பினாமி பெயரில் கான்ட்ராக்ட் எடுத்த முன்னாள் அமைச்சர்கள்! கள ஆய்வில் வெளிவந்த தகவல்! கொதித்த மு.க.ஸ்டாலின்!

சட்டசபை தேர்தல் தோல்விக்கான காரணங்களை ஆராய தி.மு.க. அமைத்த கள ஆய்வு குழுக்களின் அறிக்கை, கட்சிக்குள் பெரும் பரபரப்பை ஏற்படுத்தியுள்ளதாக தகவல்கள் வெளியாகியுள்ளன. சுமார் 3,000 பக்கங்கள் கொண்ட இந்த விரிவான அறிக்கையில், தேர்தல் தோல்விக்கான காரணங்கள் மட்டுமல்லாமல், கட்சியின் அமைப்பு ரீதியான பலவீனங்கள் மற்றும் எதிர்கால நடவடிக்கைகள் குறித்தும் முக்கிய பரிந்துரைகள் இடம்பெற்றுள்ளதாக கூறப்படுகிறது.

தகவல்களின்படி, 19 கள ஆய்வு குழுக்களில் 13 குழுக்கள் தங்களது அறிக்கைகளை கட்சி தலைவர் மு.க. ஸ்டாலினிடம் சமர்ப்பித்துள்ளன. மீதமுள்ள குழுக்கள் கூடுதல் அவகாசம் கேட்டுள்ளதாகவும் கூறப்படுகிறது. குறிப்பாக சென்னை மாநகரில் மட்டும் சுமார் 10,000 பேரிடம் நேரடியாக கருத்து கேட்டு தகவல்கள் சேகரிக்கப்பட்டதாக தகவல்கள் தெரிவிக்கின்றன.

அறிக்கையின் முக்கிய அம்சங்களில் ஒன்றாக, கட்சிக்குள் நிலவும் உட்கட்சி பிரச்சினைகளை உடனடியாக கட்டுப்படுத்த வேண்டும் என்ற பரிந்துரை இடம்பெற்றுள்ளதாக கூறப்படுகிறது. எதிர்கால தேர்தல்களில் தெளிவான அரசியல் வியூகத்துடன் செயல்பட வேண்டிய அவசியத்தையும் குழுக்கள் சுட்டிக்காட்டியுள்ளன.

இதையும் படிங்க: தவெக விஜயை சமாளிக்க மு.க.ஸ்டாலின் புது வியூகம்! திமுகவில் இனி 10 துணை பொதுச்செயலாளர்கள்! அதிரடி ஆரம்பம்!

மேலும், சில முன்னாள் அமைச்சர்கள், மாவட்டச் செயலர்கள் மற்றும் சட்டமன்ற உறுப்பினர்கள் தங்கள் பகுதிகளில் அரசு ஒப்பந்தப் பணிகளை நேரடியாகவோ அல்லது பினாமி பெயர்களிலோ பெற்றதாக குற்றச்சாட்டுகள் வந்துள்ளதாக அறிக்கையில் குறிப்பிடப்பட்டுள்ளதாக தகவல்கள் வெளியாகியுள்ளன. இதுதொடர்பாக சம்பந்தப்பட்ட நபர்களின் பெயர்கள் பட்டியலிடப்பட்டுள்ளதுடன், உரிய விசாரணை நடத்தி நடவடிக்கை எடுக்க வேண்டும் என்றும் பரிந்துரைக்கப்பட்டுள்ளதாக கூறப்படுகிறது.

தேர்தல் பணிகளுக்காக வழங்கப்பட்ட நிதி முறைகேடாக பயன்படுத்தப்பட்டதாக வந்த புகார்களையும் அறிக்கை கவனத்திற்கு கொண்டு வந்துள்ளதாக தகவல்கள் தெரிவிக்கின்றன. தவறுகள் செய்தவர்களுக்கு எதிராக நடவடிக்கை எடுக்கத் தயங்கினால், அதே பிரச்சினைகள் மீண்டும் தொடரும் அபாயம் இருப்பதாகவும் எச்சரிக்கப்பட்டுள்ளதாக கூறப்படுகிறது.

இரண்டு முறைக்கு மேல் ஒரே பதவியில் உள்ள ஒன்றிய செயலர்களுக்கு மாற்றாக புதிய நிர்வாகிகளை கொண்டு வர வேண்டும் என்றும், அடிமட்ட அமைப்பை புதுப்பிக்க வேண்டும் என்றும் அறிக்கை வலியுறுத்தியுள்ளதாக தகவல்கள் வெளியாகியுள்ளன.

உள்ளாட்சி தேர்தல்களை முன்னிட்டு கட்சியை முழுமையாக சீரமைத்து, நிர்வாகிகளும் தொண்டர்களும் உற்சாகமாக செயல்படும் சூழலை உருவாக்க வேண்டும் என்பதே அறிக்கையின் மைய கருத்தாக இருப்பதாக அரசியல் வட்டாரங்களில் பேசப்படுகிறது.

இதையும் படிங்க: நிரந்தர எதிர்க்கட்சி திமுகவா.? பரபரக்கும் பனையூர்..! தவெகவுக்கு கூடும் மவுசு...!