மீனாட்சி அம்மன் கோவிலுக்கு முதல்வர் விஜய் விசிட்? பாதுகாப்பு பணியில் போலீசார் தீவிரம்!

தமிழக முதலமைச்சர் விஜய் வரும் செப்டம்பர் 28-ம் தேதி மதுரைக்கு வர உள்ள நிலையில், அவரது பயணத்தை முன்னிட்டு நகரில் பாதுகாப்பு மற்றும் முன்னேற்பாட்டு பணிகள் தீவிரமடைந்துள்ளன. அரசு ராஜாஜி மருத்துவமனையில் நடைபெறும் நிகழ்ச்சியில் ‘தாய்மாமன் தங்க மோதிரம்’ திட்டத்தை தொடங்கி வைக்க உள்ள அவர், மதுரை மீனாட்சி அம்மன் கோவிலிலும் தரிசனம் செய்ய திட்டமிட்டுள்ளதாக தகவல்கள் வெளியாகியுள்ளன. இதையடுத்து கோவில் மற்றும் அதனைச் சுற்றியுள்ள பகுதிகளில் போலீசார் பாதுகாப்பு ஏற்பாடுகளை ஆய்வு செய்து வருகின்றனர்.

மதுரை மீனாட்சி அம்மன் கோவிலில் 17 ஆண்டுகளுக்குப் பிறகு கடந்த செப்டம்பர் 17-ம் தேதி கும்பாபிஷேகம் நடைபெற்றது. இதையடுத்து மண்டல பூஜைகள் தொடர்ந்து நடைபெற்று வருகின்றன. இந்த நிலையில் முதலமைச்சர் விஜய்யின் கோவில் வருகை திட்டம் கூடுதல் கவனம் பெற்றுள்ளது. கோவிலில் அவரது தரிசனத்துக்கான நேரம் மற்றும் பாதுகாப்பு ஏற்பாடுகள் குறித்து அதிகாரிகள் ஆலோசித்து வருகின்றனர்.

முதலமைச்சரின் முக்கிய நிகழ்ச்சி ‘தாய்மாமன் தங்க மோதிரம்’ திட்ட தொடக்க விழாவாகும். அரசு மருத்துவமனைகளில் பிறக்கும் குழந்தைகளுக்கு ஒரு கிராம் தங்க மோதிரம் வழங்கும் இந்த திட்டம், செப்டம்பர் 28-ம் தேதி தொடங்கப்பட உள்ளது. முதலில் உசிலம்பட்டி அரசு மருத்துவமனையில் விழா நடைபெறும் என அறிவிக்கப்பட்ட நிலையில், பின்னர் மதுரை அரசு ராஜாஜி மருத்துவமனைக்கு நிகழ்ச்சி மாற்றப்பட்டதாக அதிகாரிகள் தரப்பில் தெரிவிக்கப்பட்டுள்ளது.

இதையும் படிங்க: ரீல்ஸ் இல்லைனா தவெக ஃப்யூஸ் போன மாதிரி! மதுராந்தகம் பிரச்சாரத்தில் தவெகவை விளாசிய எடப்பாடி பழனிசாமி!

முதல்வரின் வருகையை முன்னிட்டு ராஜாஜி மருத்துவமனை வளாகம் மற்றும் சுற்றுப்புறங்களில் சாலை சீரமைப்பு, தூய்மைப் பணிகள், மழைநீர் வடிகால் சீரமைப்பு உள்ளிட்ட பணிகள் வேகமாக நடைபெற்று வருகின்றன. போலீஸ் அதிகாரிகளும் மருத்துவமனை வளாகம், முக்கிய நுழைவுவாயில்கள் மற்றும் முதல்வர் செல்லும் வழித்தடங்களை ஆய்வு செய்து வருகின்றனர்.

முதல்வர் வருகையையொட்டி மதுரை நகரில் போக்குவரத்து மற்றும் கூட்ட நெரிசலை கட்டுப்படுத்துவதற்கான நடவடிக்கைகளும் திட்டமிடப்பட்டுள்ளன. தேவைக்கேற்ப பிற மாவட்டங்களில் இருந்தும் போலீசார் பாதுகாப்புப் பணிக்கு அழைக்கப்படலாம் என தகவல்கள் வெளியாகியுள்ளன. இதற்கிடையே, மீனாட்சி அம்மன் கோவில் தரிசனம் தொடர்பான இறுதி நேரம் மற்றும் முழுமையான பாதுகாப்பு திட்டம் அதிகாரப்பூர்வ தகவலின் அடிப்படையில் இறுதி செய்யப்படும் என போலீஸ் வட்டாரங்கள் தெரிவித்துள்ளன.

செப்டம்பர் 28-ம் தேதி மதுரையில் முதலமைச்சர் விஜய் பங்கேற்கும் நிகழ்ச்சிகளை முன்னிட்டு நகரம் முழுவதும் எதிர்பார்ப்பு அதிகரித்துள்ள நிலையில், அவரது கோவில் தரிசன திட்டம் உறுதியாகும் பட்சத்தில் பாதுகாப்பு ஏற்பாடுகள் மேலும் அதிகரிக்க வாய்ப்புள்ளது.

இதையும் படிங்க: மின் மிகை மாநிலம் மின் தட்டுப்பாடு மாநிலமாகிவிட்டது! தவெக அரசை விளாசிய தேமுதிக பிரேமலதா விஜயகாந்த்!