சேப்பாக்கத்தில் அலைமோதிய கூட்டம்: துலீப் டிராபி இறுதிப்போட்டிக்கு அப்பர் கேலரிகளும் திறப்பு!

இந்திய உள்நாட்டு முதல் தரக் கிரிக்கெட்டின் சிகர மோதலான துலீப் டிராபி (Duleep Trophy) இறுதிப் போட்டியைக் காண சென்னை சேப்பாக்கம் மைதானத்தில் கிரிக்கெட் ரசிகர்கள் வரலாறு காணாத அளவில் திரண்டதைத் தொடர்ந்து, கீழ் தள மாடங்கள் நிரம்பி வழிந்ததால் நிர்வாகம் உடனடியாக மேல் தள மாடங்களையும் பார்வையாளர்களுக்காகத் திறந்துவிட்டுள்ளது.

சென்னை சேப்பாக்கம் எம்.ஏ.சிதம்பரம் சர்வதேச கிரிக்கெட் மைதானத்தில் இன்று தொடங்கிய நடப்பு துலீப் டிராபி இறுதிப் போட்டியில், இஷான் கிஷன் தலைமையிலான கிழக்கு மண்டல (East Zone) அணியும், திலக் வர்மா தலைமையிலான தெற்கு மண்டல (South Zone) அணியும் களத்தில் நேருக்கு நேர் மோதி வருகின்றன. இரு அணிகளிலுமே இந்திய அணியின் நட்சத்திர வேகப்பந்து வீச்சாளர் முகமது ஷமி, அதிரடி ஆட்டக்காரர் இஷான் கிஷன், இளம் நட்சத்திரம் திலக் வர்மா, வைபவ் உள்ளிட்ட முன்னணி வீரர்கள் களமிறங்கியுள்ளதால், போட்டி தொடங்கிய முதல் பந்திலிருந்தே அனல் பறக்கும் விறுவிறுப்பு தொற்றிக்கொண்டது.

உள்நாட்டு கிரிக்கெட் போட்டிகளை ஊக்குவிக்கும் நோக்கில், இப்போட்டியைக் காண பொதுமக்களுக்கு அனுமதி முற்றிலும் இலவசம் என்று தமிழ்நாடு கிரிக்கெட் சங்கம் (TNCA) அறிவித்திருந்தது. இந்த அறிவிப்பைத் தொடர்ந்து, காலை முதலே ஆயிரக்கணக்கான கிரிக்கெட் ஆர்வலர்கள் மைதானத்திற்குப் படையெடுத்தனர். ஆரம்பத்தில் பார்வையாளர்களுக்காகத் திட்டமிட்டுத் திறந்துவிடப்பட்ட சி, டி மற்றும் இ (C, D, E Lower) கீழ் தள மாடங்கள் அனைத்தும் குறுகிய நேரத்திலேயே ரசிகர்களால் நிரம்பி வழிந்தன.

இதையும் படிங்க: கோயம்பேடு - நந்தம்பாக்கம் இடையே நவம்பரில் மெட்ரோ சோதனை ஓட்டம்: சிஎம்ஆர்எல் திட்டம்!

மைதானத்திற்கு வெளியே ரசிகர்கள் நீண்ட வரிசையில் தொடர்ந்து காத்திருந்த சூழலைக் கையாண்டு கூட்ட நெரிசலைத் தவிர்க்கும் வகையில், மைதான நிர்வாகம் உடனடியாக மேல் தள மாடங்களையும் (Upper Galleries) பார்வையாளர்களுக்காகத் திறந்துவிட்டு அனுமதித்தது. உள்ளூர் முதல் தர டெஸ்ட் போட்டி ஒன்றுக்குச் சென்னை ரசிகர்கள் காட்டியுள்ள இந்த அளப்பரிய ஆர்வம் கிரிக்கெட் ஆர்வலர்களை ஆச்சரியத்தில் ஆழ்த்தியுள்ளதுடன், சேப்பாக்கம் மைதானத்தில் சர்வதேசப் போட்டியைப் போன்றதொரு மெய்சிலிர்க்கும் கொண்டாட்டச் சூழலை ஏற்படுத்தியுள்ளது.

இதையும் படிங்க: சென்னையில் பலத்த காற்றுடன் கொட்டி தீர்த்த கனமழை! விமான சேவைகள் கடுமையாக பாதிப்பு!