சிக்கலில் சி.டி.ஆர்... செம்ம டென்ஷனில் விஜய்... மக்களிடம் டோட்டலாக டேமேஜ் ஆன தவெக இமேஜ்...!

தவெக ஆட்சிக்கு வந்ததில் இருந்து மின்சாரத் துறை தொடர்பான புகார்கள் தொடர்ந்து அதிகரித்து வருகின்றன. தவெக ஆட்சி அமைந்த சில நாட்களிலேயே தமிழகத்தில் அறிவிக்கப்படாத பல மணி நேர மின்வெட்டு ஏற்படத் தொடங்கியது. பல்வேறு இடங்களில் மின்மாற்றிகளில் ஏற்பட்ட கோளாறுகள், மின்சாரத் துண்டிப்பு உள்ளிட்ட பிரச்சினைகளால் மக்கள் வீதிகளில் இறங்கி இரவு, பகலாகப் போராடும் நிலை உருவானது.

இதையடுத்து, மின் கட்டண உயர்வு தொடர்பான சர்ச்சையும் தலைதூக்கியது. ஏற்கெனவே 100 யூனிட் மின்சாரம் இலவசமாக வழங்கப்படும் திட்டம் நடைமுறையில் உள்ள நிலையில், 500 யூனிட்டுக்குள் மின்சாரம் பயன்படுத்தும் நுகர்வோருக்கு 200 யூனிட் மின்சாரம் இலவசமாக வழங்கும் புதிய திட்டமும் தவெக ஆட்சியில் அமலுக்கு வந்தது. இருப்பினும், மின் கட்டணம் எதிர்பாராத வகையில் உயர்ந்தது பொதுமக்களை அதிர்ச்சிக்குள்ளாக்கியது.

கோடை வெப்பத்தின் தாக்கத்தால் மின்சாரப் பயன்பாடு அதிகரித்ததே மின் கட்டண உயர்வுக்குக் காரணம் என விளக்கம் அளிக்கப்பட்டாலும், பல இடங்களில் தவறான மின் கணக்கீடு உள்ளிட்ட பிரச்சினைகளும் தவெக ஆட்சிக்கு எதிரான விமர்சனங்கள் அதிகரிக்கக் காரணமாக அமைந்தன.

இதையும் படிங்க: இன்னும் 2 வருஷம்.. அதிமுகவுக்கு வந்த அதே நிலைமை திமுகவுக்கும் வரும்..!! அமைச்சர் நிர்மல் குமார் சாடல்..!!

புதிதாக ஆட்சிக்கு வந்த தவெக அரசுக்கு மின்வெட்டு விவகாரம் சவாலாக மாறிய நிலையில், எதிர்க்கட்சிகள் இந்த விவகாரத்தைச் சாதகமாகப் பயன்படுத்தி விமர்சனங்களை முன்வைத்து வந்தன. இந்நிலையில், இதுவரை இல்லாத அளவுக்கு ஒரு யூனிட் மின்சாரம் ரூ.35-க்கு கொள்முதல் செய்யப்படுவது பெரும் சர்ச்சையை ஏற்படுத்தியுள்ளது.

அதாவது, அக்டோபர் மாத மின் தேவையைச் சமாளிப்பதற்காக 4,500 மெகாவாட் மின்சாரம் கொள்முதல் செய்ய ஒப்பந்தப்புள்ளி கோரப்பட்டது. இதில், 1,500 மெகாவாட் மின்சாரத்தை ஒரு யூனிட்டுக்கு ரூ.31 முதல் ரூ.35 வரையிலும், மாலை நேர உச்சபட்ச மின் தேவையைச் சமாளிப்பதற்குத் தேவையான 200 மெகாவாட் மின்சாரத்தை ஒரு யூனிட்டுக்கு ரூ.33 முதல் ரூ.37 வரையிலும் கொள்முதல் செய்ய ஒப்பந்தம் மேற்கொள்ளப்பட்டுள்ளதாகக் கூறப்படுகிறது.

அண்டை மாநிலமான ஆந்திராவில் ஒரு யூனிட் மின்சாரம் ரூ.16 முதல் ரூ.20 வரையிலான விலையில் கொள்முதல் செய்யப்பட்டுள்ள நிலையில், தமிழக அரசு இதுவரை இல்லாத அளவுக்கு அதிக விலை கொடுத்து மின்சாரம் வாங்க ஒப்பந்தம் செய்திருப்பது சர்ச்சையை ஏற்படுத்தியுள்ளது.

கடந்த 2023ஆம் ஆண்டு திமுக ஆட்சியில் ஒரு யூனிட் மின்சாரம் ரூ.20-க்கு கொள்முதல் செய்யப்பட்டதே அதிகபட்ச விலையாகக் கருதப்பட்ட நிலையில், தற்போது தவெக அரசு ஒரு யூனிட் மின்சாரத்தை ரூ.37 வரை கொடுத்து வாங்குவது அதிர்ச்சியை ஏற்படுத்தியுள்ளது.

கடந்த ஆண்டைவிட இந்த ஆண்டு மின் தேவை கணிசமாக அதிகரித்திருந்தாலும், அதிக விலைக்கு மின்சாரம் கொள்முதல் செய்ய வேண்டிய நிலை ஏற்பட்டதற்கு அலட்சியமே காரணம் எனக் குற்றச்சாட்டுகள் முன்வைக்கப்படுகின்றன.

அக்டோபர் மாத மின் தேவைக்கான ஒப்பந்தப்புள்ளி, மின் தேவை ஏற்படுவதற்கு ஒரு வாரத்துக்கு முன்புதான் கோரப்பட்டதாகக் கூறப்படுகிறது. கடைசி நேரத்தில் ஒப்பந்தப்புள்ளி கோரப்பட்டதால் அதிக விலை கொடுத்து மின்சாரத்தை வாங்க வேண்டிய நெருக்கடி ஏற்பட்டுள்ளதாக விமர்சிக்கப்படுகிறது.

மேலும், மத்திய மின் தொகுப்பிலிருந்து கிடைக்க வேண்டிய சுமார் 1,500 மெகாவாட் மின்சாரமும் கிடைக்காத சூழலில், வேறு வழியின்றி அவசரமாக அதிக விலைக்கு மின்சாரம் வாங்க வேண்டிய கட்டாயம் ஏற்பட்டுள்ளதாகத் தெரிவிக்கப்படுகிறது. முன்கூட்டியே திட்டமிட்டு ஒப்பந்தப்புள்ளி கோரியிருந்தால், இவ்வளவு அதிக விலை கொடுத்து மின்சாரம் வாங்க வேண்டிய நிலை ஏற்பட்டிருக்காது எனக் கூறப்படும் நிலையில், மின்சாரத் துறை அமைச்சர் நிர்மல் குமாருக்கு எதிராகக் கடுமையான விமர்சனங்கள் எழுந்துள்ளன. எதிர்க்கட்சிகளும் அமைச்சருக்கு எதிராகப் போர்க்கொடி தூக்கியுள்ளன.

உடன்குடி அனல்மின் நிலைய விரிவாக்கத் திட்டத்துக்கும் எதிர்ப்பு: 

இதற்கிடையே, உடன்குடி அனல்மின் நிலையத்தைத் தனியார் பங்களிப்புடன் விரிவாக்கும் முடிவும் கேள்விக்குள்ளாக்கப்பட்டு வருகிறது.

உடன்குடி அனல்மின் நிலையத்தில் மொத்தம் 3,200 மெகாவாட் மின்சாரம் உற்பத்தி செய்யும் வகையில் விரிவாக்கத் திட்டத்துக்கு ஒப்புதல் அளிக்கப்பட்டுள்ளதாகவும், இத்திட்டம் தனியார் பங்களிப்புடன் செயல்படுத்தப்படும் என்றும் அறிவிக்கப்பட்டுள்ளது.

இந்த விரிவாக்கப் பணிகளுக்கு மொத்தம் ரூ.32,000 கோடி செலவாகும் என மதிப்பிடப்பட்டுள்ள நிலையில், தனியார் பங்களிப்பு மூலம் தற்போதைக்கு அரசின் செலவைக் குறைக்க முடியும். ஆனால், எதிர்காலத்தில் தனியாரிடமிருந்து மின்சாரம் கொள்முதல் செய்ய வேண்டிய சூழல் உருவாகலாம்.

அவ்வாறு அதிக விலை கொடுத்து மின்சாரம் வாங்க வேண்டிய நிலை ஏற்பட்டால், அதன் தாக்கம் நுகர்வோரின் மின் கட்டணத்திலும் எதிரொலிக்கலாம் என்ற அச்சம் எழுந்துள்ளது. மேலும், மின்சாரத் தேவைக்குத் தனியாரையே நம்பியிருக்க வேண்டிய சூழல் உருவாகும் என்பதால், மின்வாரியத்தின் இந்த முடிவுக்கும் கடும் எதிர்ப்பு கிளம்பியுள்ளது.

மின்வாரிய நிர்வாகத்தில் தொடரும் சர்ச்சைகள்: 

ஏற்கெனவே மின்வாரியம் அதிக கடன் சுமையில் தத்தளித்து வருகிறது. முந்தைய ஆட்சிக் காலத்தில் மின் தேவையைச் சமாளிப்பதற்கான நீண்டகாலத் திட்டங்கள் போதிய அளவில் முன்னெடுக்கப்படவில்லை என்ற குற்றச்சாட்டுகள் உள்ள நிலையில், தற்போதும் குழப்பங்களும் குளறுபடிகளும் தொடர்ந்து வருவதாக விமர்சனங்கள் எழுகின்றன.

இதற்கிடையே, மின்வாரியத் தலைவராக இருந்த ஐஏஎஸ் அதிகாரி அருண் ராய் மாற்றப்பட்டு, ஏற்கெனவே மின்வாரியத் தலைவராகப் பணியாற்றிய ராஜேஷ் லக்கானிக்கு மீண்டும் அந்தப் பொறுப்பு வழங்கப்பட்டுள்ளது.

திமுக ஆட்சியில் செந்தில் பாலாஜி மின்சாரத் துறை அமைச்சராக இருந்தபோது, மின்வாரியத் தலைவராக இருந்த ராஜேஷ் லக்கானியின் பெயர் மின்மாற்றிகள் கொள்முதல் முறைகேடு தொடர்பான சர்ச்சையில் அடிபட்டதாகவும் குறிப்பிடப்படுகிறது. இத்தகைய சர்ச்சைகளில் பெயர் இடம்பெற்ற அதிகாரிக்கு மீண்டும் அதே பொறுப்பு வழங்கப்பட்டிருப்பதும் விமர்சனங்களை ஏற்படுத்தியுள்ளது.

மின்சார வாரியம் பொதுமக்களின் அன்றாட வாழ்க்கையுடன் நேரடியாகத் தொடர்புடைய துறையாகும். எனவே, அதன் நிர்வாகத்தை நேர்மையாகவும் வெளிப்படைத்தன்மையுடனும் நடத்த வேண்டிய பொறுப்பு ஆட்சியாளர்களுக்கு உள்ளது. இதனை உணர்ந்து அரசு செயல்பட வேண்டும் என்பதே பொதுமக்களின் எதிர்பார்ப்பாக உள்ளது.

இதையும் படிங்க: இடைத்தேர்தல் வெற்றி.. தவெக-வின் 4 மாத நல்லாட்சிக்கு கிடைத்த பரிசு! அமைச்சர் நிர்மல் குமார் பெருமிதம்!