ஊழல் புகாரில் சிக்கினால் அமைச்சர் பதவி பறிக்கப்படும்! யார்? இன்னார் என பார்க்கமாட்டேன்! முதலமைச்சர் விஜய் வார்னிங்!

சென்னை தலைமைச் செயலகத்தில் முதலமைச்சர் விஜய் தலைமையில் இன்று நடைபெற்ற தமிழக அமைச்சரவைக் கூட்டத்தில், அமைச்சர்களுக்கு கடுமையான ஒழுக்க நெறி அறிவுறுத்தல்கள் வழங்கப்பட்டதாக தகவல்கள் வெளியாகியுள்ளன. குறிப்பாக, ஊழல் தொடர்பான எந்தவொரு புகாரிலும் அமைச்சர்கள் சிக்கினால், உடனடியாக நடவடிக்கை எடுக்கப்படும் என்றும், தேவையான சூழலில் அமைச்சர் பதவியே பறிக்கப்படும் என்றும் முதலமைச்சர் விஜய் எச்சரித்ததாக கூறப்படுகிறது.

2026-27ஆம் நிதியாண்டுக்கான தமிழக அரசின் முதல் முழுமையான பட்ஜெட்டை தாக்கல் செய்வதற்கான இறுதிக்கட்ட ஆலோசனைகளின் ஒரு பகுதியாக இந்த அமைச்சரவைக் கூட்டம் நடைபெற்றது. பட்ஜெட்டில் இடம்பெற வேண்டிய முக்கிய அறிவிப்புகள், தேர்தல் வாக்குறுதிகள் மற்றும் மக்கள் நலத் திட்டங்கள் குறித்து அமைச்சர்களுடன் விரிவாக ஆலோசிக்கப்பட்டதாக தகவல்கள் தெரிவிக்கின்றன.

அதேநேரத்தில், நிர்வாக ஒழுக்கம் மற்றும் வெளிப்படைத்தன்மை தொடர்பாகவும் முதலமைச்சர் விஜய் அமைச்சர்களுக்கு பல்வேறு அறிவுறுத்தல்களை வழங்கியதாக கூறப்படுகிறது. த.வெ.க. அரசு எந்தவித லஞ்சம் அல்லது ஊழலுக்கும் இடமளிக்காத அரசாக செயல்பட வேண்டும் என்பதில் அனைத்து அமைச்சர்களும் உறுதியாக இருக்க வேண்டும் என்று அவர் வலியுறுத்தியதாக தகவல்கள் வெளியாகியுள்ளன.

இதையும் படிங்க: ஆம்ஸ்ட்ராங் கொலை வழக்கில் சிபிஐ விசாரணைக்கு பச்சைக்கொடி... முதல்வர் விஜய்க்கு பொற்கொடி நன்றி!

மேலும், “தவறு செய்பவர்களில் தெரிந்தவர்கள், தெரியாதவர்கள் என்ற பாகுபாடு இருக்காது. யார் தவறு செய்தாலும் உடனடியாக நடவடிக்கை எடுக்கப்படும்” என்று முதலமைச்சர் விஜய் தெரிவித்ததாக கூறப்படுகிறது. அரசின் நம்பகத்தன்மையை காக்கும் வகையில் ஒவ்வொரு அமைச்சரும் பொறுப்புடன் செயல்பட வேண்டும் என்றும் அவர் அறிவுறுத்தியதாக தகவல் வெளியாகியுள்ளது.

அமைச்சர்கள் ஆய்வு என்ற பெயரில் பள்ளிகளுக்குச் சென்று, அங்குள்ள கல்விச் செயல்பாடுகளுக்கு இடையூறு ஏற்படுத்தக் கூடாது என்றும், பள்ளி வளாகங்களில் சமூக வலைதளங்களுக்காக வீடியோக்கள் அல்லது 'ரீல்ஸ்' உருவாக்குவது போன்ற செயல்களில் ஈடுபட வேண்டாம் என்றும் அவர் எச்சரித்ததாக கூறப்படுகிறது. அதேபோல், அரசு அலுவலகங்களிலும் தேவையற்ற நிகழ்வுகள் மற்றும் விளம்பர நோக்கிலான செயல்பாடுகளை தவிர்க்க வேண்டும் என்றும் அறிவுறுத்தியதாக தகவல்கள் தெரிவிக்கின்றன.

இந்த கருத்துகளை அமைச்சரவைக் கூட்டத்தின் போது குறிப்பிட்ட சில அமைச்சர்களை நேரடியாக சுட்டிக்காட்டி முதலமைச்சர் விஜய் பேசியதாக தகவல்கள் வெளியாகியுள்ளன. இருப்பினும், இந்த விவரங்கள் குறித்து தமிழக அரசு இதுவரை அதிகாரப்பூர்வ அறிக்கையை வெளியிடவில்லை. எனவே, அமைச்சரவைக் கூட்டத்தில் பேசப்பட்டதாக வெளியாகும் இந்த தகவல்கள் அதிகாரப்பூர்வ உறுதிப்படுத்தலுக்காக காத்திருக்கின்றன.

இதையும் படிங்க: முதல்வர் விஜய் தலைமையில் அமைச்சரவைக் கூட்டம்! முதல் பட்ஜெட்டில் வெளியாகும் முக்கிய அறிவிப்புகள்?!