மதுபான கொள்கை முறைகேடு வழக்கு!! பாஜக வெட்கப்படணும்!! கெஜ்ரிவால், சிசோடியாவை பாராட்டும் மு.க.ஸ்டாலின்!

டெல்லி ரவுஸ் அவென்யூ நீதிமன்றம் வெள்ளிக்கிழமை (பிப்ரவரி 27, 2026) வரலாற்று தீர்ப்பு ஒன்றை வழங்கியது. 2021-22 ஆம் ஆத்மி கட்சி ஆட்சியில் அறிமுகப்படுத்தப்பட்ட மதுபான கொள்கையில் (Excise Policy) ஊழல், லஞ்சம், 100 கோடி ரூபாய் முறைகேடு என்று CBI, ED தொடர்ந்த வழக்கில் முன்னாள் முதலமைச்சர் அர்விந்த் கெஜ்ரிவால், முன்னாள் துணை முதலமைச்சர் மணிஷ் சிசோடியா உள்ளிட்ட 23 பேரையும் நீதிமன்றம் விடுவித்தது.

“குற்றச்சாட்டுகளுக்கு எந்த ஆதாரமும் இல்லை. குற்றச் சதி அல்லது தவறான எண்ணம் நிரூபிக்கப்படவில்லை” என நீதிபதி ஜிதேந்திர சிங் தீர்ப்பில் தெளிவாகக் கூறினார்.

தீர்ப்புக்குப் பிறகு கெஜ்ரிவால் கண்ணீர் விட்டு உணர்ச்சிவசப்பட்டார். “உண்மை எப்போதும் வெல்லும். நான் ஊழல்வாதி இல்லை. நீதிமன்றம் என் நேர்மையை உறுதி செய்துள்ளது” எனக் கூறினார்.

இதையும் படிங்க: ஹப்பாடா!! ரொம்ப பெரிய நிம்மதி!! மதுபான கொள்கை முறைகேடு வழக்கு! கெஜ்ரிவால், மணீஷ் சிசோடியா விடுவிப்பு!

AAP தரப்பில் இது பெரும் வெற்றியாக கொண்டாடப்படுகிறது. ED, CBI வழக்குகளில் ஏற்கெனவே சிலவற்றில் விடுவிக்கப்பட்ட நிலையில், இந்த தீர்ப்பு மத்திய அரசின் விசாரணை மீது பெரும் கேள்வியை எழுப்பியுள்ளது.

இந்நிலையில் தமிழக முதலமைச்சர் மு.க.ஸ்டாலின் கெஜ்ரிவால் விடுதலைக்கு வாழ்த்து தெரிவித்து, மத்திய பாஜக அரசுக்கு கடும் கண்டனம் தெரிவித்துள்ளார். தனது எக்ஸ் (ட்விட்டர்) பதிவில் அவர் கூறியுள்ளதாவது:

“டெல்லி மதுபான கொள்கை வழக்கின் தீர்ப்பை எண்ணி மத்திய பாஜக அரசு வெட்கப்பட வேண்டும். உண்மையை உரக்கப் பேச வைத்த மரியாதைக்குரிய நண்பர் கெஜ்ரிவால் மற்றும் சிசோடியாவுக்கு வாழ்த்துகள். மத்திய பாஜக அரசு குறுகிய அரசியல் லாபத்துக்காக விசாரணை அமைப்புகளின் நம்பகத்தன்மையை அடகு வைக்கக்கூடாது. மத்திய அரசின் பழிவாங்கல் போக்கை எதிர்த்து இறுதி வரை உறுதியாகப் போராடிய கெஜ்ரிவாலுக்கு பாராட்டுகள்.”

ஸ்டாலினின் இந்த பதிவு சமூக வலைதளங்களில் பெரும் பரபரப்பை ஏற்படுத்தியுள்ளது. எதிர்க்கட்சிகள் இதை “மத்திய அரசின் தவறான பயன்பாட்டுக்கு எதிரான வலுவான குரல்” என வரவேற்றுள்ளன. பாஜக தரப்பில் இதுவரை பதில் வரவில்லை.

கெஜ்ரிவால் விடுதலைக்குப் பிறகு டெல்லி அரசியல் களம் சூடுபிடித்துள்ளது. AAP இதை “நேர்மைக்கான வெற்றி” எனக் கொண்டாடுகிறது. திமுக-ஆம் ஆத்மி இடையேயான நெருக்கம் மீண்டும் வெளிப்பட்டுள்ளது. மத்திய அரசின் விசாரணை அமைப்புகள் மீதான நம்பகத்தன்மை கேள்விக்குள்ளாகியுள்ள நிலையில், இந்த தீர்ப்பு 2026 தேர்தலுக்கு முன் பெரும் தாக்கத்தை ஏற்படுத்தும் என எதிர்பார்க்கப்படுகிறது.
 

இதையும் படிங்க: ஹப்பாடா!! ரொம்ப பெரிய நிம்மதி!! மதுபான கொள்கை முறைகேடு வழக்கு! கெஜ்ரிவால், மணீஷ் சிசோடியா விடுவிப்பு!