அதிமுகவில் தினகரனை சேருங்கள்!! அண்ணாமலையுடன் சேர்ந்து பயணியுங்கள்! எடப்பாடிக்கு குவியும் அட்வைஸ்!

அ.தி.மு.க. பொதுச்செயலாளர் எடப்பாடி கே. பழனிசாமி தலைமையில் நடைபெற்ற மாவட்ட நிர்வாகிகள் ஆலோசனைக் கூட்டத்தில், அ.ம.மு.க. பொதுச்செயலாளர் டிடிவி தினகரனை மீண்டும் அ.தி.மு.க.வில் இணைக்க வேண்டும் என்ற கோரிக்கை நேரடியாக முன்வைக்கப்பட்டதாக தகவல் வெளியாகியுள்ளது. இந்த சம்பவம் அ.தி.மு.க. வட்டாரத்தில் புதிய அரசியல் விவாதத்தை ஏற்படுத்தியுள்ளது.

சட்டப்பேரவைத் தேர்தல் தோல்விக்குப் பிறகு, கட்சியை மீண்டும் வலுப்படுத்தும் நடவடிக்கையாக மாவட்ட வாரியாக நிர்வாகிகளுடன் எடப்பாடி பழனிசாமி ஆலோசனை நடத்தி வருகிறார். அதன் ஒரு பகுதியாக, சென்னை ராயப்பேட்டையில் உள்ள கட்சியின் தலைமை அலுவலகத்தில் தஞ்சாவூர் மாவட்ட நிர்வாகிகளுடன் நடைபெற்ற ஆலோசனைக் கூட்டத்தில் இந்த கோரிக்கை முன்வைக்கப்பட்டதாக கூறப்படுகிறது.

கூட்டத்தின் போது, கும்பகோணம் பகுதி செயலாளர் பத்ம குமரேசன் பேசும்போது, டெல்டா மாவட்டங்களில் அ.தி.மு.க.வை வலுப்படுத்த டிடிவி தினகரனை மீண்டும் கட்சியில் இணைக்க வேண்டும் என்று வலியுறுத்தியதாக தகவல் வெளியாகியுள்ளது. தினகரனும் அ.தி.மு.க.வும் தனித்தனியாக செயல்படுவதால் மற்ற கட்சிகள் அரசியல் லாபம் அடைவதாகவும், கட்சித் தொண்டர்களின் விருப்பத்தை தலைமை பரிசீலிக்க வேண்டும் என்றும் அவர் கூறியதாக தகவல்கள் தெரிவிக்கின்றன.

இதையும் படிங்க: கூட்டத்திற்கு வராத ஓசூர் எம்.எல்.ஏ கட்சி பதவி பறிப்பு! ஆக்சனில் இறங்கிய எடப்பாடி பழனிசாமி!

இந்த கோரிக்கைக்கு பதிலளித்த எடப்பாடி பழனிசாமி, தினகரன் தற்போது தனி அரசியல் கட்சியை வழிநடத்தி வருகிறார் என்றும், அவரை நேரடியாக அ.தி.மு.க.வில் இணைப்பது சாத்தியமில்லை என்றும் கூறியதாக தகவல் வெளியாகியுள்ளது. அதே நேரத்தில், இரு கட்சிகளும் கூட்டணியில் இருப்பதால், உள்ளாட்சித் தேர்தலில் இரு தரப்பு நிர்வாகிகளும் இணைந்து செயல்பட்டாலே வெற்றி பெற முடியும் என்ற கருத்தையும் அவர் தெரிவித்ததாக கூறப்படுகிறது.

இதற்கிடையில், டெல்டா மாவட்டங்களில் அ.தி.மு.க. - அ.ம.மு.க. இணைப்பு குறித்து நிர்வாகிகள் வெளிப்படையாக பேசத் தொடங்கியிருப்பது கட்சிக்குள் புதிய அரசியல் சலசலப்பை உருவாக்கியுள்ளதாக கூறப்படுகிறது.

மேலும், எடப்பாடி பழனிசாமி, டிடிவி தினகரன் மற்றும் தமிழக பா.ஜ.க. தலைவர் நயினார் நாகேந்திரன் ஆகியோரை டெல்லிக்கு வருமாறு மத்திய உள்துறை அமைச்சர் அமித் ஷா அழைப்பு விடுத்துள்ளதாகவும் தகவல்கள் வெளியாகியுள்ளன. ஜூலை மாதத்தின் மூன்றாவது அல்லது நான்காவது வாரத்தில் இந்த சந்திப்பு நடைபெறலாம் என்றும், எதிர்க்கட்சிகளின் அடுத்தகட்ட அரசியல் வியூகம் மற்றும் கூட்டணி தொடர்பாக முக்கிய ஆலோசனைகள் நடைபெற வாய்ப்புள்ளதாக அரசியல் வட்டாரங்களில் பேசப்படுகிறது.

இதையும் படிங்க: AI பயன்படுத்த தெரிந்தால் மட்டுமே இனி கட்சிப்பதவி!! கறார் காட்டும் எடப்பாடி பழனிசாமி! அதிமுகவில் ஷாக்!