எலெக்‌ஷன்ல எங்களுக்கும் வாய்ப்பு கொடுங்க!! தேஜ கூட்டணிக்கு இந்து மக்கள் கட்சி வலியுறுத்தல்!

சென்னை: வரும் தமிழக சட்டசபைத் தேர்தலில் தேஜ கூட்டணியில் (BJP-ADMK Alliance) தங்களுக்கு தொகுதி ஒதுக்கீடு செய்ய வேண்டும் என்று இந்து மக்கள் கட்சி (Hindu Makkal Katchi) மத்திய உள்துறை அமைச்சர் அமித் ஷா மற்றும் அதிமுக பொதுச் செயலாளர் எடப்பாடி பழனிசாமி ஆகியோரிடம் வலியுறுத்தியுள்ளது.

சென்னையில் நேற்று நடைபெற்ற “தமிழகம் மீட்பு மாநாடு” என்ற மாநில அளவிலான மாநாட்டில் இந்த முக்கிய முடிவு எடுக்கப்பட்டது. தமிழகத்தின் 234 சட்டசபைத் தொகுதிகளிலும் இருந்து இந்து மக்கள் கட்சியின் மாவட்ட மற்றும் மாநில நிர்வாகிகள் பெரும் எண்ணிக்கையில் கலந்து கொண்டனர்.

மாநாட்டில் நிறைவேற்றப்பட்ட தீர்மானத்தில், தேசிய ஜனநாயகக் கூட்டணியில் (NDA) இணைந்து குறைந்தது 5 சட்டசபைத் தொகுதிகளில் தனிச் சின்னத்திலோ அல்லது இரட்டை இலை, தாமரை சின்னத்திலோ போட்டியிட வாய்ப்பு வழங்க வேண்டும் என்று வலியுறுத்தப்பட்டது.

இதையும் படிங்க: கொங்கு மண்டலத்தில் திமுக வெற்றி வாய்ப்பு எப்படி? கூட்டணி கட்சிகளை இறக்கலாமா? மு.க.ஸ்டாலின் தீவிர ஆலோசனை!

இந்து மக்கள் கட்சி பல ஆண்டுகளாக தேசிய ஜனநாயகக் கூட்டணியின் உறுதியான ஆதரவாளராக இருந்து வருவதாகவும், தமிழகம் முழுவதும் தேசியவாதம் மற்றும் இந்து கலாசார விழுமியங்களை வலுப்படுத்தும் அடிமட்டப் பணியை தொடர்ந்து செய்து வருவதாகவும் கட்சி நிர்வாகிகள் சுட்டிக்காட்டினர்.

கட்சித் தலைவர் அர்ஜுன் சம்பத்துக்கு குறைந்தபட்சம் ஒரு தொகுதியாவது ஒதுக்கீடு செய்ய வேண்டும் என்றும், மற்ற தொகுதிகளிலும் வாய்ப்பு வழங்க வேண்டும் என்றும் அமித் ஷா மற்றும் எடப்பாடி பழனிசாமிக்கு கடிதம் அனுப்பி கோரிக்கை வைத்துள்ளனர்.

“திராவிட மாடல் ஆட்சியை வீழ்த்த வேண்டும்” என்ற ஒற்றை இலக்குடன் இந்த மாநாடு நடைபெற்றது. இந்து சமூகத்தின் உரிமைகள், மத நம்பிக்கைகள் மற்றும் பாரம்பரிய கலாசாரப் பாதுகாப்பு உள்ளிட்ட பிரச்னைகளில் இந்து மக்கள் கட்சி தொடர்ந்து குரல் கொடுத்து வருவதாக கட்சியினர் தெரிவித்தனர்.

தமிழக அரசியலில் புதிய திருப்பத்தை ஏற்படுத்தும் வகையில் இந்து மக்கள் கட்சியின் இந்த கோரிக்கை பாஜக மற்றும் அதிமுக தலைமையின் கவனத்தை ஈர்த்துள்ளது. அடுத்த சில நாட்களில் இது குறித்து மேலும் தெளிவான பதில் வரும் என எதிர்பார்க்கப்படுகிறது. 

இதையும் படிங்க: சிங்கிள் டிஜிட் செட்டாகாது! திருமா விடாப்பிடி! இரட்டை இலக்கத்தில் சீட் கேட்கும் விசிக! தொகுதி பங்கீட்டில் இழுபறி!!