“திமுக-காங்கிரஸ் ஒருவரை ஒருவர் முடித்துக் கொள்வார்கள்!” தமிழிசை சௌந்தரராஜன் ஆருடம்!

திமுக மற்றும் காங்கிரஸ் கட்சிகளிடையே பரஸ்பர நம்பிக்கை இல்லை என்றும், 1967-இல் தொடங்கிய அரசியல் பகை இப்போது ஒருவரை ஒருவர் அழித்துக் கொள்வதில் முடியும் என்றும் பாஜக மூத்த தலைவர் தமிழிசை சௌந்தரராஜன் விமர்சித்துள்ளார். ஜல்லிக்கட்டு போட்டிகளில் வீரர்களின் மரணத்தைத் தடுக்க அரசு தவறிவிட்டதாகவும் அவர் குற்றம் சாட்டியுள்ளார்.

தமிழகத்தில் நிலவி வரும் தற்போதைய அரசியல் சூழல் மற்றும் ஜல்லிக்கட்டு போட்டிகளின் பாதுகாப்பு ஏற்பாடுகள் குறித்து பாஜக மூத்த தலைவர் தமிழிசை சௌந்தரராஜன் இன்று செய்தியாளர்களிடம் தனது கருத்துகளைப் பகிர்ந்துகொண்டார். அப்போது ஆளும் திமுக அரசு மற்றும் அதன் கூட்டணிக் கட்சியான காங்கிரஸ் இடையேயான உறவு குறித்து அவர் முன்வைத்த விமர்சனங்கள் அரசியல் வட்டாரத்தில் சலசலப்பை ஏற்படுத்தியுள்ளன.

திமுக மற்றும் காங்கிரஸ் கட்சிகளுக்கு இடையே தற்போது துளியும் நம்பிக்கையில்லை என்று குறிப்பிட்ட தமிழிசை, இந்தக் கூட்டணி வரும் தேர்தலிலும் தொடருமா என்பதை யாராலும் உறுதியாகச் சொல்ல முடியாது எனத் தெரிவித்தார். வரலாற்றைத் திரும்பிப் பார்த்தால், 1967-ஆம் ஆண்டுத் தமிழகத்தில் காங்கிரஸின் ஆட்சியைத் திமுகதான் முடிவுக்குக் கொண்டு வந்தது. அந்தப் பகை இன்னும் மறையவில்லை. இப்போது மீண்டும் ஒரு சூழல் உருவாகியுள்ளது; இதில் ஒருவரை ஒருவர் முடித்துக் கொள்வார்களே தவிர, நாட்டுக்கு எந்த நன்மையும் விளையாது என அவர் ஆருடம் கூறினார். இரு கட்சிகளுக்கும் இடையே நிலவும் உட்கட்சிப் பூசல்கள் விரைவில் வெளிச்சத்திற்கு வரும் என்றும் அவர் எச்சரித்தார்.

இதையும் படிங்க: "சிந்தையில் ஒன்றுமில்லை!" எடப்பாடி பழனிசாமியின் வாக்குறுதிகளை கிண்டல் செய்த சேகர் பாபு!

தொடர்ந்து ஜல்லிக்கட்டு போட்டிகள் குறித்துப் பேசிய அவர், வீரர்களின் பாதுகாப்பில் அரசு மெத்தனமாக இருப்பதாகக் குற்றம் சாட்டினார். ஜல்லிக்கட்டு போட்டிகளில் வீரர்களின் மரணங்களைத் தடுக்கத் தகுந்த முன்னேற்பாடுகளை அரசு செய்யவில்லை. வெறும் முதலுதவி மையங்கள் மட்டும் போதாது. அலங்காநல்லூர் போன்ற ஜல்லிக்கட்டு நடைபெறும் முக்கிய இடங்களில் உலகத்தரம் வாய்ந்த பன்னோக்கு மருத்துவமனைகளை அமைக்க வேண்டும் என நான் பலமுறை கோரிக்கை விடுத்திருக்கிறேன். ஆனால், அரசு செவிசாய்க்கவில்லை என வருத்தம் தெரிவித்தார்.

மக்களின் உயிரோடு விளையாடுவதை விடுத்து, பாரம்பரிய வீர விளையாட்டான ஜல்லிக்கட்டில் பங்கேற்கும் வீரர்களுக்கு உயர்தர மருத்துவ வசதிகளையும், உரியப் பாதுகாப்பு உபகரணங்களையும் வழங்கத் தமிழக அரசு உடனடியாக நடவடிக்கை எடுக்க வேண்டும் என அவர் வலியுறுத்தினார். தமிழிசை சௌந்தரராஜனின் இந்த விமர்சனம், தேர்தல் நெருங்கும் வேளையில் திமுக-காங்கிரஸ் கூட்டணியின் உறுதித்தன்மை குறித்த விவாதங்களை மீண்டும் ஒருமுறை கிளப்பியுள்ளது.

இதையும் படிங்க: 5 வருஷமா என்ன செஞ்சீங்க? ஒரு மெகாவாட் கூட உற்பத்தி பண்ணலையா? திமுகவை சாடிய அன்புமணி!