மு.க.ஸ்டாலின் முன்னிலையில் திமுகவில் இணைந்தார் முன்னாள் அமைச்சர் பெஞ்சமின்!

தமிழக அரசியல் களத்தில் நாளுக்கு நாள் அரங்கேறி வரும் அதிரடி கட்சி மாற்றங்கள் மற்றும் அதிரடி திருப்பங்களின் தொடர்ச்சியாக, பிரதான எதிர்க்கட்சியான அதிமுகவிற்குப் பலத்த அடியாக, அக்கட்சியின் முன்னாள் அமைச்சரும் திருவள்ளூர் மத்திய கிழக்கு மாவட்டச் செயலாளருமான பெஞ்சமின் அவர்கள் இன்று அதிகாரப்பூர்வமாக திமுகவில் (DMK) இணைந்துள்ளார்.

சமீபத்தில் தமிழக சட்டசபையில் நடைபெற்ற புதிய அரசின் நம்பிக்கை வாக்கெடுப்பின் போது, அதிமுக சட்டமன்ற உறுப்பினர்கள் (MLAs) சிலர் தங்களது கட்சியின் கொறடா உத்தரவை மீறி, ஆளுங்கட்சியான தமிழக வெற்றிக் கழகத்தின் (தவெக) அரசுக்குச் சார்பாக உத்தியோகபூர்வமாக வாக்களித்தனர். இந்தச் சம்பவம் தமிழக அரசியல் வட்டாரத்தில் பெரும் புயலைக் கிளப்பிய நிலையில், அந்த நம்பிக்கை வாக்கெடுப்பின் போது தவெக அரசுக்கு மறைமுகமாகவும் நேரடியாகவும் ஆதரவளித்ததாகக் கூறி பல முக்கிய எம்எல்ஏ-க்கள் மற்றும் மாவட்ட நிர்வாகிகளை அதிமுக பொதுச்செயலாளர் எடப்பாடி பழனிசாமி கட்சியை விட்டு அதிரடியாக நீக்கினார். 

இதில், தற்பொழுது சட்டமன்ற உறுப்பினராக இல்லாத நிலையிலும், கட்சிக்காக விசுவாசமாக உழைத்த தன்னை எவ்வித விசாரணையும் இன்றி எடப்பாடி பழனிசாமி நீக்கியது ஏன் என்று முன்னாள் அமைச்சர் பெஞ்சமின் கடுமையான ஆதங்கத்தை வெளிப்படுத்தியிருந்தார். அண்மையில் சென்னை மெரினா கடற்கரையில் உள்ள முன்னாள் முதல்வர் ஜெயலலிதாவின் சமாதிக்கு நேரில் சென்று அஞ்சலி செலுத்திய அவர், அதிமுகவில் உழைப்பவர்களுக்கு மதிப்பு இல்லை என எடப்பாடி பழனிசாமிக்கு எதிராகப் பகிரங்கமாகக் குரல் எழுப்பி நியாயம் கேட்டிருந்தார்.

இதையும் படிங்க: திமுக தேர்தல் தோல்வி குறித்த கள ஆய்வு..!! மு.க.ஸ்டாலின் கைக்கு போன பரபரப்பு ரிப்போர்ட்..!!

இந்தச் சூழலில், அதிமுக தலைமை மீது ஏற்பட்ட கடுமையான அதிருப்தி காரணமாக, பெஞ்சமின் அவர்கள் இன்று தனது ஆதரவாளர்களுடன் சென்னை அண்ணா அறிவாலயத்திற்கு வருகை தந்தார். அங்கு திமுக தலைவரும் முன்னாள் முதலமைச்சருமான மு.க.ஸ்டாலின் அவர்களை நேரில் சந்தித்து, அவர் முன்னிலையில் தங்களை முறைப்படி திமுகவில் இணைத்துக் கொண்டனர். பெஞ்சமினுடன் இணைந்து அதிமுக முக்கிய நிர்வாகி குழந்தைவேலு உள்ளிட்ட திருவள்ளூர் மாவட்டத்தைச் சேர்ந்த ஏராளமான நிர்வாகிகளும் திமுகவில் ஐக்கியமாகினர். 

புதிய உறுப்பினர்களைப் பொன்னாடை போர்த்தி வரவேற்ற திமுக தலைவர் ஸ்டாலின், அவர்களுக்குக் கட்சியில் தகுந்த உன்னத மரியாதை வழங்கப்படும் என உறுதி அளித்தார். இடைத்தேர்தல் களம் சூடுபிடித்துள்ள வேளையில், அதிமுகவின் ஒரு முக்கிய மாவட்டச் செயலாளர் தனது ஆதரவாளர்களுடன் ஆளுங்கட்சிக்கு மாற்று முகாமாக விளங்கும் திமுகவில் இணைந்துள்ளது, எடப்பாடி பழனிசாமி தரப்பிற்குப் பெரும் பின்னடைவாகக் கருதப்படுகிறது.

இதையும் படிங்க: "அமைச்சர் ஆதவ் அர்ஜுனாவின் உறவினர் ஜான் பிரிட்டோ கிடையாது": திமுக புகாருக்கு அமலாக்கத்துறை விளக்கம்!