இடைத்தேர்தலுக்கு யாரை நிறுத்துவது? தவெகவுக்கு தாவிய எம்.எல்.ஏ-க்கள்! கையை பிசையும் இபிஎஸ்!

தமிழகத்தில் காலியாக உள்ள ஐந்து சட்டசபைத் தொகுதிகளுக்கான இடைத்தேர்தலில் வலுவான போட்டியை எதிர்கொள்ள அ.தி.மு.க. தயாராகி வருகிறது. கட்சியின் பொதுச்செயலர் எடப்பாடி பழனிசாமி வேட்பாளர் தேர்வு பணியில் மும்முரமாக ஈடுபட்டுள்ளார்.

சட்டசபைத் தேர்தலில் 47 தொகுதிகளில் வெற்றி பெற்ற அ.தி.மு.க., தமிழக வெற்றிக் கழகம் ஆட்சியமைத்த பிறகு பெரும் சவாலை சந்தித்தது. த.வெ.க.வுக்கு பெரும்பான்மை இல்லாத நிலையில் 25 அ.தி.மு.க. எம்.எல்.ஏ.க்களின் ஆதரவைப் பெற்றது. 

பின்னர் பெருந்துறை, மதுராந்தகம், தாராபுரம், அம்பாசமுத்திரம் தொகுதி எம்.எல்.ஏ.க்கள் நால்வரும் ராஜினாமா செய்து த.வெ.க.வில் இணைந்தனர். முதல்வர் விஜய் ராஜினாமா செய்த திருச்சி கிழக்கு தொகுதியுடன் சேர்த்து மொத்தம் ஐந்து தொகுதிகளுக்கு இடைத்தேர்தல் நடைபெற உள்ளது.

இதையும் படிங்க: அதிமுக பெயரைச் சொல்லி பண வசூல்!! எச்சரிக்கையா இருந்துக்குங்க! எடப்பாடி பழனிசாமி வார்னிங்!

அ.தி.மு.க. அமைப்பு செயலர்கள் சிலர் கூறியதாவது: “த.வெ.க. தலைமையிலான ஆட்சியில் கம்யூனிஸ்ட் கட்சிகள் வெளியில் இருந்து ஆதரவு அளித்து வருகின்றன. எந்நேரமும் ஆதரவை வாபஸ் பெறும் சூழல் உள்ளது. எனவே ஆட்சியை தக்க வைக்க அ.தி.மு.க. எம்.எல்.ஏ.க்களை இழுத்து ராஜினாமா செய்ய வைத்து இடைத்தேர்தலை ஏற்படுத்தியுள்ளனர். இதனால் அ.தி.மு.க.வுக்கு பதிலடி கொடுக்க இந்த இடைத்தேர்தலில் வெற்றி அவசியமாகிறது” என்றனர்.

இதனால் கொங்கு மண்டலத்தில் உள்ள தாராபுரம் மற்றும் பெருந்துறை தொகுதிகளுக்கு வேட்பாளர் தேர்வில் பழனிசாமி முதல் கட்டமாக கவனம் செலுத்தி வருகிறார். இந்த இரு தொகுதிகளுக்கும் நன்கு அறிமுகமான, வலுவான ஆறு பேரை அவர் ஏற்கெனவே இறுதி செய்துள்ளார். திருச்சி கிழக்கு தொகுதிக்கு தகுதியான வேட்பாளரை தேர்வு செய்யும் பணியும் விரைவில் முடிவுக்கு வரும்.

மதுராந்தகம் தொகுதியை கடந்த தேர்தலில் பா.ம.க. கேட்டிருந்தது. ஆனால் அ.தி.மு.க.வின் மரகதம் குமரவேலுக்காக பழனிசாமி அந்த தொகுதியை வழங்கவில்லை. இந்த இடைத்தேர்தலில் மதுராந்தகம் தொகுதியை பா.ம.க.வுக்கும், அம்பாசமுத்திரம் தொகுதியை பா.ஜ.க.வுக்கும் விட்டுக் கொடுக்கும் வாய்ப்பு உள்ளது. வேட்பாளர்கள் இறுதி செய்யப்பட்ட உடன் அவர்களை உடனடியாக களத்தில் இறக்கி தேர்தல் பணிகளை தீவிரப்படுத்த பழனிசாமி திட்டமிட்டுள்ளார்.

இந்த ஐந்து இடைத்தேர்தலும் அ.தி.மு.க.வுக்கு மட்டுமல்லாமல் தமிழக அரசியல் சமன்பாட்டையும் தீர்மானிக்கும் என எதிர்பார்க்கப்படுகிறது. பழனிசாமியின் தீவிர முயற்சிகள் கட்சியினரிடையே நம்பிக்கையை அதிகரித்துள்ளன.

இதையும் படிங்க: ஆளுங்கட்சி தவெகவா? அண்ணாமலையா? தாவுவதற்கு தயாராகும் நிர்வாகிகள்?! தப்புமா அதிமுக?!