ராமதாஸுடன் போனில் பேசிய மு.க.ஸ்டாலின்! திமுக - பாமக இடையே ரகசிய உடன்பாடு! தொகுதி பங்கீடு?!

தமிழக சட்டமன்ற தேர்தல் 2026 நெருங்கி வரும் நிலையில், பாட்டாளி மக்கள் கட்சி (பா.ம.க.) நிறுவனர் டாக்டர் எஸ். ராமதாஸ் அரசியல் கூட்டணி தேடி தீவிர ஆலோசனைகளில் ஈடுபட்டு வருகிறார். 

அ.தி.மு.க.-பா.ஜ.க. கூட்டணியில் அவரது மகன் அன்புமணி ராமதாஸ் தரப்பு பா.ம.க. இணைந்துவிட்டதால், ராமதாஸ் தரப்புக்கு அங்கு இடம் இல்லாத நிலை ஏற்பட்டுள்ளது. தி.மு.க. கூட்டணியில் விடுதலை சிறுத்தைகள் கட்சியின் எதிர்ப்பு மற்றும் எதிர்பார்த்த தொகுதிகளை பெற முடியாத சூழல் காரணமாக முன்பு இடம் மறுக்கப்பட்டது.

இந்நிலையில் ராமதாஸ் தனது மகள் ஸ்ரீ காந்தி, கவுரவ தலைவர் ஜி.கே.மணி உள்ளிட்டோருடன் ஆலோசனை நடத்தினார். நடிகர் விஜய்யின் தமிழக வெற்றிக் கழகம் (தவெக) கூட்டணியில் சேர்வது அல்லது பா.ம.க. வலுவான தொகுதிகளில் மட்டும் தனித்து போட்டியிடுவது குறித்து விவாதித்தனர்.

இதையும் படிங்க: திமுக கூட்டணியில் இணைந்தது தேமுதிக?! அடுத்தவாரம் வெளியாகும் அதிகாரப்பூர்வ அறிவிப்பு!

ஆனால் தனித்து போட்டியிடுவதற்கு அவர்கள் எதிர்ப்பு தெரிவித்தனர். எனவே தி.மு.க. கூட்டணிக்கு கடைசி வரை முயற்சிப்பது, தோல்வியுற்றால் தவெகவுடன் சேர்வது என முடிவெடுக்கப்பட்டது.

இதையடுத்து தி.மு.க. எம்பி ஒருவர் மூலம் ராமதாஸ் முதல்வர் எம்.கே. ஸ்டாலினுடன் மொபைல் போனில் பேசினார். அப்போது ராமதாஸ் "கருணாநிதியுடன் அரசியல் செய்தவன் நான். அவரது நன்மதிப்பை பெற்றவன். 1989 முதல் தேர்தல் களத்தில் இருக்கிறேன். இது எனக்கு மிக முக்கியமான தேர்தல், சொல்லப்போனால் கடைசி தேர்தலாகவும் இருக்கலாம். எனவே தி.மு.க. கூட்டணியில் கௌரவமான இடம் வழங்க வேண்டும்" என்று வேண்டுகோள் விடுத்தார்.

ஸ்டாலின் பதிலளித்தபோது "தி.மு.க. கூட்டணியில் தொகுதி பங்கீடு இன்னும் முடியவில்லை. காங்கிரஸுக்கு இடங்கள் முடிவான பிறகுதான் புதிய கட்சிகளை இணைப்பது குறித்து யோசிக்க முடியும். இப்போதைக்கு கொஞ்சம் பொறுமையாக இருங்கள். சரியான நேரம் வந்ததும் உங்களுக்கு வாய்ப்பு வழங்குகிறோம்" என்று கூறியதாக ராமதாஸ் ஆதரவாளர் ஒருவர் தெரிவித்தார். காங்கிரஸ் விலகினால் பா.ம.க.வுக்கு இடம் கிடைக்கும் என ஸ்டாலின் உறுதி அளித்ததாகவும் அந்த ஆதரவாளர் கூறினார்.

இதனால் தி.மு.க. தரப்பில் இருந்து எப்போது வேண்டுமானாலும் அழைப்பு வரலாம் என்ற நம்பிக்கையில் ராமதாஸ் காத்திருப்பதாக தகவல்கள் வெளியாகியுள்ளன. தமிழக அரசியலில் பா.ம.க.வின் அடுத்த நகர்வு எப்படி இருக்கும் என்பது அனைவரின் கவனத்தையும் ஈர்த்துள்ளது. வன்னியர் சமூக ஓட்டுகளை பிரிக்கும் வகையில் இந்த முடிவு தேர்தல் களத்தை பாதிக்கும் என எதிர்பார்க்கப்படுகிறது.

இதையும் படிங்க: வன்னியருக்கு 10.5% இட ஒதுக்கீடு! வேணாவே வேணாம்! சாதி ஓட்டு பார்த்த மீதி ஓட்டு போயிரும்! திமுக குழப்பம்!