அரசின் செய்தி மக்கள் தொடர்புத்துறை இயக்குநர் வெளியிட்டுள்ள அதிகாரப்பூர்வ செய்திக்குறிப்பில் கூறப்பட்டிருப்பதாவது:  தேசத்தந்தை மகாத்மா காந்தியடிகளின் பிறந்த நாளான அக்டோபர் 2, காந்தி ஜெயந்தி அன்று மக்கள் பங்கேற்புடன் வளர்ச்சியைத் தீர்மானிக்க அனைத்துக் கிராம ஊராட்சிகளிலும் (செங்கல்பட்டு மற்றும் திருப்பூர் மாவட்டங்கள் நீங்கலாக) கிராம சபை நடைபெற உள்ளது.

கிராமங்கள் வளர்ந்தால்தான் தமிழ்நாடு முழுமையாக வளரும் என்ற நோக்கில் நமது அரசு செயல்படுகிறது. ஊரக வீட்டுவசதி, சாலைகள், குடிநீர், தூய்மை மற்றும் சுகாதாரம், ஊரக வேலை உறுதி, மகளிர் சுயஉதவிக் குழுக்களின் பொருளாதார நடவடிக்கைகள், வாழ்வாதார மேம்பாடு, மகளிர் சுயஉதவிக் குழுக்களின் பங்களிப்புடன் செயல்படும் பள்ளி மாணவர்களுக்கான பெருந்தலைவர் காமராஜர் காலை உணவுத் திட்டம் ஆகியவற்றின் பயன்கள் தகுதியான ஒவ்வொரு குடும்பத்தையும் சென்றடைய வேண்டும். தமிழ்நாட்டின் அனைத்து கிராமங்களில் அனைத்து தரப்பினருக்கும் உரிய பயன்கள் சென்றடைவதிலேயே திட்டங்களின் உண்மையான வெற்றி உள்ளது; இதற்கு மக்களையும், அரசையும் இணைக்கும் பாலமாக கிராம சபை செயல்பட வேண்டும்.

"வலிமையான கிராமங்கள் வளமான தமிழ்நாடு" என்ற குறிக்கோளுடன், எதிர்வரும் 02.10.2026 கிராம சபைக் கூட்டத்தில் திரளாக மக்கள் பங்கேற்று திருவிழாவாக கொண்டாட வேண்டும் என்று அன்புடன் கேட்டுக்கொள்கிறேன். வாருங்கள்! கிராம சபையில் பங்கேற்போம்! வலிமையான கிராமங்களை உருவாக்குவோம்! வளமான தமிழ்நாட்டை கட்டமைப்போம்!” எனக்குறிப்பிடப்பட்டுள்ளது. 

2026 தமிழக சட்டமன்றத் தேர்தலில் தமிழக வெற்றி கழகம் வெற்றி பெற்று, முதலமைச்சராக ஜோசப் விஜய் பொறுப்பேற்ற பிறகு நடைபெறும் மிக முக்கிய அதிகாரப்பூர்வ முதல் காந்தி ஜெயந்தி கிராம சபைக் கூட்டம் இதுவாகும். செங்கல்பட்டு மற்றும் திருப்பூர் மாவட்டங்கள் நீங்கலாக மற்ற இடங்களில் கூட்டம் நடைபெறும் எனக் குறிப்பிடப்பட்டுள்ளது. இந்த இரு மாவட்டங்களில் மட்டும் தற்பொழுது இடைத்தேர்தலை முன்னிட்டு தேர்தல் நடத்தை விதிகள் அமலில் இருப்பதால் கிராம சபை கூட்டம் நடத்த விலக்கு அளிக்கப்பட்டுள்ளது குறிப்பிடத்தக்கது. 

இதையும் படிங்க: தில்லா திமுகவை எதிர்ப்பது விஜய் தான்..! பச்சை குழந்தை TO பாட்டி வரை என் சொந்தங்கள்..!! முதல்வர் உறுதி.!!