எலெக்‌ஷன் வேலை எக்கச்சக்கமா இருக்கே!! சம்மன் அனுப்பிய சிபிஐ! விலக்கு கேட்கும் விஜய்!

சென்னை, மார்ச் 9: கடந்த 2025 செப்டம்பர் 27-ஆம் தேதி கரூர் வேலுச்சாமிபுரத்தில் தமிழக வெற்றிக் கழக (த.வெ.க.) தலைவர் விஜய் கலந்துகொண்ட பிரசாரக் கூட்டத்தில் ஏற்பட்ட நெரிசலில் 41 பேர் உயிரிழந்த சோக சம்பவம் தொடர்பான வழக்கில், சிபிஐ (சென்ட்ரல் பியூரோ ஆஃப் இன்வெஸ்டிகேஷன்) விசாரணை தீவிரமடைந்துள்ளது. 

இந்த வழக்கில் விஜய்க்கு மீண்டும் சம்மன் அனுப்பப்பட்டுள்ளது. நாளை (மார்ச் 10) டெல்லியில் உள்ள சிபிஐ தலைமை அலுவலகத்தில் நேரில் ஆஜராகுமாறு உத்தரவிடப்பட்டுள்ளது.

ஏற்கனவே ஜனவரி மாதத்தில் இரண்டு முறை (ஜனவரி 12 மற்றும் 19) விஜய் டெல்லி சென்று சிபிஐ விசாரணைக்கு ஆஜராகி, சுமார் 6-7 மணி நேரம் விசாரிக்கப்பட்டார். அப்போது கூட்டத்துக்கு தாமதமாக வந்தது, கூட்ட மேலாண்மை, நிர்வாக பொறுப்புகள் உள்ளிட்டவை குறித்து விரிவாக கேள்விகள் எழுப்பப்பட்டன. த.வெ.க. நிர்வாகிகளான புஸ்சி ஆனந்த், சிடிஆர் நிர்மல் குமார், ஆதவ் அர்ஜுனா உள்ளிட்டோரும் டெல்லியில் ஆஜராகி விசாரணைக்கு ஒத்துழைத்தனர்.

இதையும் படிங்க: தவெக உத்தேச பட்டியல் ரெடி... விஜய் நேர்காணல் செய்வார் என தகவல்..!!

இந்நிலையில், மூன்றாவது முறையாக சிபிஐ சம்மன் அனுப்பியுள்ளது. ஆனால், த.வெ.க. தலைவர் விஜய் தரப்பிலிருந்து சிபிஐக்கு கோரிக்கை விடுக்கப்பட்டுள்ளது. நாளை நடைபெறும் விசாரணையில் இருந்து விலக்கு அளிக்க வேண்டும் என்றும், தேர்தல் பணிகள் காரணமாக சென்னையில் உள்ள சிபிஐ அலுவலகத்தில் ஆஜராக அனுமதி வழங்க வேண்டும் என்றும் கோரப்பட்டுள்ளது.

தற்போது தேர்தல் பிரசாரங்கள், விருப்ப மனு நேர்காணல்கள் உள்ளிட்ட பல திட்டமிடப்பட்ட நிகழ்ச்சிகள் இருப்பதால் இந்த கோரிக்கை விடுக்கப்பட்டதாக தகவல்கள் தெரிவிக்கின்றன.

உச்ச நீதிமன்ற உத்தரவின்படி சிபிஐ விசாரணை எடுத்துக்கொண்ட இந்த வழக்கு, கூட்ட நெரிசலுக்கு காரணமான பொறுப்புகள், ஏற்பாடுகள், தாமதம் ஆகியவற்றை மையமாகக் கொண்டு நடைபெறுகிறது. விஜய் தரப்பு ஒத்துழைப்பு அளிப்பதாக கூறினாலும், தேர்தல் காலத்தில் டெல்லி செல்வது சிரமம் என்பதால் சென்னை அலுவலகத்தில் விசாரணைக்கு அனுமதி கோரியுள்ளது. சிபிஐ இந்த கோரிக்கையை ஏற்குமா என்பது இனி தெரிய வரும்.

இந்த சம்பவம் தொடர்பான விசாரணை தொடர்வது த.வெ.க.வின் தேர்தல் தயாரிப்புகளுக்கு புதிய சவாலாக அமைந்துள்ளது. அரசியல் வட்டாரத்தில் இது பரபரப்பை ஏற்படுத்தியுள்ளது.

இதையும் படிங்க: ஓபிஎஸ் எடுத்தது தவறான முடிவு! மக்கள் ஏற்க மாட்டார்கள்!! ஓபிஎஸ் ஆதரவாலர்கள் தவெகவில் இணைகிறோம்! புது ட்விஸ்டு!