“வரவேற்கிறோம்...” - மக்களால் விரட்டியடிக்கப்படும் தவெக வேட்பாளர்கள்... வீரபாண்டியன் சொன்ன அதிரடி கருத்து...!

திருப்பூர் மாவட்டம் தாராபுரம் பகுதியில் தேர்தல் பிரச்சாரத்தில் பங்கேற்க வந்த இந்திய கம்யூனிஸ்ட் கட்சியின் மாநிலச் செயலாளர் வீரபாண்டியன் செய்தியாளர்களை சந்தித்தார்.  அப்போது அவர் கூறுகையில், "நாடாளுமன்ற உறுப்பினர் சுப்பராயன் உள்ளிட்ட முக்கியத் தலைவர்களுடன் இணைந்து இங்கு தேர்தல் பிரச்சாரத்தில் ஈடுபட்டு வருகிறேன். மதுராந்தகம் பிரச்சாரத்தில் கம்யூனிஸ்ட் கட்சிக்கு பொதுமக்கள் மத்தியில் அமோக ஆதரவு கிடைத்து வருகிறது.

எங்கள் வேட்பாளர் லட்சுமணனுக்கு பொதுமக்கள் இந்தத் தேர்தலில் ஒரு வாய்ப்பு வழங்க வேண்டும். சட்டமன்றத்தில் எங்கள் கட்சியின் உறுப்பினர்களின் எண்ணிக்கை குறைவாக இருந்தாலும், அவர்களின் செயல்பாடுகளும் மக்கள் நலன் சார்ந்த குரலும் எப்போதுமே மிகச் சிறப்பாக இருக்கும். தமிழக சட்டமன்றத்தில் தவெக, திமுக, அதிமுக ஆகிய கட்சிகளின் உறுப்பினர்கள் அதிக எண்ணிக்கையில் இருந்தாலும், அவர்கள் யாரும் மூலதனக் கொள்ளைக்கு எதிராகப் பேசுவதில்லை.

வெறும் 4 உறுப்பினர்கள் மட்டுமே இருந்தாலும், மக்கள் நலன் காக்க நாங்கள் மட்டுமே குரல் கொடுத்து வருகிறோம். இந்தத் தேர்தல் வெற்றி தோல்விக்கான பிரச்சாரம் மட்டுமல்ல; உழைக்கும் பாட்டாளி மக்களை ஒன்றுபடுத்துவதற்கான களம். இன்று கல்வி மற்றும் சுகாதாரத் துறைகளில் நாம் பின் தங்கிய நிலையில் இருக்கிறோம்.

இதையும் படிங்க: மின்வெட்டு எதிரொலி! முதல்வர் விஜய் திடீர் ஆய்வு! சீரமைக்க அவகாசம் தேவை - அமைச்சர் நிர்மல்குமார் விளக்கம்!

எங்கு பார்த்தாலும் தனியார்மயமாகிவிட்டது. கல்வி மற்றும் மருத்துவத் துறைகள் முழுமையாக அரசுடைமையாக்கப்பட வேண்டும் என்பதே இடதுசாரிகளின் உறுதியான நிலைப்பாடு. நாங்கள் பெரும் பலம் வாய்ந்த 3 வெவ்வேறு கட்சிகளின் எதிர்ப்பை மீறி களத்தில் நிற்கிறோம். மதச்சார்பின்மை என்பதே எங்களின் முதன்மை நிபந்தனை.

அதில் உறுதியாக இருக்கும் அமைப்புகளுக்கே எங்களது ஆதரவு. ஆட்சியாளர்கள் தவறு செய்தால் கண்டிப்போம்; நல்லது செய்தால் ஆதரிப்போம். அடக்குமுறைகளும் சீண்டல்களும் கம்யூனிஸ்ட் கட்சிக்குப் புதிதல்ல, விமர்சனங்களை நாங்கள் எப்போதும் வரவேற்கிறோம்.

ஒரு கட்சியில் போட்டியிட்டு வெற்றி பெற்ற பிறகு, அந்தப் பதவியை ராஜினாமா செய்துவிட்டு வேறொரு கட்சியில் இணைந்து, மீண்டும் அதே தொகுதியில் போட்டியிடும் வேட்பாளரை நோக்கி மக்கள் கேள்வி எழுப்புவது மிகவும் அவசியமான ஒன்று. மக்களின் இந்த அரசியல் விழிப்புணர்வை நாங்கள் முழுமையாக வரவேற்கிறோம். என தெரிவித்தார். 
 

இதையும் படிங்க: தவெக வேட்பாளர்களுக்கு எதிர்ப்பு? நான் பிரசாரத்துக்கு வந்தால் எல்லாம் சரியாகிடும்! முதல்வர் விஜய் நம்பிக்கை!